ନୂଆଦିଲ୍ଲୀ: ଭାରତୀୟ ଷ୍ଟାର କ୍ରିକେଟର କେଏଲ୍ ରାହୁଲ ଓ ତାଙ୍କ ପତ୍ନୀ ତଥା ଅଭିନେତ୍ରୀ ଆଥିୟା ଶେଟ୍ଟୀ ନିକଟରେ 'କ୍ରିକେଟ ଫର ଚାରିଟି' ନିଲାମର ଆୟୋଜନ କରି ଚର୍ଚ୍ଚାକୁ ଆସିଥିଲେ । ଏହି ଅକ୍ସନର କାରଣ ଥିଲା ଅଭାବୀ ଅସହାୟ ପିଲାଙ୍କୁ ସାହାଯ୍ୟ କରିବା । ଏଭଳି ପିଲାଙ୍କୁ ଶିକ୍ଷା ଯୋଗାଇବା ପାଇଁ କାର୍ଯ୍ୟ କରୁଥିବା 'ଭିପ୍ଲା' ସଂଗଠନକୁ ସହଯୋଗ କରିବା ପାଇଁ ଏଭଳି ନିଆରା ଅକ୍ସନ ଆୟୋଜନ କରିଥିଲେ ଏହି ଷ୍ଟାର ଦମ୍ପତି । ଏହି ଅକ୍ସନ ପାଇଁ ବହୁ କ୍ରିକେଟର ସେମାନଙ୍କ ବ୍ୟକ୍ତିଗତ ଜିନିଷ ଦେଇଥିଲେ ନିଲାମ କରିବା ପାଇଁ । ସେଥିମଧ୍ୟରୁ ଭାରତୀୟ ଷ୍ଟାର ବ୍ୟାଟର ବିରାଟ କୋହଲିଙ୍କ ଜର୍ସି ସର୍ବାଧିକ 40 ଲକ୍ଷ ଟଙ୍କାରେ ନିଲାମ ହୋଇଥିଲା ।
The most expensive buy at the KL Rahul-Athiya conducted auction:
— Mufaddal Vohra (@mufaddal_vohra) August 23, 2024
Virat Kohli's jersey - 40 Lakhs.
Virat Kohli's gloves - 28 Lakhs.
Rohit Sharma's bat - 24 Lakhs.
MS Dhoni's bat - 13 Lakhs.
Rahul Dravid's bat - 11 Lakhs. pic.twitter.com/ZzPxO2yh5o
କିଙ୍ଗ କୋହଲିଙ୍କ ଜର୍ସି ସବୁଠୁ ଦାମୀ :-
ମହତ ଉଦ୍ଦେଶ୍ୟରେ ଆୟୋଜିତ ଏହି ଅକ୍ସନ ପାଇଁ ଅନେକ ଭାରତୀୟ ଓ ବିଦେଶୀ ଖେଳାଳି ସେମାନଙ୍କ ବ୍ୟବହୃତ କ୍ରୀଡ଼ା ସାମଗ୍ରୀ ଯଥା, ବ୍ୟାଟ, ଜର୍ସି, ହେଲମେଟ, ଗ୍ଲୋଭସ ଆଦି ଦେଇଥିଲେ । ସେଥିମଧ୍ୟରୁ ଭାରତୀୟ ମହାନ ବ୍ୟାଟର ବିରାଟ କୋହଲିଙ୍କ ଜର୍ସି ସବୁଠୁ ଅଧିକ ଟଙ୍କାରେ ନିଲାମ ହୋଇଥିଲା । କୋହଲି ଏହି ଅକ୍ସନକୁ ଦେଇଥିବା ଜର୍ସି 40 ଲକ୍ଷ ଟଙ୍କାରେ ବିକ୍ରି ହୋଇଥିଲା । ଏହାପରେ କୋହଲିଙ୍କ ଗ୍ଲୋଭସ୍ ପାଇଁ ମଧ୍ୟ ଏକ ବଡ଼ ବମ୍ଫର ବିଡ୍ ଲାଗିଥିଲା । 