ଭଦ୍ରକ: ଜିଲ୍ଲାରେ ନିର୍ବାଚନୀ ହିଂସା ଅଭିଯୋଗ । ବିଜେପି ନେତାଙ୍କୁ ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗ । ଗଞ୍ଜାମ ଜିଲ୍ଲା ବିଜେପି ସଭାପତି ଏବଂ ତାଙ୍କ ସହିତ ଆସିଥିବା ସହଯୋଗୀମାନଙ୍କୁ ଭଦ୍ରକ ଜିଲ୍ଲା ଚାନ୍ଦବାଲି ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ତୋଟା ପଡ଼ାରେ ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗ ହୋଇଛି । ବିଜେଡି କର୍ମୀମାନେ ସଂଘବଦ୍ଧ ଭାବେ ଆକ୍ରମଣ କରିଥିବା ଅଭିଯୋଗ କରିଛନ୍ତି ଗଞ୍ଜାମ ଜିଲ୍ଲା ବିଜେପି ସଭାପତି ସୁବାଷ ସାହୁ ।
ଅଭିଯୋଗ ଅନୁଯାୟୀ, ସୋମବାର ରାତିରେ ଗଞ୍ଜାମ ଜିଲ୍ଲା ବିଜେପି ସଭାପତି ସଭାପତି ସୁବାଷ ସାହୁ, ଯୋଗୀ ଦେବଦତ୍ତ ମହାରାଜ ଓ ତାଙ୍କର କିଛି ସହଯୋଗୀ ଚାନ୍ଦବାଲି ନିର୍ବାଚନ ମଣ୍ଡଳୀ ଅନ୍ତର୍ଗତ ଘଣ୍ଟେଶ୍ଵର ଅଞ୍ଚଳର ଜଣେ ବନ୍ଧୁଙ୍କୁ ସାକ୍ଷାତ କରିବା ପାଇଁଁ ଆସୁଥିଲେ । ଏହି ସମୟରେ ତୋଟାପଡା ଠାରେ କିଛି ଆଞ୍ଚଳିକ ଦଳର କର୍ମୀମାନେ ତାଙ୍କ ଗାଡିକୁ ଅଟକାଇ ଥିଲେ । ଗଞ୍ଜାମ ଜିଲ୍ଲା ବିଜେପି ସଭାପତିଙ୍କ ଗାଡ଼ିରେ ବିଜେପି ପତାକା ଲାଗିଥିବା ଦେଖି, କୌଣସି କାରଣ ନଥାଇ ହଠାତ ଅତର୍କିତ ଭାବେ ବାଉଁଶ ବାଡି ଏବଂ ପଥରରେ ଗାଡିକୁ ଆକ୍ରମଣ କରିଥିଲେ । ପରେ ତାଙ୍କ ସମେତ ଗାଡି ଭିତରେ ବସିଥିବା ତାଙ୍କର କିଛି ସହଯୋଗୀ ଏବଂ ଯୋଗୀ ଦେବଦତ୍ତ ମହାରାଜ ନାମକ ଜଣେ ସାଧୁଙ୍କୁ ମଧ୍ୟ ସଂଘବଦ୍ଧ ଭାବେ ଆକ୍ରମଣ କରିଥିଲେ ।
ଆକ୍ରମଣକାରୀମାନେ ମୁଣ୍ଡରେ ବିଜେଡି ପତାକା ବାନ୍ଧିଥିବା ବେଳେ ସେମାନେ ବିଜେଡି କର୍ମୀ ହୋଇଥିବା ଅଭିଯୋଗ କରିଛନ୍ତି ବିଜେପି ନେତା । ଯେହେତୁ ଆକ୍ରମଣକାରୀଙ୍କ ସଂଖ୍ୟା ଅଧିକ ଥିଲା, ସେମାନେ ଭୟଭୀତ ହୋଇ ବାଂଶଡା ଥାନା ଅନ୍ତର୍ଗତ ଘଣ୍ଟେଶ୍ଵର ଫାଣ୍ଡିରେ ନ୍ୟାୟ ପାଇଁ ଦ୍ଵାରସ୍ଥ ହୋଇଥିଲେ । ପରେ ପୋଲିସ ପକ୍ଷରୁ ସେମାନଙ୍କୁ ପ୍ରାଥମିକ ଡାକ୍ତରୀ ସହାୟତା ପ୍ରଦାନ କରିବା ପାଇଁ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ଏଥିସହ ପୁଲିସ ପକ୍ଷରୁ ଏକ ମାମଲା ରୁଜୁ କରାଯାଇ, ଏନେଇ ଅଧିକ ତଦନ୍ତ ଆରମ୍ଭ ହୋଇଛି । ହେଲେ ପୋଲିସ କୌଣସି ଅପରାଧୀଙ୍କୁ ଏ ଯାଏଁ ଗିରଫ କରି ନ ଥିବା ସୂଚନା ମିଳିଛି ।
ରାଜ୍ୟରେ ଅନ୍ତିମ ପର୍ଯ୍ୟାୟ ଅର୍ଥାତ୍ ଜୁନ ୧ତାରିଖରେ କେନ୍ଦ୍ରାପଡା, ଜଗତସିଂହପୁର, ଯାଜପୁର, ଭଦ୍ରକ, ବାଲେଶ୍ୱର ଓ ମୟୂରଭଞ୍ଜ ୬ ସଂସଦୀୟ କ୍ଷେତ୍ରରେ ନିର୍ବାଚନ ହେବାକୁ ଯାଉଛି । ଅନ୍ୟ ସଂସଦୀୟ କ୍ଷେତ୍ରଗୁଡିକରେ ମତଦାନ ସରିଥିବା ବେଳେ ଏବେ ସମସ୍ତଙ୍କ ନଜରରେ ଏହି ୬ଟି ସଂସଦୀୟ କ୍ଷେତ୍ର ଓ ଏହା ଅନ୍ତର୍ଗତ ବିଧାନସଭା ମଣ୍ଡଳୀ । ସେହି ଜିଲ୍ଲାଗୁଡିକୁ ପ୍ରମୁଖ ରାଜନୈତିକ ଦଳର ହେଭିଓ୍ବେଟମାନଙ୍କ ପ୍ରଚାର ଜୋରଦାର ରହିଛି ।
ଇଟିଭି ଭାରତ, ଭଦ୍ରକ
