ରାଞ୍ଚି: ଭାରତୀୟ ବୋଲରଙ୍କ ଘାତକ ଆକ୍ରମଣ । ସ୍ପିନ୍ ଜାଲରେ ଫସିଲେ ଇଂଲଣ୍ଡ ବ୍ୟାଟର । ସଫଳ ହେଲା ଭାରତୀୟ ଅଧିନାୟକ ରୋହିତ ଶର୍ମାଙ୍କ ରଣନୀତି । ଭାରତ ଓ ଇଂଲଣ୍ଡ ମଧ୍ୟରେ ଖେଳାଯାଉଥିବା ୪ର୍ଥ ଟେଷ୍ଟ ମ୍ୟାଚ୍ର ୩ୟ ଦିନରେ ଆଜି ଭାରତ ୩୦୭ ରନରେ ଅଲ୍ଆଉଟ୍ ହୋଇଥିଲା । ଏହାପରେ ୪୬ ରନ ଲିଡ୍ ନେଇ ଦ୍ବିତୀୟ ଇନିଂସ୍ ଖେଳିବାକୁ ମୈଦାନକୁ ଓହ୍ଲାଇଥିଲା ଇଂଲଣ୍ଡ । ହେଲେ ପ୍ରତିପକ୍ଷ ବ୍ୟାଟରଙ୍କ ବିପକ୍ଷରେ ପୂର୍ବରୁ ରଣନୀତି ପ୍ରସ୍ତୁତ କରିସାରିଥିଲେ ଭାରତୀୟ ସେନାପତି । ଆରମ୍ଭରୁ ଲଗାଇଥିଲେ ସ୍ପିନ୍ ଆଟାକ୍ । ଆଉ ଏଥିରେ ବେଶ ସଫଳ ମଧ୍ୟ ହେଲା ଭାରତ । କେବଳ ୧୪୫ ରନରେ ଦ୍ବିତୀୟ ଇନିଂସ୍ରେ ସମସ୍ତ ୱିକେଟ୍ ହରାଇଛି ଇଂଲଣ୍ଡ । ଫଳରେ ଭାରତ ଆଗରେ ଏହି ମ୍ୟାଚ୍ ଜିତିବାକୁ ୧୯୨ ରନର ବିଜୟଲକ୍ଷ୍ୟ ଧାର୍ଯ୍ୟ ହୋଇଛି ।
ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ବିପର୍ଯ୍ୟୟର ସମ୍ମୁଖୀନ ହୋଇଥିଲା ଇଂଲଣ୍ଡ । ଭାରତୀୟ ବୋଲିଂ ଆଟାକ୍ରେ ଦଳର ବ୍ୟାଟର ନିଜର ୱିକେଟ୍ ହରାଇ ଚାଲିଥିବାବେଳେ ଜୋ ରୁଟ୍ ଏକାକୀ ଶତକ ହାସଲ କରି ଦଳକୁ ମଜଭୁତ ସ୍ଥିତିକୁ ନେଇଥିଲେ । ରୁଟ୍ଙ୍କ ୧୨୨ ଏବଂ ଓଲି ରବିନ୍ସନ୍ଙ୍କ ୫୮ ରନର ପାଳି ବଳରେ ଇଂଲଣ୍ଡ ପ୍ରଥମ ଇନିଂସ୍ରେ ୩୫୩ ରନ କରି ଦ୍ବିତୀୟ ଦିନ ପ୍ରାରମ୍ଭରେ ଅଲ୍ ଆଉଟ୍ ହୋଇଥିଲା । ଏହି ପାଳିରେ ଭାରତ ପକ୍ଷରୁ ରବୀନ୍ଦ୍ର ଜାଡେଜା ସର୍ବାଧିକ ୪ଟି ୱିକେଟ୍ ହାସଲ କରିଥିବାବେଳେ ଆକାଶ ଦୀପ ୩ଟି ଓ ମହମ୍ମଦ ସିରାଜ ୨ଟି ୱିକେଟ୍ ଅକ୍ତିଆର କରିଥିଲେ । ସେହିଭଳି ଅନୁଭବୀ ରବି ଅଶ୍ବିନଙ୍କୁ ମିଳିଥିଲା ଗୋଟିଏ ସଫଳତା ।
