ପୁରୀ: ରାଜ୍ୟରେ ପାଖେଇ ଆସୁଛି ନିର୍ବାଚନ । ଆସନ୍ତା 13 ତାରିଖରୁ ଓଡ଼ିଶାରେ ପ୍ରଥମ ପର୍ଯ୍ୟାୟ ମତଦାନ ଅନୁଷ୍ଠିତ ହେବାକୁ ଯାଉଛି । ଯାହା ପାଇଁ ରାଜ୍ୟରେ ଚାଲିଛି ନାମାଙ୍କନର ପର୍ବ । ତେବେ ସେହି କ୍ରମରେ ପୁରୀରେ ତୃତୀୟ ପର୍ଯ୍ୟାୟ ତଥା ମେ 25 ତାରିଖରେ ମତଦାନ ହେବାକୁ ଯାଉଛି । ଯାହା ପାଇଁ ପୁରୀ ଜିଲ୍ଲାରେ ଚାଲିଛି ନାମାଙ୍କନ ପତ୍ର ଦାଖଲ ପ୍ରକ୍ରିୟା । ସେହି ପରିପ୍ରେକ୍ଷୀରେ ଆଜି ପୁରୀ ଲୋକସଭା ପାଇଁ ବିଜେଡ଼ିର ପ୍ରାର୍ଥୀ ହୋଇଥିବା ଅରୁପ ପଟ୍ଟନାୟକ ତାଙ୍କର ନାମାଙ୍କନ ପତ୍ର ଦାଖଲ କରିଛନ୍ତି ।
ପୁରୀ ଜିଲ୍ଲା ନିର୍ବାଚନ ଅଧିକାରୀ ତଥା ପୁରୀ ଜିଲ୍ଲାପାଳଙ୍କ ନିକଟରେ ଅରୁପ ନିଜର ନାମାଙ୍କନ ପତ୍ର ଦାଖଲ କରିଛନ୍ତି । ନାମାଙ୍କନ ଭରିବା ପାଇଁ ଅରୁପ ତାଙ୍କ ସମର୍ଥକଙ୍କ ସହିତ ଯାଇଥିଲେ । ନାମାଙ୍କନ ଭରିବା ପରେ ଅରୁପ କହିଛନ୍ତି ଯେ ସେ ଜନସେବା ପାଇଁ ରାଜନୀତିକୁ ଆସିଛନ୍ତି । ସେ ଚାକିରି କରିଥିବା ବେଳେ ଜନସେବା କରୁଥିଲେ । ହେଲେ ସେ ଅବସର ପରେ ପ୍ରତ୍ୟକ୍ଷ ଭାବେ ରାଜନୀତିକୁ ଆସି ଜନସେବା ପାଇଁ ନିର୍ବାଚନ ଲଢ଼ୁଛନ୍ତି । ପୁରୀ ଲୋକସଭାବାସୀଙ୍କ ଉନ୍ନତି କରିବା ସହିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଜନ କଲ୍ୟାଣକାରୀ ଯୋଜନା କିଭଳି ଲୋକଙ୍କ ପାଖରେ ପହଞ୍ଚିପାରିବ ସେ ଦିଗ ପ୍ରତି ତାଙ୍କର ମୁଖ୍ୟ ଲକ୍ଷ୍ୟ ରହିବ । ସେ ସାରା ଜୀବନ ଲୋକଙ୍କ ସେବା ପାଇଁ ସମର୍ପିତ କରିବେ ବୋଲି ପ୍ରକାଶ କରିଛନ୍ତି ।
ପୁରୀ ପାଇଁ ଯେଉଁଭଳି କାର୍ଯ୍ୟ ମୁଖ୍ୟମନ୍ତ୍ରୀ କରିଛନ୍ତି ନିଶ୍ଚିତ ଭୋଟର ଏଥର ଶଙ୍ଖରେ ଭୋଟ ଦେଇ ପୁଣିଥରେ ବିଜେଡ଼ିକୁ ଜିତାଇବା ପାଇଁ ବେଶ ଆଶାବାଦୀ ଥିବା ଅରୁପ ପ୍ରକାଶ କରିଛନ୍ତି । ଜନତା ନବୀନଙ୍କୁ ଭୋଟ ଦେଇ ତାଙ୍କ ହାତ ମୁଠାକୁ ପୁଣି ଟାଣ କରିବେ ବୋଲି ଅରୁପ କହିଛନ୍ତି । ତେବେ ନାମାଙ୍କନ ପତ୍ର ଦାଖଲ ପୂର୍ବରୁ ଅରୁପ ପୁରୀ ବଡ ଦାଣ୍ଡରେ ଏକ ରୋଡ ଶୋ' କରିଥିଲେ । ହଜାର ହଜାର ବିଜେଡି କର୍ମୀ ଓ ନେତାଙ୍କ ସହ ଶୋଭାଯାତ୍ରାରେ ଆସି ପୁରୀ ଜିଲ୍ଲାପାଳଙ୍କ ଅଫିସରେ ପହଞ୍ଚିଥିଲେ । ଏହି କାର୍ଯ୍ୟକ୍ରମରେ ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ ମଧ୍ୟ ଯୋଗ ଦେଇଥିଲେ । ସେ ନିଜ ପ୍ରତିକ୍ରିୟା ରଖି କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ୱଚ୍ଛ ନିର୍ମଳ ଶାସନ ପାଇଁ ଓଡ଼ିଶାବାସୀ ନବୀନ ପଟ୍ଟନାୟକଙ୍କୁ ଦିର୍ଘ 25 ବର୍ଷ ହେବ ଆଶୀର୍ବାଦ ଦେଇ ଆସିଛନ୍ତି । ପୁଣି ଚଳିତ ନିର୍ବାଚନରେ ଲୋକେ ବିଜେଡିକୁ ବିପୁଳ ଭୋଟ ଦେଇ ଜନାଦେଶ ଦେବେ ବୋଲି ବିଜେଡ଼ି ସାଂସଦ ଶୁଭାଶିଷ ଖୁଣ୍ଟିଆ କହିଛନ୍ତି ।
ଇଟିଭି ଭାରତ, ପୁରୀ
