ନୂଆଦିଲ୍ଲୀ : ସାରା ବିଶ୍ବରେ କ୍ରିକେଟ୍ର କ୍ରେଜ ବହୁତ ଉଚ୍ଚରେ ଉପରେ । ତା'ଠାରୁ ବି ଉପରେ କ୍ରିକେଟରମାନଙ୍କ କ୍ରେଜ । ଆଉ କଥା ଯେତେବେଳେ କିଙ୍ଗ କୋହଲିଙ୍କର ଆସେ, ତେବେ ଭାଙ୍ଗିଯାଏ ଇଣ୍ଟରନେଟର ରେକର୍ଡ । କେବଳ କ୍ରିକେଟପ୍ରେମୀ କାହିଁକି, ବିଭିନ୍ନ ଦେଶର ଷ୍ଟାର କ୍ରିକେଟରମାନେ ମଧ୍ୟ ବିରାଟ କୋହଲିଙ୍କର ଫ୍ୟାନ୍ ଅଟନ୍ତି । ଖୋଦ ପାକିସ୍ତାନର ଷ୍ଟାର ପେସର ଶାହୀନ ଆଫ୍ରିଦି ଏବେ କୋହଲିଙ୍କୁ ନେଇ ଏକ ବଡ଼ ବିବୃତ୍ତି ଦେଇଛନ୍ତି । ସେ ଟିମ୍ ଇଣ୍ଡିଆର ଷ୍ଟାର ବ୍ୟାଟର ବିରାଟ କୋହଲିଙ୍କୁ ବେଶ ପ୍ରଶଂସା କରିଛନ୍ତି । ଟି20 ବିଶ୍ବକପ 2022ରେ ପାକିସ୍ତାନ ବିପକ୍ଷରେ କୋହଲି ଖେଳିଥିବା 82 ରନ୍ର ଅପରାଜିତ ପାଳିକୁ ବିରାଟଙ୍କର ଶ୍ରେଷ୍ଠ ଇନିଂସ ବୋଲି ଘୋଷଣା କରିଛନ୍ତି ଶାହିନ୍ ।
'ପାକିସ୍ତାନ ବିପକ୍ଷରେ ଖେଳିଥିବା ପାଳି ବିରାଟଙ୍କର ଶ୍ରେଷ୍ଠ ଇନିଂସ୍' :-
ଷ୍ଟାର ସ୍ପୋର୍ଟସ ସହ ଆଲୋଚନା ବେଳେ ଶାହୀନ୍ ଆଫ୍ରିଦି କହିଛନ୍ତି, "ବିରାଟ କୋହଲିଙ୍କ 82 ରନ୍ର ଅପରାଜିତ ଇନିଂସ ମୋ ପାଇଁ ସର୍ବୋତ୍ତମ ପାଳି । ମୁଁ ମୋର କ୍ୟାରିୟରରେ କୋହଲିଙ୍କର ଯେତେ ପାଳି ଦେଖିଛି, ସେହି ଇନିଂସ ଭଳି ପାଳି ମୁଁ କେବେ ଦେଖିନାହିଁ । ବିରାଟ କୋହଲି ଜଣେ ମହାନ ଖେଳାଳି ଏବଂ କୋହଲିଙ୍କ ପରି ଜଣେ ମହାନ ଖେଳାଳି ହିଁ ଏଭଳି ଇନିଂସ ଖେଳିପାରିବେ । ସେହି ପାଳିରେ ହରିସ୍ ରୌଫଙ୍କ ସର୍ବଶ୍ରେଷ୍ଠ ବଲ୍କୁ କୋହଲି ଏକ ସିଧା ଛକା ମାରିଥିଲେ ଯାହା ଅବିଶ୍ବସନୀୟ ଥିଲା ।
ପାକିସ୍ତାନଠୁ ବିଜୟ ଛଡ଼ାଇ ଆଣିଥିଲେ ବିରାଟ :-
ଉଲ୍ଲେଖ ଯୋଗ୍ୟ, ଶାହୀନ୍ ଯେଉଁ ମ୍ୟାଚ୍ ବିଷୟରେ କହିଛନ୍ତି, ତାହା ଟି20 ବିଶ୍ବକପ 2022ରେ ଭାରତ ଏବଂ ପାକିସ୍ତାନ ମଧ୍ୟରେ ଖେଳାଯାଇଥିଲା । ଏହା ଅଷ୍ଟ୍ରେଲିଆର ଏମସିଜି କ୍ରିକେଟ୍ ଗ୍ରାଉଣ୍ଡରେ ଖେଳାଯାଇଥିଲା । ଏହି ମ୍ୟାଚ୍ରେ ପ୍ରଥମ ବ୍ୟାଟିଂ କରି ପାକିସ୍ତାନ 20 ଓଭରରେ 8 ୱିକେଟ୍ ହରାଇ 159 ରନ୍ ସଂଗ୍ରହ କରିଥିଲା । ଦ୍ବିତୀୟ ପାଳିରେ ବିରାଟ କୋହଲିଙ୍କ 82 ରନର ଚମତ୍କାର ପାଳି ବଳରେ ନିର୍ଦ୍ଧାରିତ ଓଭରରେ 6 ୱିକେଟ୍ ହରାଇ ଭାରତ ଏହି ମ୍ୟାଚ୍କୁ ଜିତି ନେଇଥିଲା ।
Shaheen Shah Afridi said - " virat kohli is a great player. and great player like kohli could played such innings. that ball was haris rauf's best ball and he hit six on straight down the ground was unbelievable". (star sports). pic.twitter.com/IF42NhB9CP
— Tanuj Singh (@ImTanujSingh) August 21, 2024
ଏହି ମ୍ୟାଚ୍ରେ 160 ରନର ଟାର୍ଗେଟ ନେଇ ବ୍ୟାଟିଂ କରୁଥିବା ଭାରତର ପରାଜୟ ଗୋଟିଏ ସମୟରେ ପ୍ରାୟ ନିଶ୍ଚିତ ମନେ ହେଉଥିଲା । କାରଣ ଦଳର ପ୍ରମୁଖ ବ୍ୟାଟରମାନେ ଚାପ ନିୟନ୍ତ୍ରଣ କରିନପାରି ଶୀଘ୍ର ଆଉଟ୍ ହୋଇଯାଇଥେଲେ । କିନ୍ତୁ ବିରାଟ କୋହଲି ଦଳ ପାଇଁ ଚିରାଚରିତ ଭାବେ ବଡ଼ ମ୍ୟାଚ୍ରେ ସାଜିଲେ ସଙ୍କଟମୋଚକ । ସେ ଦଳକୁ କେବଳ ପରାଜୟରୁ ରକ୍ଷା କରିନଥିଲେ ବରଂ ଚମତ୍କାର ବ୍ୟାଟିଂ କରି ପାକିସ୍ତାନ ହାତମୁଠାରୁ ବିଜୟ ଛଡ଼ାଇ ଆଣିଥିଲେ । ଏହି ମ୍ୟାଚ୍ରେ କୋହଲି 53ଟି ବଲରେ 6ଟି ଚୌକା ଓ 4ଟି ଛକା ସହିତ 82 ରନ୍ର ଅପରାଜିତ ଇନିଂସ ଖେଳିଥିଲେ ।
Shaheen Shah Afridi said - " virat kohli's 82* runs innings, i have never seen a better innings than that kohli's innings in my career". (star sports). pic.twitter.com/WpXQK3P5YO
— Tanuj Singh (@ImTanujSingh) August 21, 2024
ବ୍ୟୁରୋ ରିପୋର୍ଟ, ଇଟିଭି ଭାରତ
