ହାଇଦ୍ରାବାଦ: ବିଶ୍ବ କ୍ରୀଡାର ମହାକୁମ୍ଭ ପ୍ୟାରିସ ଅଲିମ୍ପିକ୍ସ ଆରମ୍ଭ ହେବାକୁ ଯାଉଛି । ଏଥିପାଇଁ କ୍ରୀଡାବିତଙ୍କ ଠାରୁ ଆରମ୍ଭ କରି କ୍ରୀଡାପ୍ରେମୀ ସମସ୍ତେ ଉତ୍ସାହିତ । 2021ରେ ଆୟୋଜନ ହୋଇଥିବା ଟୋକିଓ ଅଲିମ୍ପିକ୍ସରେ ଚମକିଥିଲେ ଭାରତୀୟ ଖେଳାଳି । ଏଥିରେ ଭାରତୀୟ ଆଥଲେଟ୍ଙ୍କ ଐତିହାସିକ ପ୍ରଦର୍ଶନ ଦେଶବାସୀଙ୍କ ମନଜିଣିନେଥିଲା । ଏହି ସଂସ୍କରଣରେ ଭାରତ ସର୍ବକାଳୀନ ସର୍ବାଧିକ 7ଟି ପଦକ ଜିତିଥିଲା । ଏହାମଧ୍ୟରେ ଗୋଟିଏ ସ୍ବର୍ଣ୍ଣ, ଦୁଇଟି ରୌପ୍ୟ ଓ 4 ଟି କାଂସ୍ୟ ପଦକ ସାମିଲ ରହିଥିଲା । ଅଲିମ୍ପିକ୍ସ ପ୍ରତିଯୋଗିତାରେ ସବୁଠାରୁ ଚର୍ଚ୍ଚାରେ ଥିଲେ ନୀରଜ ଚୋପ୍ରା । ଭାରତର ଏକମାତ୍ର ଖେଳାଳି ଭାବେ ସେ ଜାଭେଲିନ ଥ୍ରୋରେ ସ୍ବର୍ଣ୍ଣ ପଦକ ହାସଲ କରିଥିଲେ । ଆସନ୍ତା 26 ତାରିଖରୁ ପ୍ୟାରିସ ଅଲିମ୍ପିକ୍ସ ଆରମ୍ଭ ହେବାକୁ ଥିବା ବେଳେ ଭାରତୀୟ କ୍ରୀଡାବିତ ଭଲ ପ୍ରଦର୍ଶନ କରିବା ନେଇ ଆଶା କରାଯାଉଛି ।
ଟୋକିଓରେ 7 ପଦକ ଜିତିଥିଲା ଭାରତ: ଟୋକିଓ ଅଲମ୍ପିକ୍ସରେ ଭାରତ 7ଟି ପଦକ ଜିତିଥିଲା । ପୂର୍ବ ଅଲିମ୍ପିକ୍ସ ଠାରୁ ସର୍ବାଧିକ ପଦକ ରହିଥିଲା । ନଜର ପକାନ୍ତୁ କେଉଁ ଖେଳାଳି କେଉଁ ପଦକ ଜିତିଥିଲେ ...
| ଟୋକିଓ ଅଲିମ୍ପିକ୍ସରେ ଭାରତର ପ୍ରଦର୍ଶନ |
| ଖେଳାଳି | ପଦକ | କ୍ରୀଡା |
| ନୀରଜ ଚୋପ୍ରା | ଗୋଲ୍ଡ | ପୁରୁଷ ଜାଭେଲିନ୍ ଥ୍ରୋ |
| ମୀରାବାଇ ଚାନୁ | ସିଲଭର | ମହିଳା 49 କେଜି ଭାରଉତ୍ତୋଳନ |
| ପିଭି ସିନ୍ଧୁ | ବ୍ରୋଞ୍ଜ | ମହିଳା ସିଙ୍ଗଲ୍ସ ବ୍ୟାଡମିଣ୍ଟନ୍ |
| ବଜରଙ୍ଗ ପୁନିଆ | ବ୍ରୋଞ୍ଜ | ପୁରୁଷ ରେସଲିଂ -ଫ୍ରିଷ୍ଟାଇଲ୍ 65 କେଜି |
| ଲଭଲିନା | ବ୍ରୋଞ୍ଜ | ବକ୍ସିଂ |
| ଭାରତୀୟ ପୁରୁଷ ହକି ଦଳ | ବ୍ରୋଞ୍ଜ | ହକି |
| ରବି କୁମାର ଡାହିଆ | ସିଲଭର | ପୁରୁଷ ରେସଲିଂ -ଫ୍ରିଷ୍ଟାଇଲ୍ 57 କେଜି |
