ଭଦ୍ରକ: ମତଦାନର ତାରିଖ ପାଖେଇ ଆସୁଥିବା ବେଳେ ବଢିବାରେ ଲାଗିଛି ରାଜନୈତିକ ଉଷ୍ମତା । ପ୍ରାର୍ଥୀଙ୍କ ଭାଷଣବାଜିରେ କମ୍ପୁଛି ପ୍ରଚାର ମୈଦାନ । ଆଗାମୀ ଜୁନ ୧ ତାରିଖରେ ହେବ ରାଜ୍ୟରେ ଚତୁର୍ଥ ତଥା ଶେଷ ପର୍ଯ୍ୟାୟ ମତଦାନ । ରାଜ୍ୟରେ ଯେଉଁ କେତୋଟି ଅଣକଂଗ୍ରେସ ଗଡ଼ ଭାବେ ଲୋକସଭା ନିର୍ବାଚନମଣ୍ଡଳୀ ରହିଛି ସେଥିମଧ୍ୟରୁ ଭଦ୍ରକ ଅନ୍ୟତମ । ସମ୍ମାନଜନକ ଭଦ୍ରକ ଲୋକସଭା ଆସନ ପାଇଁ ବାଜି ସାରିଛି ରଣଭେରୀ । ସଂରକ୍ଷିତ ହୋଇଥିବା ଏହି ଆସନରେ ଏଥର ଦେଖିବାକୁ ମିଳିବ ତ୍ରିମୁଖୀ ଲଢେଇ । ବିଜେଡିର ଅଭେଦ୍ୟ ଗଡ଼ ଭାବେ ଏହି ଆସନ ରହିଥିବା ବେଳେ ଏହାକୁ ହାତେଇବା ଲକ୍ଷ୍ୟରେ ଅଛନ୍ତି ବିଜେପି ଓ କଂଗ୍ରେସ । ବିଜେଡି ଏବଂ ବିଜେପି ଭଦ୍ରକ ସଂସଦୀୟ ଆସନ ପାଇଁ ପ୍ରାର୍ଥୀ ରିପିଟ କରିଥିବା ବେଳେ ଭେଟେରାନଙ୍କ ଉପରେ ଭରସା କରିଛି କଂଗ୍ରେସ । ବିଜେଡିର ପାରମ୍ପରିକ ଆସନରେ ଏଥର ଦଳ ପୁଣି ଥରେ ମଞ୍ଜୁଲତା ମଣ୍ଡଳଙ୍କୁ ଟିକଟ ଦେଇ ମହିଳା କାର୍ଡ ଖେଳିଥିବା ବେଳେ କଂଗ୍ରେସ ପୂର୍ବତନ ସାଂସଦ ଅନନ୍ତ ପ୍ରସାଦ ସେଠୀଙ୍କୁ ପ୍ରାର୍ଥୀ କରିଛି । ସେହିଭଳି ବିଜେପି ମଧ୍ୟ ହେଭିୱେଟ ଅର୍ଜୁନ ଚରଣ ସେଠୀଙ୍କ ପୁଅ ଅଭିମନ୍ୟୁ ସେଠୀଙ୍କୁ ପୁଣି ଥରେ ମୈଦାନକୁ ଓହ୍ଲାଇଛି । ଆସନ୍ତୁ ନଜର ପକାଇବା କଣ ରହିଛି ଭଦ୍ରକ ଲୋକସଭାର ରାଜନୈତିକ ସମୀକରଣ ।