ଏହାପରେ ସେହିଦିନ (ଦ୍ବିତୀୟ ଦିନ) ଭାରତ ବ୍ୟାଟିଂ ଆରମ୍ଭ କରିଥିଲା । ଯୁବ ବ୍ୟାଟର ଯଶସ୍ବୀ ଜୟସ୍ବାଲ ଆକ୍ରାମକ ବ୍ୟାଟିଂ ଆରମ୍ଭ କରିଥିଲେ ମଧ୍ୟ ଅନ୍ୟ ଭାରତୀୟ ବ୍ୟାଟରମାନେ ଲମ୍ବା ପାଳି ଖେଳିବାରେ ଅସମର୍ଥ ହୋଇଥିଲେ । ଜୟସ୍ବାଲ ୭୩ ରନ କରି ଆଉଟ୍ ହୋଇଥିଲେ । ଫଳରେ ଦ୍ବିତୀୟ ଦିନ ଖେଳ ଶେଷ ସୁଦ୍ଧା କେବଳ ୨୧୯ ରନରେ ୭ ୱିକେଟ୍ ହରାଇଥିଲା ଭାରତ । ହେଲେ ପିଚ୍ରେ ମହଜୁଦ ଥିବା ନବାଗତ ଧ୍ରୁବ ଜୁରେଲ ଓ କୁଲଦୀପ ଯାଦବ କିଛିମାତ୍ରାରେ ଦଳକୁ ସଙ୍କଟରୁ ଉଦ୍ଧାର କରିଥିଲେ । ଆଜି ଜୁରେଲ୍ଙ୍କ ୯୦ ଓ କୁଲଦୀପଙ୍କ ୨୮ ରନର ପାଳି ବଳରେ ୩୦୭ ରନରେ ପ୍ରଥମ ପାଳି ଶେଷ କରିଥିଲା ଭାରତ । ଏହା ସହିତ ଇଂଲଣ୍ଡ ଠାରୁ ୪୬ ରନ ପଛରେ ପଡ଼ିଯାଇଥିଲା ଘରୋଇ ଦଳ । ଏହି ପାଳିରେ ଇଂଲଣ୍ଡ ପକ୍ଷରୁ ଶୋଏବ ବସିର ସର୍ବାଧିକ ୫ ୱିକେଟ୍ ସଫଳତା ହାସଲ କରିଥିବାବେଳେ ଟମ୍ ହାର୍ଟଲେ ୩ ଓ ଅନୁଭବୀ ପେସର ଜେମ୍ସ ଆଣ୍ଡରସନ୍ ୨ଟି ୱିକେଟ୍ ନେଇଥିଲେ ।
ତେବେ ଆଜି ତୃତୀୟ ଦିନରେ ଇଂଲଣ୍ଡ ୪୬ ରନ ଲିଡ୍ ନେଇ ୨ୟ ପାଳି ବ୍ୟାଟିଂ ଆରମ୍ଭ କରିଥିଲା । ହେଲେ ଭାରତୀୟ ସ୍ପିନ୍ ବିଭାଗର ଘାତକ ବୋଲିଂକୁ ଭେଦ କରିବାରେ ଅସମର୍ଥ ରହିଥିଲେ ଇଂଲଣ୍ଡ ବ୍ୟାଟର । ବିଶେଷ କରି ଅନୁଭବୀ ସ୍ପିନର ରବିଚନ୍ଦ୍ରନ ଅଶ୍ବିନ ଓ କୁଲଦୀପ ଯାଦବଙ୍କ ବୋଲିଂରେ ଘାଇଲା ହୋଇଥିଲା ବିପକ୍ଷ ଦଳ । ଦଳ ପାଇଁ ଜ୍ୟାକ୍ କ୍ରାଓଲି ସର୍ବାଧିକ ୬୦ ରନର ପାଳି ଖେଳିଥିଲେ । ଅନ୍ୟମାନଙ୍କ ମଧ୍ୟରେ ଜନି ବେୟାରଷ୍ଟୋ (୩୦)ଙ୍କ ବ୍ୟତୀତ ଅନ୍ୟ କୌଣସି ବ୍ୟାଟର ୨୦ ରନ ମଧ୍ୟ କରିବାରେ ସଫଳ ହୋଇନଥିଲେ । ଫଳରେ ୧୪୫ ରନରେ ସମସ୍ତ ୱିକେଟ୍ ହରାଇଛି ଇଂଲଣ୍ଡ । ଭାରତ ପକ୍ଷରୁ ଅଭିଜ୍ଞ ରବିଚନ୍ଦ୍ରନ ଅଶ୍ବିନ ୫ଟି ୱିକେଟ୍ ଅକ୍ତିଆର କରିଥିବାବେଳେ କୁଲଦୀପ ଯାଦବ ୪ଟି ଓ ରବୀନ୍ଦ୍ର ଜାଡେଜା ଗୋଟିଏ ୱିକେଟ୍ ଅକ୍ତିଆର କରିଥିଲେ । ପେସରମାନଙ୍କ ମଧ୍ୟରେ କେବଳ ମହମ୍ମଦ ସିରାଜ ୩ ଓଭର ବୋଲିଂ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
