ହାଇଦ୍ରାବାଦ: ଆସନ୍ତାବର୍ଷ ପାକିସ୍ତାନରେ ଅନୁଷ୍ଠିତ ହେବାକୁ ଯାଉଛି ଆଇସିସି ଚାମ୍ପିୟନ୍ସ ଟ୍ରଫି 2025 । ଏଥିପାଇଁ ଭାରତୀୟ ଦଳ ପାକିସ୍ତାନ ଗସ୍ତ କରିବ ନାହିଁ ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ । କିନ୍ତୁ ଭାରତୀୟ ଦଳକୁ ନିଜ ଦେଶକୁ ନେବାକୁ ପୂରା କସରତ କରୁଛି ପାକିସ୍ତାନ କ୍ରିକେଟ ବୋର୍ଡ- ପିସିବି । ଏଥିପାଇଁ କ୍ରିକେଟ ବୋର୍ଡ ଅଫ୍ ଇଣ୍ଡିଆ (BCCI) ଏବଂ ଭାରତୀୟ ପ୍ରଶଂସକଙ୍କ ପାଇଁ ଏକ ନୂଆ ପଦକ୍ଷେପ ଗ୍ରଙଣ କରିଛି ପାକିସ୍ତାନ କ୍ରିକେଟ ବୋର୍ଡ ।
ଚାମ୍ପିୟନ୍ସ ଟ୍ରଫି ପାଇଁ ପାକିସ୍ତାନ ଗସ୍ତ କରିବାକୁ ଇଚ୍ଛା ରଖିଥିବା ଭାରତୀୟ ପ୍ରଶଂସକଙ୍କ ପାଇଁ ଶୀଘ୍ର ଭିସା ପ୍ରଦାନ ନୀତିକୁ ପିସିବି ଚେୟାରମ୍ୟାନ ତଥା ପାକିସ୍ତାନ ଗୃହମନ୍ତ୍ରୀ ମୋହସିନ ନାକଭି ପ୍ରତିଶ୍ରୁତି ଦେଇଛନ୍ତି । ଆମେରିକୀୟ ଶିଖ ତୀର୍ଥଯାତ୍ରୀଙ୍କୁ ଭେଟିଥିବା ବେଳେ ସେ ଏହି ସୂଚନା ଦେଇଥିଲେ ।
ଭିସା ପ୍ରଦାନରେ ଭାରତୀୟ କ୍ରିକେଟ ଫ୍ୟାନ୍ସଙ୍କୁ ପ୍ରାଥମିକତା:
ନ୍ୟୁଜ ଏଜେନ୍ସି ପିଟିଆଇ ଅନୁଯାୟୀ, ଏକ ଖବରକାଗଜ ନାକଭିଙ୍କ ପକ୍ଷରୁ କହିଛି ଯେ, ଟିକେଟ ପାଇଁ ଆମେ ଭାରତୀୟ ପ୍ରଶଂସକଙ୍କ ପାଇଁ ଏକ ସ୍ୱତନ୍ତ୍ର କୋଟା ରଖିବୁ ଏବଂ ଭିସା ପ୍ରଦାନ ନୀତି ତ୍ୱରାନ୍ୱିତ କରିବାକୁ ଚେଷ୍ଟା କରିବୁ । ପିସିବି ଭାରତୀୟ ପ୍ରଶଂସକଙ୍କୁ ପାକିସ୍ତାନ ଆସି ଲାହୋରରେ ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ୍ ଦେଖିବାକୁ ଆଶା ରଖିଛି ।
ପାକିସ୍ତାନରେ ସମସ୍ତ ଦଳକୁ ସ୍ବାଗତ କରାଯିବ:
