ହାଇଦ୍ରାବାଦ : ଭାରତୀୟ ଷ୍ଟାର କ୍ରିକେଟର ତଥା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଚଳିତ ବର୍ଷ ତାଙ୍କ ମଡେଲ ପତ୍ନୀ ତଥା ବଲିଉଡ ଅଭିନେତ୍ରୀ ନତାଶା ଷ୍ଟାନକୋଭିକଙ୍କଠାରୁ ଛାଡ଼ପତ୍ର ପାଇଛନ୍ତି । ଉଭୟ ପ୍ରେମ ବିବାହ କରିବା ପରେ ସେମାନଙ୍କର ଗୋଟିଏ ପୁଅ ମଧ୍ୟ ହୋଇଥିଲା । ହେଲେ ହଠାତ ଷ୍ଟାର ଦମ୍ପତି ଅଲଗା ହେବାର କାରଣ କଣ, ତାହା ଏବେ ପର୍ଯ୍ୟନ୍ତ ସ୍ପଷ୍ଟ ହେଲା ନାହିଁ । ଏବେ ବିଭିନ୍ନ ସମୟରେ ଉଭୟ ହାର୍ଦ୍ଦିକ ଓ ନତାଶା ନିଜ ନିଜର ସୋସିଆଲ ମିଡିଆ ହ୍ୟାଣ୍ଡେଲରେ ପୋଷ୍ଟ କରୁଥିବା ବିଭିନ୍ନ ଷ୍ଟୋରୀକୁ ନେଇ ସେମାନଙ୍କ ବିଚ୍ଛେଦର କାରଣ ସହିତ ଯୋଡୁଛନ୍ତି ନେଟିଜେନ୍ସ । ଏହି କ୍ରମରେ ନତାଶା ନିକଟରେ ନିଜ ଇନଷ୍ଟାଗ୍ରାମ ଷ୍ଟୋରୀରେ ଏକ କ୍ରିପ୍ଟିକ ନୋଟ ସେୟାର କରିଛନ୍ତି । ଯାହା ସେମାନଙ୍କ ବିଚ୍ଛେଦ ପଛର ରହସ୍ୟ ବୋଲି ୟୁଜର୍ସମାନେ ଅନୁମାନ କରିଛନ୍ତି ।
କଣ ଲେଖିଛନ୍ତି ନତାଶା ? :-
ଯଦିଓ ନତାଶା କିମ୍ବା ହାର୍ଦ୍ଦିକ ସେମାନଙ୍କ ବିବାହ ବିଚ୍ଛେଦ ପଛର କାରଣ ସର୍ବସାଧାରଣରେ ଖୋଲି କହିନାହାନ୍ତି, ହେଲେ ନତାଶାଙ୍କ ଇନଷ୍ଟାଗ୍ରାମ ଷ୍ଟୋରୀ ଅନେକ କିଛି କଥା କହୁଛି । ନତାଶା ନିଜ ଷ୍ଟୋରୀରେ ଏପରି ଏକ ନୋଟ ସେୟାର କରି ପ୍ରେମର ସଂଜ୍ଞା ବର୍ଣ୍ଣନା କରିଛନ୍ତି । ଏହି ନୋଟରେ ଲେଖିଥିଲା, 'ପ୍ରେମ ଧୈର୍ଯ୍ୟବାନ ଏବଂ ଦୟାଳୁ ଅଟେ । ଏହା ଈର୍ଷାପରାୟଣ ହେବା ଉଚିତ ନୁହେଁ । ପ୍ରେମ ଅନ୍ୟମାନଙ୍କୁ ଅପମାନିତ କରେ ନାହିଁ । ପ୍ରେମ ସ୍ବାର୍ଥପର ନୁହଁ । ଏହା ସହଜରେ କ୍ରୋଧିତ ହୁଏ ନାହିଁ । ପ୍ରେମ ଭୁଲକୁ ସହ୍ୟ କରେ ନାହିଁ ଏବଂ ପ୍ରେମ ସର୍ବଦା ସୁରକ୍ଷା କରେ ।" ତେବେ ପୂର୍ବରୁ ହାର୍ଦ୍ଦିକଙ୍କ ଅହଙ୍କାର କାରଣରୁ ସେମାନଙ୍କ ମଧ୍ୟରେ ଛାଡ଼ପତ୍ର ହୋଇଥିବା ଚର୍ଚ୍ଚା ହେଉଥିଲା । ଏବେ ନତାଶା ଏଭଳି ନୋଟ ସେୟାର କରିବା ପରେ ଏହା ପ୍ରଶଂସକମାନେ ଅନୁମାନ କରୁଛନ୍ତି ଯେ, ଏଥିରେ କିଛି ସତ୍ୟତା ଥାଇପାରେ ।
2020ରେ ବିବାହ, 24ରେ ବିଚ୍ଛେଦ :-
ଭାରତୀୟ ଷ୍ଟାର କ୍ରିକେଟର ହାର୍ଦ୍ଦିକ ପାଣ୍ଡ୍ୟା ବହୁ ଦିନ ଧରି ନତାଶାଙ୍କୁ ଡେଟ୍ କରିବା ପରେ ବିବାହ ବନ୍ଧନରେ ଆବଦ୍ଧ ହୋଇଥିଲେ । ପ୍ରଥମେ ଜାନୁଆରୀ 1, 2020ରେ ଉଭୟ ଇଣ୍ଟିମେଟ ସେରିମନିରେ ନିର୍ବନ୍ଧ କରିଥିଲେ । ଏହାପରେ କୋଭିଡ ସମୟରେ ସେହିବର୍ଷ ମେ 31ରେ ବିବାହ କରିଥିଲେ । ଏହାପରେ ବିବାହର କେବଳ 2 ମାସ ମଧ୍ୟରେ, ଜୁଲାଇ 30 ତାରିଖରେ ଉଭୟ ପୁତ୍ର ସନ୍ତାନ ଅଗସ୍ତ୍ୟକୁ ସ୍ବାଗତ କରିଥିଲେ । ନତାଶା ଓ ହାର୍ଦ୍ଦିକ ଦ୍ବିତୀୟ ଥର ଲାଗି ଫେବୃଆରୀ 14, 2023ରେ ଗ୍ରାଣ୍ଡ ୱେଡିଂରେ ପୁଣି ଥରେ ବିବାହ କରିଥିଲେ । ଏହାପରେ ଉଭୟଙ୍କ ମଧ୍ୟରେ ସମ୍ପର୍କ ଭଲ ନଥିବା ଓ ସେମାନଙ୍କ ବିଚ୍ଛେଦ ନେଇ ବହୁ ଦିନ ଧରି ଚର୍ଚ୍ଚା ଲାଗି ରହିଥିଲା । ଶେଷରେ ଜୁଲାଇ 18, 2024ରେ ଉଭୟ ନିଜ ନିଜ ସୋସିଆଲ ମିଡିଆରେ ସେମାନଙ୍କ ବିବାହ ବିଚ୍ଛେଦ ନେଇ ପୋଷ୍ଟ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