ଭଦ୍ରକ ଲୋକସଭା ନିର୍ବାଚନ ମଣ୍ଡଳୀ: ୧୯୫୩ ମସିହାରୁ ଗଠିତ ଭଦ୍ରକ ଲୋକସଭା ନିର୍ବାଚନ ମଣ୍ଡଳୀ ମଧ୍ୟରେ ଭଦ୍ରକ ଜିଲ୍ଲାର ଭଣ୍ଡାରୀପୋଖରୀ, ଭଦ୍ରକ, ବାସୁଦେବପୁର, ଧାମନଗର ଓ ଚାନ୍ଦବାଲି ରହିଥିବା ବେଳେ ବାଲେଶ୍ବର ଜିଲ୍ଲାର ସୋର ଓ ସିମୁଳିଆ ବିଧାନସଭା ଆସନ ରହିଛି । ଏହି ଆସନରେ ବରିଷ୍ଠ ନେତା ଅର୍ଜୁନ ଚରଣ ସେଠୀ ଏଠାରେ ରେକର୍ଡ ସଂଖ୍ୟକ ୮ ଥର ସାଂସଦ ଭାବେ ନିର୍ବାଚିତ ହୋଇଛନ୍ତି । ଏହି ଲୋକସଭା ନିର୍ବାଚନ ମଣ୍ଡଳୀରେ ମୋଟ ଭୋଟରଙ୍କ ସଂଖ୍ୟା ୧୭ ଲକ୍ଷ ୪୮ ହଜାର ୯୦ ରହିଛି । ସେଥିମଧ୍ୟରୁ ପୁରୁଷ ଭୋଟରଙ୍କ ସଂଖ୍ୟା ୮ ଲକ୍ଷ ୯୯ ହଜାର ୨୮୯ ଥିବା ବେଳେ ମହିଳା ଭୋଟରଙ୍କ ସଂଖ୍ୟା ୮ ଲକ୍ଷ ୪୮ ହଜାର ୬୩୧ ରହିଛି । ସେହିପରି ତୃତୀୟ ଲିଙ୍ଗୀ ଭୋଟରଙ୍କ ସଂଖ୍ୟା ୧୭୦ ରହିଛି । ଗତ ଦୁଇ ଦଶନ୍ଧି ଧରି ଏହି ଆସନଟି ବିଜେଡି କବଜାରେ ରହିଥିବା ବେଳେ କଂଗ୍ରେସ ୧୯୯୬ରେ ଶେଷ ଥର ପାଇଁ ବିଜୟୀ ହୋଇଥିଲା ।
୨୦୨୪ ନିର୍ବାଚନର ପ୍ରାର୍ଥୀଙ୍କ ପ୍ରୋଫାଇଲ :
ବିଜେଡି: ଭଦ୍ରକ ଲୋକସଭା ଆସନଟି ବିଜେଡିର ଅଜେୟ ଦୁର୍ଗ ଭାବେ ପରିଚିତ । ୧୯୯୮, ୧୯୯୯, ୨୦୦୪, ୨୦୦୯ ଓ ୨୦୧୪ରେ ବିଜେଡି ପ୍ରାର୍ଥୀ ଅର୍ଜୁନ ଚରଣ ସେଠୀ ଏବଂ ୨୦୧୯ରେ ପ୍ରଥମ ମହିଳା ସାଂସଦ ଭାବେ ବିଜେଡିର ମଞ୍ଜୁଲତା ମଣ୍ଡଳ ବିଜୟୀ ହୋଇଥିଲେ । ଏଥର ମଧ୍ୟ ଦଳ ମଞ୍ଜୁଲତାଙ୍କୁ ରିପିଟ କରିଛି । ଗୃହିଣୀରୁ ସକ୍ରିୟ ରାଜନୀତିକୁ ଆସିଥିବା ପତ୍ନୀ ମଞ୍ଜୁଲତାଙ୍କୁ ଭଦ୍ରକ ସଂସଦୀୟ ରାଜନୀତିରେ ପ୍ରତିଷ୍ଠା କରିବା କ୍ଷେତ୍ରରେ ସ୍ବାମୀ ତଥା ପୂର୍ବତନ ଧାମନଗର ବିଧାୟକ ମୁକ୍ତିକାନ୍ତ ମଣ୍ଡଳଙ୍କ ଭୂମିକା କୌଣସି ଗୁଣରେ କମ ନୁହେଁ । ଏପରି ସ୍ଥଳେ ମଣ୍ଡଳ ଦମ୍ପତି ଏବେ ଭଦ୍ରକ ସଂସଦୀୟ କ୍ଷେତ୍ରର ବିଭିନ୍ନ ବିଧାନସଭା ନିର୍ବାଚନମଣ୍ଡଳୀକୁ ଯାଇ ସେଠାକାର ଦଳୀୟ ବିଧାୟକ ପ୍ରାର୍ଥୀ ମାନଙ୍କୁ ସାଙ୍ଗରେ ନେଇ ପ୍ରଚାରକୁ ଜୋରଦାର କରିଛନ୍ତି । ବିଜେଡି ପ୍ରାର୍ଥୀ ମଞ୍ଜୁଲତା କହିଛନ୍ତି , 'ଭଦ୍ରକର ବିଭିନ୍ନ ସମସ୍ୟାକୁ ବିଭିନ୍ନ ସମୟରେ ସଂସଦରେ ଉପସ୍ଥାପନା କରିଛି । ଆଖୁଆପଦା ଠାରୁ ମାର୍କୋଣା ବାହାନଗା ଯାଏଁ ଏନଏଚ ଉପରେ ଓଭରବ୍ରିଜ କରିଛି । ଭଦ୍ରକ ଷ୍ଟେସନର ଉନ୍ମନତୀକରଣ କରାଯାଇଛି । ଧାମନଗରରେ ଏକ ଟେକ୍ସଟାଇଲ ଶିଳ୍ପକେନ୍ଦ୍ର ପ୍ରତିଷ୍ଠା ପାଇଁ ଯୋଜନା ରହିଛି । ସବୁ ସମୟରେ ସାଧାରଣ ଲୋକଙ୍କ ସହିତ ରହିଛୁ ।' ମୁଖ୍ୟମନ୍ତ୍ରୀଙ୍କ ବିକାଶମୂଳକ କାମ ତଥା ଗତ ୫ ବର୍ଷରେ ଗମନାଗମନ , ରେଳ ବିକାଶ ଓ ଶିଳ୍ପାୟନକୁ ଅସ୍ତ୍ର କରି ପୁଣି ଥରେ ବିଜୟୀ ହେବେ ବୋଲି ଆଶା ପ୍ରକଟ କରିଛନ୍ତି ମଞ୍ଜୁଲତା ।
କଂଗ୍ରେସ: ଭେଟେରାନ ନେତା ଅନନ୍ତ ପ୍ରସାଦ ସେଠୀଙ୍କୁ କଂଗ୍ରେସ ନିଜର ପ୍ରାର୍ଥୀ କରିଛି । ଅନନ୍ତ ସେଠୀଙ୍କ ରାଜନୈତିକ ଦୃଶ୍ୟପଟ ଦୃଷ୍ଟି ହେଲେ 1984 ମସିହା ନିର୍ବାଚନରେ ଭଦ୍ରକ ଲୋକସଭା ଆସନରୁ ବିଜୟୀ ହୋଇଥିବା ବେଳେ, 1989, 2009 ନିର୍ବାଚନରେ ସାଂସଦ ପ୍ରାର୍ଥୀ ଭାବେ ପରାଜୟ ବରଣ କରିଥଲେ । 1996 ରୁ 2002 ଯାଏଁ ରାଜ୍ୟସଭା ସାଂସଦ ମନୋନୀତ ହୋଇଥିବା ବେଳେ 2004 ମସିହା ଭଣ୍ଡାରିପୋଖରୀ ସଂରକ୍ଷିତ ଆସନରୁ କଂଗ୍ରେସ ଦଳରୁ ବିଜୟୀ ହୋଇଥିଲେ। ତେବେ ତାଙ୍କର ଅଭିଜ୍ଞତା ଏବଂ ବରିଷ୍ଠତାକୁ ନେଇ କଂଗ୍ରେସ ଦଳ ତାଙ୍କୁ ପ୍ରାର୍ଥୀ କରିଛି । ଭଦ୍ରକ ଲୋକସଭା ଅନ୍ତର୍ଗତ ଗୋଟିଏ ବି ଆସନରେ କଂଗ୍ରେସ କୌଣସି ବି ବିଧାୟକ ନାହାଁନ୍ତି । ଅନନ୍ତ ପ୍ରସାଦ ସେଠୀ ଭଦ୍ରକର ବିକାଶରେ ରାଜ୍ୟ ଓ କେନ୍ଦ୍ର