ଭୁବନେଶ୍ବର: ରାତି ପାହିଲେ ରାଜ୍ୟରେ ପଡ଼ିବ ତୃତୀୟ ପର୍ଯ୍ୟାୟ ଭୋଟ । ଏଥିପାଇଁ ଜାରି ରହିଥିବା ଜୋରଦାର ପ୍ରଚାର ଥମିଯାଇଛି । ତେବେ ଚତୁର୍ଥ ପର୍ଯ୍ୟାୟ ନିର୍ବାଚନ ପୂର୍ବରୁ ପ୍ରଚାର ପାଇଁ ଭାରତୀୟ ଜନତା ପାର୍ଟି ପକ୍ଷରୁ ଅନେକ କେନ୍ଦ୍ରୀୟ ନେତୃତ୍ବଙ୍କ ଗସ୍ତ କାର୍ଯ୍ୟକ୍ରମ ରହିଛି । 'ଓଡ଼ିଶାରେ ଏଥର ବିଜେପି ସରକାର' ନାରା ସହ ବିଜେପିର ସ୍ବତନ୍ତ୍ର ଫୋକସରେ ଓଡିଶା ଥିବାବେଳେ ପ୍ରଧାନମନ୍ତ୍ରୀଙ୍କ ଠାରୁ ଆରମ୍ଭ କରି ବିଭିନ୍ନ କେନ୍ଦ୍ରମନ୍ତ୍ରୀ ଓ ଦଳର ଶୀର୍ଷ ନେତୃବୃନ୍ଦଙ୍କ ଓଡ଼ିଶାରେ ମାରାଥନ ପ୍ରଚାର ଜାରି ରହିଛି । ଏହି ପରିପ୍ରେକ୍ଷୀରେ ଓଡିଶା ଗସ୍ତରେ ଆସୁଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ଓଡ଼ିଶାରେ ପହଞ୍ଚି ସୁଭଦ୍ରା ଯୋଜନାର ପ୍ରଚାର କରିବେ ସ୍ମୃତି ଇରାନୀ । ପାରାଦ୍ବୀପର କୁଜଙ୍ଗ, କେନ୍ଦ୍ରାପଡାର ଆଳି, ବାଲେଶ୍ବରର ରେମୁଣା ଠାରେ ସାଧାରଣ ସଭାରେ ଯୋଗଦେଇ ଲୋକଙ୍କୁ କରିବେ ସମ୍ବୋଧିତ ।
ଏନେଇ ସୂଚନା ଦେବା ସମୟରେ ରାଜ୍ୟ ବିଜେପି ଉପସଭାପତି ଗୋଲକ ମହାପାତ୍ର କହିଛନ୍ତି, "ଦୁଇଟି ପର୍ଯ୍ୟାୟ ନିର୍ବାଚନ ସରିଛି । ନିର୍ବାଚନ ପରେ ଲୋକଙ୍କ ସହ ଆଲୋଚନା ପରେ ଯାହା ଜଣାପଡିଛି ୯୦ ପ୍ରତିଶତ ସ୍ଥାନରେ ଭରତୀୟ ଜନତା ପାର୍ଟିର ବହୁମତ ରହିଛି । ଓଡ଼ିଶାବାସୀଙ୍କ ପାଇଁ ଯାହା ଖୁସି ଖବର । ଭାରତୀୟ ଜନତା ପାର୍ଟି ମାଆ ମାନଙ୍କ ପାଇଁ ସୁଭଦ୍ରା ଯୋଜନା କରିଛି । ଯେଉଁ ଯୋଜନା ମାଧ୍ୟମରେ ଭରତୀୟ ଜନତା ପାର୍ଟି ସରକାରକୁ ଆସିଲେ ମାଆ ମାନଙ୍କୁ ମିଳିବ ୫୦ ହଜାର ଟଙ୍କା ଦିଆଯିବ । ସବୁ ମାଆମାନଙ୍କ ପାଖକୁ ୫୦ ହଜାର ଟଙ୍କା ଲେଖାଏଁ ଯିବ ବା ମହିଳାଙ୍କୁ ୫୦ ହଜାର ଟଙ୍କାର ଭାଉଚର ମିଳିବ । ବିଜୁ ଜନତା ଦଳ ସରକାର ମିଶନ ଶକ୍ତି ମାଆ ମାନଙ୍କୁ ଶସକ୍ତ କରିବାରେ ବିଫଳ ହୋଇଛି । ଏହାକୁ ଅଟଳ ବିହାରୀ ବାଜପେୟୀ ଆରମ୍ଭ କରିଥିଲେ । ମାଆ ମାନଙ୍କ ନାଁରେ ଏଠାରେ ବାବୁମାନେ ଲୁଟିଲେ, ମାଆ ମାନଙ୍କୁ ସ୍ବାବଲମ୍ବୀ କରିପାରିଲେ ନାହିଁ ।"
ତେଣୁ ମୋଦି ସରକାର ଆଣିଥିବା ଏହି ସୁଭଦ୍ରା ଯୋଜନାର ପ୍ରଚାର କରିବା ପାଇଁ ଆସନ୍ତାକାଲି ସ୍ମୃତି ଇରାନୀ ଆସୁଛନ୍ତି ବୋଲି ସୂଚନା ଦେଇଛନ୍ତି ଗୋଲକ ମହାପାତ୍ର । ସେ କହିଛନ୍ତି, "ପାରାଦ୍ବୀପ, କୁଜଙ୍ଗ, ଆଳି, ରେମୁଣାଠାରେ ସାଧାରଣ ସଭାରେ ଯୋଗ ଦେଇ ଲୋକଙ୍କୁ ସମ୍ବୋଧନ କରିବା ସହ ଯୋଜନାର ପ୍ରଚାର ପ୍ରସାର କରିବେ ସ୍ମୃତି ଇରାନୀ । ବିଜେପି ସପକ୍ଷରେ ଲୋକଙ୍କୁ ଭୋଟ ଭିକ୍ଷା କରିବେ । ବିଶେଷ କରି ଫୋକସରେ ରହିବେ ମହିଳା ଭୋଟର । ଏଥିସହ ସମସ୍ତ ଲୋକସଭାରେ ସେ ସଭା କରି ମାଆ ମାନଙ୍କୁ ଏ ସମ୍ବନ୍ଧରେ ବୁଝାଇବେ । ଓଡ଼ିଶାର କୋଣ ଅନୁକୋଣରେ ତାଙ୍କ ଗସ୍ତ ନିଶ୍ଚିତ ଭାବେ ପ୍ରଭାବ ପକାଇବ । ସ୍ମୃତି ଇରାନୀଙ୍କ ଏହି ଗସ୍ତ ଭରତୀୟ ଜନତା ପାର୍ଟିକୁ ୪ର୍ଥ ପର୍ଯ୍ୟାୟ ନିର୍ବାଚନରେ ସହାୟକ ହେବ । ଓଡ଼ିଶାରେ ସୁଭଦ୍ରା ଯୋଜନାକୁ କ୍ରିୟାଶୀଳ କରାଇବାରେ ଏହା ସାହାଯ୍ୟ କରିବ । ଏହି ଗସ୍ତ ଭରତୀୟ ଜନତା ପାର୍ଟିକୁ ଏଠି ପୂର୍ଣ୍ଣ ବହୁମତରେ ସରକାର ଗଢ଼ିବା ପାଇଁ ସହାୟକ ହେବ ।"
ଇଟିଭି ଭାରତ, ଭୁବନେଶ୍ବର