28 ଲକ୍ଷ ଟଙ୍କାରେ କୋହଲିଙ୍କ ଗ୍ଲୋଭସ ନିଲାମ ହୋଇଥିଲା । ଏହାପରେ ଭାରତୀୟ ଟେଷ୍ଟ ଓ ଦିନିକିଆ ଦଳର ଅଧିନାୟକ ରୋହିତ ଶର୍ମାଙ୍କ ବ୍ୟାଟ 24 ଲକ୍ଷ ଟଙ୍କାରେ ବିକ୍ରି ହୋଇଥିଲା । ଏହାଛଡ଼ା ଭାରତୀୟ ଦଳର ପୂର୍ବତନ ଅଧିନାୟକ ଏମ୍ଏସ୍ ଧୋନୀ ଓ ରାହୁଲ ଦ୍ରାବିଡଙ୍କ ବ୍ୟାଟ ଯଥାକ୍ରମେ 13 ଲକ୍ଷ ଓ 11 ଲକ୍ଷ ଟଙ୍କାରେ ନିଲାମ ହୋଇଥିଲା । ଏପରିକି ଏହି ଅକ୍ସନର ଆୟୋଜନ କରିଥଇବା କେଏଲ୍ ରାହୁଲ ନିଜ ଜର୍ସିକୁ ମଧ୍ୟ ଅକ୍ସନରେ ସାମିଲ କରିଥିଲେ, ଯାହା 11 ଲକ୍ଷ ଟଙ୍କାରେ ବିକ୍ରି ହୋଇଥିଲା ।
କେଏଲ୍ ରାହୁଲ ଓ ଆଥିୟା ଶେଟ୍ଟୀ ଆରମ୍ଭ କରିଥିବା ଏହି ଅଭିଯାନରେ ସ୍ପିଡଷ୍ଟାର ଯସପ୍ରୀତ ବୁମ୍ରା, ଋଷଭ ପନ୍ତ ଓ ସଞ୍ଜୁ ସାମସନ ମଧ୍ୟ ସେମାନଙ୍କୁ ସମର୍ଥନ କରିଛନ୍ତି । ଜୋସ ବଟଲର, କ୍ବିଣ୍ଟନ ଡି'କକ୍ ଓ ନିକୋଲସ ପୂରନଙ୍କ ଭଳି ଅନେକ ବିଦେଶୀ କ୍ରିକେଟର ମଧ୍ୟ ଏହି ଅଭିଯାନର ଅଂଶ ହୋଇଛନ୍ତି ।
କାହାର କେଉଁ ସାମଗ୍ରୀ କେତେ ଟଙ୍କାରେ ବିକ୍ରି ହେଲା :-
କୋହଲିଙ୍କ ଜର୍ସି :- 40 ଲକ୍ଷ
କୋହଲିଙ୍କ ଗ୍ଲୋଭସ୍ :- 28 ଲକ୍ଷ
ରୋହିତଙ୍କ ବ୍ୟାଟ :- 24 ଲକ୍ଷ
ଧୋନୀଙ୍କ ବ୍ୟାଟ :- 13 ଲକ୍ଷ
ରାହୁଲ ଦ୍ରାବିଡଙ୍କ ବ୍ୟାଟ :- 11 ଲକ୍ଷ
କେଏଲ୍ ରାହୁଲଙ୍କ ଜର୍ସି :- 11 ଲକ୍ଷ
କ'ଣ ହେବ ନିଲାମ ଟଙ୍କା ? :-
ତେବେ ଏହି 'କ୍ରିକେଟ ଫର୍ ଚାରିଟି' ଅକ୍ସନରେ ମୋଟ 1.93 କୋଟି ଟଙ୍କା ପାଣ୍ଠି ସଂଗ୍ରହ ହୋଇଥିଲା । ଏନେଇ ନିଜେ କେଏଲ୍ ରାହୁଲ ନିଜ ସୋସିଆଲ ମିଡିଆରେ ଏକ ପୋଷ୍ଟ କରି ଖୁସି ବ୍ୟକ୍ତ କରିଥିଲେ । ତାଙ୍କର ନିଲାମ ସଫଳ ହୋଇଛି ଏବଂ ଏହି ସମସ୍ତ ଟଙ୍କା ଅର୍ଥ ଅଭାବୀ ପିଲାଙ୍କ ଶିକ୍ଷା ପାଇଁ ଖର୍ଚ୍ଚ ହେବ ବୋଲି ସେ କହିଥିଲେ । ପ୍ରକାଶ ଥାଉ, ନିଲାମ ଟଙ୍କା ଶ୍ରବଣ ବାଧିତ ତଥା ବୌଦ୍ଧିକ ଭିନ୍ନକ୍ଷମ ପିଲାମାନଙ୍କୁ ଶିକ୍ଷାଦାନରେ ସାହାଯ୍ୟ କରିବା ପାଇଁ ବ୍ୟବହୃତ ହେବ । ଏହି ଗୁରୁତ୍ୱପୂର୍ଣ୍ଣ କାରଣ ପାଇଁ ସଚେତନତା ତଥା ପାଣ୍ଠି ସଂଗ୍ରହ ପାଇଁ ରାହୁଲ ଏବଂ ଆଥିୟା ଶେଟ୍ଟୀଙ୍କୁ ବିଭିନ୍ନ କ୍ଷେତ୍ରରୁ ବେଶ ପ୍ରଶଂସା କରାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