କିଛି ସପ୍ତାହ ପୂର୍ବରୁ ନାକଭି କହିଥିଲେ ଯେ, ପାକିସ୍ତାନରେ ଚାମ୍ପିୟନ୍ସ ଟ୍ରଫି ଆୟୋଜିତ ହେଲେ ମଧ୍ୟ ଭାରତ ଅଂଶଗ୍ରହଣ କରିବ ବୋଲି ମୁଁ ନିଶ୍ଚିତ । ଭାରତୀୟ ଦଳ ପାକିସ୍ତାନ ଆସିବା ଉଚିତ । ମୋତେ ଲାଗୁ ନାହିଁ ଭାରତୀୟ ଦଳ ଏଠାକୁ ଆସିବାକୁ ମନା କରିବେ । ଚାମ୍ପିୟନ୍ସ ଟ୍ରଫି ପାଇଁ ପାକିସ୍ତାନରେ ଆମେ ସମସ୍ତ ଦଳକୁ ସ୍ବାଗତ କରିବୁ ଓ ସମସ୍ତ ପ୍ରକାର ବ୍ୟବସ୍ଥା କରିବୁ ।
ଆଇସିସି ଚାମ୍ପିୟନ୍ସ ଟ୍ରଫି କାର୍ଯ୍ୟସୂଚୀ ସ୍ଥିର ହୋଇନାହିଁ:
ଆମେ ଆପଣଙ୍କୁ କହିରଖୁଛୁ ଯେ, ଆଇସିସି ଚାମ୍ପିୟନ୍ସ ଟ୍ରଫି 2025 ଫେବୃଆରୀ 19 ରୁ ଆରମ୍ଭ ହେବାକୁ ଯାଉଛି । ଏହାର ଫାଇନାଲ ମ୍ୟାଚ ମାର୍ଚ୍ଚ 9ରେ ଅନୁଷ୍ଠିତ ହେବ । ଟୁର୍ଣ୍ଣାମେଣ୍ଟର ସମସ୍ତ ମ୍ୟାଚ୍ ଲାହୋର, କରାଚୀ ଏବଂ ରାୱଲପିଣ୍ଡିରେ ଖେଳାଯିବ । ଆଇସିସି ଏପର୍ଯ୍ୟନ୍ତ ଟୁର୍ଣ୍ଣାମେଣ୍ଟର କାର୍ଯ୍ୟସୂଚୀ ପ୍ରକାଶ କରିନାହିଁ, କାରଣ ସେମାନେ ଏହି ସୂଚୀ ପାଇଁ ଭାରତ ସରକାର ଟିମ୍ ଇଣ୍ଡିଆକୁ ପାକିସ୍ତାନ ଯିବାକୁ ଅନୁମତି ଦେବେ କି ନାହିଁ ତାହା ସୁନିଶ୍ଚିନ୍ତ ହେବା ଅପେକ୍ଷାରେ ରହିଛନ୍ତି ।
କେନ୍ଦ୍ର ସରକାରଙ୍କ ହାତରେ ଟିମ୍ ଇଣ୍ଡିଆ ପାକିସ୍ତାନ ଯିବା ନିଷ୍ପତ୍ତି:
ବିସିସିଆଇ ସ୍ପଷ୍ଟ କରିଛି ଯେ, ଭାରତୀୟ ଦଳର ପାକିସ୍ତାନ ଗସ୍ତ ପ୍ରସଙ୍ଗରେ କେନ୍ଦ୍ର ସରକାରଙ୍କ ନୀତିଗତ ନିଷ୍ପତ୍ତିକୁ ମାନିବ । 2008 ମୁମ୍ବାଇ ଆତଙ୍କବାଦୀ ଆକ୍ରମଣ ପରଠାରୁ ଭାରତୀୟ ଦଳ ପାକିସ୍ତାନ ଗସ୍ତ କରିନାହିଁ । 2007 ପରଠାରୁ ଭାରତ ଓ ପାକିସ୍ତାନ ମଧ୍ୟରେ ଟେଷ୍ଟ ସିରିଜ ହୋଇନାହିଁ ।