ଏକ ମାତ୍ର ଖେଳାଳି ଭାବେ ସ୍ବର୍ଣ୍ଣ ଜିତିଥିଲେ ନୀରଜ: ଅଲମ୍ପିକ୍ ପ୍ରତିଯୋଗିତାରେ ଭାରତର ପ୍ରଦର୍ଶନର ମୁଖ୍ୟାଂଶରେ ଜାଭେଲିନ ଥ୍ରୋରେ ନୀରଜ ଚୋପ୍ରା ଦେଶ ପାଇଁ ଏକମାତ୍ର ଖେଳାଳି ଭାବେ ସ୍ବର୍ଣ୍ଣ ପଦକ ଜିତି ଇତିହାସ ରଚିଥିଲେ । 87.58 ମିଟର ଜାଭେଲିନ ଥ୍ରୋ କରି ସେ ପଦକ ବିଜୟ ସହ ପୋଡିୟମର ଶୀର୍ଷରେ ରହିଥିଲେ । ଅଲିମ୍ପିକ୍ସ ଇତିହାସରେ ଅଭିନବ ବିନ୍ଦ୍ରାଙ୍କ ପରେ ଦ୍ବିତୀୟ ଖେଳାଳି ଭାବେ ବ୍ୟକ୍ତିଗତ ଅଲମ୍ପିକ୍ସ ସ୍ବର୍ଣ୍ଣ ପଦକ ଜିତିବାର ଗୌରବ ଅର୍ଜନ କରିଥିଲେ ନୀରଜ ।
41 ବର୍ଷ ପରେ ପଦକ ଜିତଥିଲା ଭାରତୀୟ ପୁରୁଷ ହକି ଟିମ: ଟୋକିଓ ଅଲିମ୍ପିକ୍ସରେ ଭାରତୀୟ ପୁରୁଷ ହକି ଟିମ କାଂସ୍ୟ ପଦକ ଜିତିଥିଲା । ଦୀର୍ଘ 41 ବର୍ଷ ପରେ ଭାରତୀୟ ଟିମ୍ ଅଲିମ୍ପିକ୍ସରେ ପଦକ ହାସଲ କରିବାରେ ସଫଳ ହୋଇଥିଲା । ମନପ୍ରୀତ ସିଂହଙ୍କ ନେତୃତ୍ବରେ ଅଲମ୍ପିକ୍ ହକି ପ୍ରତିଯୋଗିତାର ପୁଲ୍ Aରେ ଥିବା ଟିମ ଇଣ୍ଡିଆ 5ଟି ଗ୍ରୁପ୍ ପର୍ଯ୍ୟାୟ ମ୍ୟାଚ୍ରୁ 4ଟି ବିଜୟ ସହି ଦ୍ବିତୀୟରେ ରହିଥିଲା । ପରେ କ୍ବାର୍ଟର-ଫାଇନାଲରେ ଗ୍ରେଟ୍ ବ୍ରିଟେନକୁ3-1ରେ ହରାଇ ସେମିଫାଇନାଲରେ ପ୍ରବେଶ କରିଥିଲ। ମାତ୍ର ବେଲଜିୟମ ଠାରୁ 5-2 ଗୋଲ୍ରେ ସେମିଫାଇନାଲରେ ପରାସ୍ତ ହୋଇଥିଲା । ପରେ ଜର୍ମାନୀଙ୍କୁ ବ୍ରୋଞ୍ଜ ପଦକ ମ୍ୟାଚ୍ରେ 5-4 ଗୋଲ୍ରେ ହରାଇ ପଦକ ହାତେଇଥିଲା ଭାରତ ।
ଟୋକିଓ ଅଲିମ୍ପିକ୍ 2020 କୋରୋନା ସ୍ଥଗିତ ହେବା ପରେ 2021ରେ ଆୟୋଜନ କରାଯାଇଥିଲା । 200ରୁ ଅଧିକ ଦେଶର ପ୍ରାୟ 11 ହଜାର ଆଥଲେଟ୍ ଏହି ମେଗା ଅଲମ୍ପିକ୍ ଇଭେଣ୍ଟରେ ନିଜ ଦେଶକୁ ପ୍ରତିନିଧିତ୍ବ କରିଥିଲେ । ବିଶ୍ବର ଶ୍ରେଷ୍ଠ କ୍ରୀଡାବିତ୍ଙ୍କ ମଧ୍ୟରେ 33ଟି ଭିନ୍ନ କ୍ରୀଡା ପ୍ରତିଯୋଗିତାର ସାକ୍ଷୀ ପାଟଲିଥିଲା ଜାପାନ । ଭାରତକୁ 100ରୁ ଉର୍ଦ୍ଧ୍ବ କ୍ରୀଡାବିତ ପ୍ରତିନିଦିତ୍ବ କରିଥିଲେ ।
