ହାଇଦ୍ରାବାଦ: ଆଇପିଏଲର 17ତମ ସଂସ୍କରଣରେ ପ୍ରତିଦିନ ରୋମାଞ୍ଚକର ମୁକାବିଲା ସହ ଅରେଞ୍ଜ କ୍ୟାପ ଓ ପର୍ପଲ କ୍ୟାପ ରେସ ମଧ୍ୟ ଜାରି ରହିଛି । ଏହା ସହିତ ପଏଣ୍ଟ ଟେବୁଲରେ ମଧ୍ୟ ବିଭିନ୍ନ ଦଳର ସ୍ଥାନ ବଦଳୁଛି। ଚଳିତ ସିଜିନରେ ବର୍ତ୍ତମାନ ପର୍ଯ୍ୟନ୍ତ ସର୍ବାଧିକ ରନ କରି ଅରେଞ୍ଜ କ୍ୟାପ ପିନ୍ଧିଛନ୍ତି ଆରସିବି ବ୍ୟାଟର ବିରାଟ କୋହଲି । ସେହିପରି ଘାତକ ବୋଲିଂ କରି ସର୍ବାଧିକ ଓ୍ବିକେଟ ନେଇ ପର୍ପଲ କ୍ୟାପ ନିଜ ପାଖରେ ରଖିଛନ୍ତି ଯଶପ୍ରୀତ ବୁମରା । ଚଳିତ ସିଜିନରେ ସର୍ବାଧିକ 6ଟି ମ୍ୟାଚରେ ବିଜୀୟ ହୋଇ 12 ପଏଣ୍ଟ ସହ ପଏଣ୍ଟ ଟେବୁଲର ପ୍ରଥମ ସ୍ଥାନରେ ରାଜ କରୁଛି ରାଜସ୍ଥାନ ରୟାଲ୍ସ ।
ବିରାଟଙ୍କ ମୁଣ୍ଡରେ ଅରେଞ୍ଜ କ୍ୟାପ: ଆଇପିଏଲରେ ଗତକାଲି ଖେଳାଯାଇଥିବା 36 ତମ ମୁକାବିଲାରେ ଆରସିବି ଓ କେକେଆର ମୁହାଁମୁହିଁ ହୋଇଥିଲେ । ଏହି ମ୍ୟାଚରେ କୋହଲି ମାତ୍ର 18 ରନ କରି ଆଉଟ ହୋଇଥିଲେ । ଏହି ରନକୁ ମିଶାଇ ବର୍ତ୍ତମାନ ପର୍ଯ୍ୟନ୍ତ ସେ ସର୍ବାଧିକ 379 ରନ କରି ଅରେଞ୍ଜ କ୍ୟାପ ହାତେଇଛନ୍ତି । 8ଟି ମ୍ୟାଚ ଖେଳି ସେ ଏହି ରନ କରିଥିବା ବେଳେ ଏଥିରେ ଗୋଟିଏ ଶତକ ଓ ଦୁଇଟି ଅର୍ଦ୍ଧଶତକ ସାମିଲ ରହିଛି । ସେହିପରି ଅରେଞ୍ଜ କ୍ୟାପ ରେସର ଦ୍ବିତୀୟ ସ୍ଥାନରେ ରହିଛି ରାଜସ୍ଥାନର ବ୍ୟାଟର ରିଆନ ପରାଗ । ସେ 318 ରନ କରିଛନ୍ତି । 298 ରନ ସହ ତୃତୀୟ ସ୍ଥାନରେ ରହିଛନ୍ତି ଶୁବମନ ଗିଲ ଓ 297 ରନ ସହ ଚତୁର୍ଥ ସ୍ଥାନରେ ରହିଛନ୍ତି ମୁମ୍ବାଇ ଇଣ୍ଡିଆନ୍ସର ରୋହିତ ଶର୍ମା ।
