ଭୁବନେଶ୍ବର: ରାଜ୍ୟରେ ବିଜେପି-ବିଜେଡି ମେଣ୍ଟ ଚର୍ଚ୍ଚା ମଧ୍ୟରେ କଂଗ୍ରେସ ଏକାକୀ କେନ୍ଦ୍ର ଓ ରାଜ୍ୟରେ କ୍ଷମତାରେ ଥିବା ଉଭୟ ଦଳକୁ ଟାର୍ଗେଟ କରି ନିର୍ବାଚନ ଲଢିବାକୁ ଯାଉଛି । ରାଜ୍ୟରେ ଦଳର ବର୍ତ୍ତମାନ 9ଜଣ ବିଧାୟକ ଓ ଜଣେ ମାତ୍ର ସାଂସଦ ରହିଛନ୍ତି । ଚଳିତ ନିର୍ବାଚନରେ ରାଜ୍ୟରେ 9ରୁ 90 ଆସନରେ ସଂଖ୍ୟା ପହଞ୍ଚିବାକୁ ଦଳ ଲକ୍ଷ୍ୟ ମଧ୍ୟ ରଖିଛି । ତେବେ ଯଦି ଉଭୟ ବିଜେପି ଓ ବିଜେଡି ମଧ୍ୟରେ ମଧ୍ୟରେ ମେଣ୍ଟ ହୁଏ, ତେବେ ଟିକେଟ ନପାଇ ଅନେକ ବିଦ୍ରୋହୀ ପ୍ରାର୍ଥୀ ସାମ୍ନାକୁ ଆସିବେ । ଏହାର ଫାଇଦା କଂଗ୍ରେସକୁ ହେବା ନେଇ ଦଳ ବେଶ ଆଶାବାଦୀ । ଦଳ ବିଦ୍ରୋହୀ ପ୍ରାର୍ଥୀଙ୍କୁ ସ୍ବାଗତ କରିବା ପାଇଁ ମଧ୍ୟ ପ୍ରସ୍ତୁତ ହୋଇଗଲାଣି ।
କଂଗ୍ରେସ ରାଜ୍ୟ ପ୍ରଭାରୀ ଅଜୟ କୁମାର କହିଛନ୍ତି, ‘‘ଯଦି ବିଜେଡି-ବିଜେପି ଭିତରେ ମେଣ୍ଟ ହୁଏ ଓ ସେହି କାରଣରୁ ବିଦ୍ରୋହୀ ପ୍ରାର୍ଥୀ କଂଗ୍ରେସ ମୁହାଁ ହୁଅନ୍ତି, ଆମେ ସେମାନଙ୍କୁ ସ୍ୱାଗତ କରିବୁ । ଏହା ଫଳରେ କଂଗ୍ରେସର 9ରୁ 90ମିଶନ ଆହୁରି ସହଜସାଧ୍ୟ ହେବ । ତେବେ ବିଦ୍ରୋହୀ ପ୍ରାର୍ଥୀଙ୍କୁ ଟିକେଟ ମିଳିବ କି ନାହିଁ ଏବେଠୁ ସ୍ପଷ୍ଟ କରିହେବ ନାହିଁ ।’’
ଅଜୟ କହିଛନ୍ତି,‘‘କେହି କଂଗ୍ରେସରେ ସାମିଲ ହେବାକୁ ଚାହିଁଲେ, ଆମେ ସ୍ବାଗତ କରିବୁ । ନିର୍ବାଚନ ପୂର୍ବରୁ କି ପରେ, ଆମେ ଭଲନେତାଙ୍କୁ ନିହାତି ଦଳରେ ସାମିଲ କରିବୁ । ବିଜେଡ଼ି ଓ ବିଜେପି ବିଦ୍ରୋହୀ ନେତାମାନେ କଂଗ୍ରେସରେ ସାମିଲ ହେବା ପରେ ଟିକେଟ ମିଳିବ କି ନାହିଁ ଏବେଠୁ କହିବା ସମ୍ଭବ ନୁହେଁ । କିନ୍ତୁ ସମସ୍ତଙ୍କୁ ସ୍ବାଗତ କରାଯିବ । ଏଭଳି ଚାଲିଲେ ଆମର ୯ରୁ ୯୦ମିଶନ ସଫଳ ହେବାରେ ଆହୁରି ସହଜ ହେବ ।’’