ସରକାରଙ୍କ ବିଫଳତା ସହ ଶିକ୍ଷା, ସ୍ବାସ୍ଥ୍ୟ ଓ ନିଯୁକ୍ତି ଭଳି ସମସ୍ୟାକୁ ପ୍ରସଙ୍ଗ କରି ଭୋଟ ଭିକ୍ଷା କରିବାକୁ ଲକ୍ଷ୍ୟ ରଖିଛନ୍ତି । ସେ କହିଛନ୍ତି , 'କଂଗ୍ରେସ ଶାସନ ସମୟରେ ଭଦ୍ରକର ବିକାଶ ହୋଇଥିଲା, ଯାହା ଏବେ ଠପ୍ ହୋଇ ପଡିଛି । ଧାମରା ବନ୍ଦରରେ ଏବେ ଆଦାନୀ କମ୍ପାନୀର କର୍ତ୍ତୃତ୍ବ ସତ୍ତ୍ବେ ଭଦ୍ରକ ଯୁବବର୍ଗ ଆଜି ବେରୋଜଗାର । ମେଡିକାଲ କଲେଜ ଦାବିକୁ ନେଇ ଭଦ୍ରକ ଜିଲ୍ଲା ଆଜି ଉପେକ୍ଷିତ । ସମସ୍ତ ପୁରାତନ କଲେଜକୁ ବିଶ୍ବବିଦ୍ୟାଳୟରେ ରୂପାନ୍ତର କରାଯାଉଥିବା ବେଳେ ଭଦ୍ରକ କଲେଜ ଏଥିରୁ ବାଦ ପଡିଛି । କଂଗ୍ରେସ ନିଜର ମେନିଫେଷ୍ଟୋ ଅନୁସାରେ ରାଜ୍ୟ ତଥା ଭଦ୍ରକର ବିକାଶ ପାଇଁ କାମ କରିବାକୁ ପ୍ରତିଶୃତିବଦ୍ଧ ହୋଇଛି ।'
ବିଜେପି: ଏହି ଆସନ ପାଇଁ ବିଜେପି ପୁଣି ଥରେ ଅଭିମନ୍ୟୁ ସେଠୀଙ୍କୁ ପ୍ରାର୍ଥୀ କରିଛି । ଗତ ନିର୍ବାଚନରେ ଏହି ଆସନକୁ ଅଳ୍ପକେ ହାତଛଡ଼ା କରିଥିବା ଅଭିମନ୍ୟୁ ସେଠୀ ଏଥର ବିଜୟ ପାଇଁ ଅଣ୍ଟା ଭିଡିଛନ୍ତି । ପିତା ଅର୍ଜୁନ ସେଠୀଙ୍କ ଲିଗାସି ଏବଂ ମୋଦିଙ୍କ ଲହରୀକୁ ଆଧାର କରି ଚଳିତ ଥର ସେ ନିର୍ବାଚନ ବୈତରଣୀ ପାର ହେବାକୁ ଲକ୍ଷ୍ୟ ରଖିଛନ୍ତି । ଅଞ୍ଚଳର ମୌଳିକ ସମସ୍ୟା ପ୍ରତି ରାଜ୍ୟ ସରକାରଙ୍କ ସ୍ଥାଣୁତାକୁ ମୁଦ୍ଦା କରିବା ସହ ବିକଶିତ ଭାରତ ଓ ମୋଦି ଗ୍ୟାରେଣ୍ଟି ଆଧାରରେ ଜନମତ ଏକାଠି କରିବାକୁ ଲକ୍ଷ୍ୟ ରଖିଛନ୍ତି ବିଜେପି ପ୍ରାର୍ଥୀ ଅଭିମନ୍ୟୁ । ଅଭିମନ୍ୟୁ କହିଛନ୍ତି,' ବିଜେପିର ମୁଦ୍ଦା ସ୍ପଷ୍ଟ ରହିଛି । ୨୦୪୭ ସୁଦ୍ଧା ଭାରତକୁ ବିକଶିତ ଭାରତ କରାଯିବାର ଯୋଜନା ରହିଛି । ଗତ ୨୪ ବର୍ଷ ଧରି ଶାସନ ରେ ଥିବା ବିଜେଡି ସରକାର ଭଦ୍ରକ ଅଞ୍ଚଳରେ ପିଇବା ପାଣି ଅଭାବ, ବିପର୍ଯ୍ୟସ୍ତ ସ୍ବାସ୍ଥ୍ୟ ସେବା ଓ ଶିକ୍ଷା ବ୍ୟବସ୍ଥାକୁ ଲକ୍ଷ୍ୟ କଲେ ଜଣାଯାଏ ଯେ ସରକାରଙ୍କର କାର୍ଯ୍ୟ କରିବା ଶୈଳୀରେ ତୃଟି ରହିଛି । ଏହି ଆସନରେ ପରିବର୍ତ୍ତନର ଆବଶ୍ୟକତା ରହିଛି । ଏହି ଆସନରେ ବିଜେପି ଭଲ ସ୍ଥିତିରେ ରହିଛି।'
ପୂର୍ବ ନିର୍ବାଚନ ଫଳାଫଳ:
୨୦୧୯ ଲୋକସଭା ନିର୍ବାଚନ:
୨୦୧୯ରେ ବିଜେଡି ପ୍ରାର୍ଥୀ ମଞ୍ଜୁଲତା ମଣ୍ଡଳ ନିଜର ନିକଟତମ ପ୍ରାର୍ଥୀ ବିଜେପିର ଅଭିମନ୍ୟୁ ସେଠୀଙ୍କୁ ୨୮ ହଜାର ୭୯୧ ଖଣ୍ଡ ଭୋଟରେ ହରାଇଥିଲେ । ମଞ୍ଜୁଲତା ୫ ଲକ୍ଷ ୧୩ ହଜାର ୪୫ ଖଣ୍ଡ ଭୋଟ ଓ ଅଭିମନ୍ୟୁ ୪ ଲକ୍ଷ ୮୪ ହଜାର ୨୫୪ ଖଣ୍ଡ ଭୋଟ ପାଇଥିଲେ । ସେହିପରି କଂଗ୍ରେସ ପ୍ରାର୍ଥୀ ମଧୁସ୍ମିତା ସେଠୀ ୨ ଲକ୍ଷ ୭ ହଜାର ୭୧୦ ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଥିଲେ ।
୨୦୧୪ ଲୋକସଭା ନିର୍ବାଚନ:
୨୦୧୪ରେ ବିଜେଡି ପ୍ରାର୍ଥୀ ଅର୍ଜୁନ ଚରଣ ସେଠୀ ନିଜର ନିକଟତମ ପ୍ରାର୍ଥୀ କଂଗ୍ରେସର ସଂଗ୍ରାମ କେଶରୀ ଜେନାଙ୍କୁ ୧ଲକ୍ଷ ୭୯ ହଜାର ୩୫୯ ଖଣ୍ଡ ଭୋଟରେ ହରାଇଥିଲେ । ଅର୍ଜୁନ ୫ ଲକ୍ଷ ୨ ହଜାର ୩୩୮ ଖଣ୍ଡ ଭୋଟ ଓ ସଂଗ୍ରାମ ୩ ଲକ୍ଷ ୨୨ ହଜାର ୯୭୯ ଖଣ୍ଡ ଭୋଟ ପାଇଥିଲେ । ସେହିପରି ବିଜେପି ପ୍ରାର୍ଥୀ ଶରତ ଦାଶ ୨ ଲକ୍ଷ ୧୬ ହଜାର ୬୧୭ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଥିଲେ ।
୨୦୦୯ ଲୋକସଭା ନିର୍ବାଚନ:
