ବ୍ରହ୍ମପୁର: ଆଜି ଠାରୁ ଆରମ୍ଭ ହୋଇଛି ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ନାମାଙ୍କନ ଦାଖଲ ପ୍ରକ୍ରିୟା । ଏହି ପରିପ୍ରେକ୍ଷୀରେ ବ୍ରହ୍ମପୁର ବିଧାନସଭା କ୍ଷେତ୍ରରୁ ସ୍ୱାଧୀନ ପ୍ରାର୍ଥୀ ଭାବରେ ପ୍ରାର୍ଥୀପତ୍ର ଦାଖଲ କରିଛନ୍ତି ପୂର୍ବତନ ମେୟର ଶିବ ଶଙ୍କର ଦାଶ । ସହରର ଗୋଷାଇଁନୂଆଗାଁ ଅଞ୍ଚଳର ଅଧିଷ୍ଠାତ୍ରୀ ଦେବୀ ମା' କାଳୁଆଙ୍କ ମନ୍ଦିରରେ ପୂଜାର୍ଚ୍ଚନା କରିବା ପରେ ଶିବ ଶଙ୍କର ଏକ ବିରାଟ ଶୋଭାଯାତ୍ରା ନିଜର ଶକ୍ତି ପ୍ରଦର୍ଶନ କରିଛନ୍ତି ।
ବ୍ରହ୍ମପୁର ବିଧାନସଭା ଆସନରୁ ସ୍ବାଧୀନ ପ୍ରାର୍ଥୀ ଭାବରେ ପ୍ରାର୍ଥୀପତ୍ର ଦାଖଲ କରିଛନ୍ତି ବ୍ରହ୍ମପୁରର ପୂର୍ବତନ ମେୟର ଶିବ ଶଙ୍କର ଦାଶ । ଆଜି ଏକ ବିରାଟ ଶୋଭାଯାତ୍ରାରେ ଗୋଷାଇଁନୂଆଗାଁ ମା' କାଳୁଆ ମନ୍ଦିରରୁ ବାହାରି ଗୋଷାଣୀନୂଆଁଗାଁ, ବିଜିପୁର, ଖଲ୍ଲିକୋଟ କଲେଜ ଛକ, ସୁବାରାଓ ଛକ, ଟାଟାବେଞ୍ଚ ଛକ, କମାପଲ୍ଲୀ ଛକ ଏବଂ ଖୋଡାସିଙ୍ଗି ହୋଇ ସହର ପରିକ୍ରମା କରିଥିଲେ । ପରେ ଜିଲ୍ଲାର ସଦର ମହକୁମ୍ମା ଛତ୍ରପୁର ଠାରେ ନିଜର ସମର୍ଥକଙ୍କ ଗହଣରେ ପହଞ୍ଚିବା ପରେ ପ୍ରାର୍ଥୀପତ୍ର ଦାଖଲ କରିଥିଲେ ଶିବ ଶଙ୍କର । ପ୍ରାର୍ଥୀପତ୍ର ଦାଖଲ ସମୟରେ ଶିବ ଶଙ୍କର ବ୍ରହ୍ମପୁର ମହାନଗର ନିଗମର ମେୟର ରହିଥିବା ସମୟରେ ଯାହା ସହରର ବିକାଶ ହୋଇଥିଲା ଏହା ପରେ ସହରର ଆଉ ଆଖିଦୃଷ୍ଟିଆ ବିକାଶ ହୋଇନାହିଁ । ସହରବାସୀ ପୁଣିଥରେ ସେ ବିଜୟୀ ହୋଇ ଆସନ୍ତୁ ବୋଲି ଚାହୁଁଥିବା ଯୋଗୁଁ ସେ ଚଳିତଥର ସ୍ୱାଧୀନ ପ୍ରାର୍ଥୀ ହୋଇଥିବା କହିଛନ୍ତି ।
ତେବେ ଶିବ ଶଙ୍କର କହିଛନ୍ତି, "ମୋ ସହ ବ୍ରହ୍ମପୁର ସହରବାସୀଙ୍କ ସଂପୂର୍ଣ୍ଣ ଭାବରେ ସହଯୋଗ ରହିଛି । ସହରର ଅନେକ କାର୍ଯ୍ୟ ବାକି ରହିଥିବା ବେଳେ ସହରବାସୀ ଯଦି ମୋତେ ପୁଣି ଥରେ ବିଜୟୀ କରିବେ ତେବେ ପୂର୍ବରୁ ଯାହା କାମ କରିଥିଲେ ତାହାର 20 ଗୁଣ ଅଧିକା କାମ କରିବି । ସ୍ୱାଧୀନ ପ୍ରାର୍ଥୀ ଭାବରେ ନିର୍ବାଚନ ଲଢୁଛି । ଯଦି ମୋର ବିଜୟ ହେବ ତେବେ ତାହା ବ୍ରହ୍ମପୁର ବାସିନ୍ଦାଙ୍କର ବିଜୟ ହେବ । ନେତାଙ୍କ ପାଖକୁ ଜନତା ଯାଆନ୍ତି । କିନ୍ତୁ ମୁଁ ବିଜୟୀ ହେଲେ ଜନତାଙ୍କ ପାଖକୁ ଯିବି, ଜନତାଙ୍କୁ ମୋ ପାଖକୁ ଆସିବାକୁ ପଡିବ ନାହିଁ ।"
ଶିବ ଶଙ୍କର ଛତ୍ରପୁର ଠାରେ ପ୍ରାର୍ଥୀପତ୍ର ଦାଖଲ ସମୟରେ ତାଙ୍କ ସହିତ ଧର୍ମପତ୍ନୀ ଆଇନଜୀବୀ ଆଶା ଦାଶ, ଗଞ୍ଜାମ ଓକିଲ ସଙ୍ଘର ବରିଷ୍ଠ ଆଇନଜୀବୀ ଶିବନାରାୟଣ ସାହୁ, ଆଇନଜୀବୀ ସୁବ୍ରତ ସାହୁ ଏବଂ ସମସ୍ତ ପ୍ରସ୍ତାବକ ଓ ସମର୍ଥକ ଉପସ୍ଥିତ ରହିଥିଲେ । ସୂଚନା ଥାଉକି, ପୂର୍ବରୁ ଶିବ ଶଙ୍କର ବ୍ରହ୍ମପୁର ବିଧାନସଭାରୁ ବିଜେପି ଟିକେଟରେ ବିଧାୟକ ଏବଂ ତାଙ୍କ ପତ୍ନୀ ଆଶା ଦାଶ ମଧ୍ୟ ନିର୍ବାଚନରେ ସ୍ୱାଧୀନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦିତା କରିଥିବାର ନଜର ରହିଛି ।
ଇଟିଭି ଭାରତ, ବ୍ରହ୍ମପୁର
