ଭୁବନେଶ୍ବର: କ୍ୟାପିଟାଲ ଥାନା ୬ ନମ୍ବରରେ ରାଜନୈତିକ ହିଂସା ମାମଲାରେ ବିଜେପିର ସାମ୍ବାଦିକ ସମ୍ମିଳନୀ । ୬ନମ୍ବରର ୪୬ନମ୍ବର ଓ୍ବାର୍ଡର ବିଜେପି କର୍ପୋରେଟର ପ୍ରାର୍ଥିନୀ ମମତା ମଲିକ ଏଥର ବିଧାନସଭା ନିର୍ବାଚନ ପାଇଁ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରୁଥିଲେ । ସେହି ସମୟରେ ଆଖଣ୍ଡଳମଣି ବସ୍ତି ନିକଟରେ ଦୁଇ ଗୋଷ୍ଠୀ ମୁହାଁମୁହିଁ ହୋଇଥିଲେ। ଯାହା ପରେ ସେ ଘଟଣା ଉଗ୍ର ରୂପ ନେଇଥିଲା। ଏହି ଘଟଣାକୁ ନେଇ ବିଜେପି ମଧ୍ୟରେ ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନ ଓ ତାଙ୍କ ସମର୍ଥକ ଥାନାରେ ଏନେଇ ଅଭିଯୋଗ ଆଣିଥିଲେ। ଯାହାକୁ ନେଇ ଆଜି ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନ ଏକ ସାମ୍ବାଦିକ ସମ୍ମିଳନୀର ଆୟୋଜନ କରି, ଘଟଣା ସମ୍ପର୍କରେ ସୂଚନା ଦେଇଛନ୍ତି ।
ଜଗନ୍ନାଥ ପ୍ରଧାନ କହିଛନ୍ତି ଯେ, ବିଜେପି କର୍ମୀ ଓ ଭୋଟରଙ୍କୁ ଆକ୍ରମଣ ଓ ଭୟଭୀତ କରି ନିର୍ବାଚନ ଜିତିବାକୁ ବିଜେଡି ଯୋଜନା କରିଛି । ହାରିବା ଭୟରେ ବିଜେପି କର୍ମୀ ଓ ଭୋଟରଙ୍କୁ ଆକ୍ରମଣ କରାଯାଉଛି । ତେବେ ବିଜେଡି ବିରୋଧରେ ଅଭିଯୋଗ ଆଣି ଜଗନ୍ନାଥ ପ୍ରଧାନ କହିଛନ୍ତି "ଗତକାଲି ୟୁନିଟ ୬ ଅଞ୍ଚଳରେ ବିଜେପି କାର୍ଯ୍ୟକର୍ତ୍ତାଙ୍କୁ ସ୍ଥାନୀୟ କର୍ପୋରେଟରଙ୍କ ସ୍ୱାମୀ ତଥା ବିଜେଡି ନେତା ମଧୁ ରେଡ୍ଡୀ ଓ ଲିଙ୍ଗା ରେଡ୍ଡୀ ନାମକ ଅସାଧୁ ଯୁବକ ଆକ୍ରମଣ କରି ପ୍ରଚାର ବନ୍ଦ କରିବାକୁ କହିଲେ । ଜାତିଆଣ ମନ୍ତବ୍ୟ ଦେଇ ମାଡ଼ ମାରିଲେ । ଆଉ ଏହି ସବୁ ଘଟଣାକୁ ନେଇ ଅଭିଯୋଗ କରିବାରୁ ପୋଲିସ କହିଲା ଉଭୟ ପକ୍ଷକୁ ଗିରଫ କରାଯିବ । ଅଭିଯୋଗ କରିବାକୁ ଯାଇଥିବା ପକ୍ଷ ମଧ୍ୟ ଗିରଫ ହେବ।"
ତେବେ ପୋଲିସର ଏହି ମନ୍ତବ୍ୟ ହିଁ ସ୍ପଷ୍ଟ କରୁଛି ପୋଲିସ କିଭଳି ଭାବେ ଶାସକ ଦଳର ଏଜେଣ୍ଟ ହୋଇ କାର୍ଯ୍ୟ କରୁଛି ଅର୍ଥାତ ପୋଲିସର ସମ୍ପୂର୍ଣ୍ଣ ସହଯୋଗ ଶାସକ ଦଳ ପ୍ରତି ରହୁଥିବା ଅଭିଯୋଗ କରିଛନ୍ତି ଜଗନ୍ନାଥ । ସେ ଆହୁରୀ ମଧ୍ୟ କହିଛନ୍ତି "ଏଥିରୁ ସ୍ପଷ୍ଟ ଅନୁମେୟ କି ପୋଲିସ ସହାୟତାରେ ନିର୍ବାଚନ ଜିତିବାକୁ ବିଜେଡି ରଣନୀତି କରୁଛି । ଏହାସହ ମଧୁ ରେଡ୍ଡୀଙ୍କ ପାଖେ ବନ୍ଧୁକ ଅଛି । ସେ ବନ୍ଧୁକ ଦେଖାଇ ଭୋଟରଙ୍କୁ ଭୟଭୀତ କରୁଛନ୍ତି । ନୟାପଲ୍ଲୀରେ କିଛି ଦିନ ପୂର୍ବରୁ ବିଜେପି କର୍ମୀଙ୍କୁ ଆକ୍ରମଣ ହୋଇଥିଲା ।" ତେବେ ନିର୍ବାଚନ ହିଂସା ଓ ଆକ୍ରମଣ ରାଜନୀତିରୁ ବିଜେଡି ବାଦ ରହୁ ବୋଲି ଚେତାବନୀ ଦେଇଛି ବିଜେପି । ଏହାସହ ନିର୍ବାଚନୀ ହିଂସାରେ ସାମିଲ ବିଜେଡିର ନେତା ଓ କର୍ମୀଙ୍କ ହିଂସାତ୍ମକ ଘଟଣାକୁ ସଠିକ ତଦନ୍ତ କରାଯାଇ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ପୋଲିସ କମିଶନର ଓ ପୋଲିସ ଡ଼ିଜିଙ୍କୁ ଅନୁରୋଧ କରିଛି ବିଜେପି ।
ଇଟିଭି ଭାରତ, ଭୁବନେଶ୍ବର