୨୦୦୯ରେ ବିଜେଡି ପ୍ରାର୍ଥୀ ଅର୍ଜୁନ ଚରଣ ସେଠୀ ନିଜର ନିକଟତମ ପ୍ରାର୍ଥୀ କଂଗ୍ରେସର ଅନନ୍ତ ପ୍ରସାଦ ସେଠୀଙ୍କୁ ୫୪ ହଜାର ୯୩୮ ଖଣ୍ଡ ଭୋଟରେ ହରାଇଥିଲେ । ଅର୍ଜୁନ ୪ ଲକ୍ଷ ୧୬ ହଜାର ୮୦୮ ଖଣ୍ଡ ଭୋଟ ଓ ଅନନ୍ତ ୩ ଲକ୍ଷ ୬୧ ହଜାର ୮୭୦ ଖଣ୍ଡ ଭୋଟ ପାଇଥିଲେ । ସେହିପରି ବିଜେପି ପ୍ରାର୍ଥୀ ରଥ ଦାଶ ୧ ଲକ୍ଷ ୨୨ ହଜାର ୪୩୧ ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଥିଲେ ।
ଭଦ୍ରକର ରାଜନୈତିକ ସମୀକରଣ:
| ବିଧାନସଭା ଆସନ | ବିଧାୟକ | ଦଳ |
| ସୋର | ପର୍ଶୁରାମ ଧଡା | ବିଜେଡି |
| ସିମୁଳିଆ | ଜ୍ୟୋତି ପ୍ରକାଶ ପାଣିଗ୍ରାହୀ | ବିଜେଡି |
| ଭଣ୍ଡାରୀପୋଖରୀ | ପ୍ରଫୁଲ୍ଲ ସାମଲ | ବିଜେଡି |
| ଭଦ୍ରକ | ସଞ୍ଜୀବ କୁମାର ମଲ୍ଲିକ | ବିଜେଡି |
| ବାସୁଦେବପୁର | ବିଷ୍ଣୁବ୍ରତ ରାଉତରାୟ | ବିଜେଡି |
| ଧାମନଗର | ସୂର୍ଯ୍ୟବଂଶୀ ସୁରଜ | ବିଜେପି |
| ଚାନ୍ଦବାଲି | ବ୍ୟୋମକେଶ ରାୟ | ବିଜେଡି |
ଭଣ୍ଡାରୀପୋଖରୀ, ଭଦ୍ରକ, ବାସୁଦେବପୁର, ଧାମନଗର, ଚାନ୍ଦବାଲି, ସୋର ଓ ସିମୁଳିଆକୁ ନେଇ ଭଦ୍ରକ ଲୋକସଭା ନିର୍ବାଚନ ମଣ୍ଡଳୀ ଗଠିତ । ଏଠାରେ ୬ ଟି ଆସନ ବିଜେଡି ଅକ୍ତିଆରରେ ଥିବା ବେଳେ କେବଳ ଧାମନଗର ଆସନଟି ବିଜେପି ପାଖରେ ରହିଛି । ଭଦ୍ରକ ଲୋକସଭା ଆସନରେ ବିଜେଡି ନିଜର ବିଜୟକୁ ନେଇ ଦୃଢୋକ୍ତି ପ୍ରକାଶ କରିଥିବା ବେଳେ ବିଜେପି ମଧ୍ୟ କଡା ଟକ୍କର ଦେବା ପାଇଁ ଆପ୍ରାଣ ଉଦ୍ୟମ ଜାରି ରଖିଛି । ସେହିଭଳି କଂଗ୍ରେସ ମଧ୍ୟ ନିଜର ପୂର୍ବ ଗୌରବ ଫେରି ଆଣିବାକୁ ଆଶାବାଦୀ ରହିଛି । ତେବେ ଭଦ୍ରକରେ କାହାର କେତେ ଦମ୍ ତାହା ଜୁନ ୪ ରେ ସ୍ପଷ୍ଟ ହୋଇଯିବ ।
ଇଟିଭି ଭାରତ, ଭଦ୍ରକ
