କେନ୍ଦୁଝର: ନିର୍ବାଚନୀ ବିଗୁଲ ବାଜିବା ପରେ ସ୍ପଷ୍ଟ ହୋଇଯାଇଛି ପ୍ରାର୍ଥୀତ୍ବ । ଖଣି ଖାଦାନରେ ଭରପୂର ଅଥଚ ଦାରିଦ୍ର୍ୟ ଓ କୁପୋଷଣର ଶିକାର କେନ୍ଦୁଝର ଜିଲ୍ଲା ପାଇଁ ନିର୍ବାଚନ ରଣାଙ୍ଗନ ପ୍ରସ୍ତୁତ ହୋଇସାରିଛି । କେନ୍ଦୁଝର ବିଧାନସଭା ସଂରକ୍ଷିତ ଆସନରେ ଏଥର ତ୍ରିମୁଖୀ ଲଢ଼େଇ ହେବ । ବିଜେପିର ଅଭିଜ୍ଞ ପ୍ରାର୍ଥୀ ମୋହନ ଚରଣ ମାଝୀଙ୍କ ସହିତ ଦୁଇ ନବାଗତ ମହିଳା ପ୍ରାର୍ଥୀ ବିଜେଡିର ମୀନା ମାଝୀ ଓ କଂଗ୍ରେସର ପ୍ରତିଭା ମଞ୍ଜରୀ ନାଏକଙ୍କ ମଧ୍ୟରେ ହେବ ସିଧା ଟକ୍କର ।
କେନ୍ଦୁଝର ଆସନରେ ମୋହନ ଚରଣ ମାଝୀ ବିଜେପିରୁ ୬ ଥର ନିର୍ବାଚନ ଲଢିଥିବା ବେଳେ ୩ ଥର ବିଜୟୀ ହୋଇଛନ୍ତି । ଗତ ନିର୍ବାଚନରେ ବିଜେଡି ପ୍ରାର୍ଥୀ ମାଧବ ସର୍ଦାରଙ୍କୁ ମାତ୍ର ୧୧୨୪ ଖଣ୍ଡ ଭୋଟରେ ହରାଇ ବିଧାୟକ ହୋଇଥିଲେ ମୋହନ । ଏହା ସହ ସେ ବିଧାନସଭାରେ ବିରୋଧୀ ଦଳର ମୁଖ୍ୟ ସଚେତକ ଭାବେ ନିଜ ଦାୟିତ୍ବ ତୁଲାଇଥିଲେ । ମୋହନ କହିଛନ୍ତି ଯେ ଗତ ୨୪ ବର୍ଷର ବିଜେଡି ଶାସନରେ କେନ୍ଦୁଝରରେ ଆଦୌ ବିକାଶ ହୋଇପାରିନାହିଁ । କେନ୍ଦ୍ର ସରକାରଙ୍କ ଠାରୁ ମଞ୍ଜୁରୀ ମିଳିଥିଲେ ମଧ୍ୟ ରାଜ୍ୟ ସରକାରଙ୍କ ଅପାରଗତା ପାଇଁ ମୋଗା ଷ୍ଟିଲ ପ୍ଲାଣ୍ଟ ହୋଇପାରିଲା ନାହିଁ । ଅଞ୍ଚଳରେ ଯୁବବର୍ଗଙ୍କ ପାଇଁ ରୋଜଗାରର ଅଭାବ, ଦୁର୍ନୀତି ଭଳି ମୁଦ୍ଦାକୁ ନେଇ ସେ ଲୋକଙ୍କୁ ଭୋଟ ଭିକ୍ଷା କରିବେ ବୋଲି କହିଛନ୍ତି ।
ମୋହନଙ୍କୁ ଚେକ୍ ଦେବା ପାଇଁ ବିଜେଡି ଖେଳିଛି ମହିଳା କାର୍ଡ । ଏହି ଆସନ ସମ୍ମାନର ପ୍ରଶ୍ନ ହୋଇଥିବାରୁ ଗତ ନିର୍ବାଚନ ତ୍ରୁଟିକୁ ସୁଧାରିବା ସହ ସଠିକ୍ ପରିଚାଳନା ପାଇଁ ବିଜେଡି ନୂଆ ରଣନୀତି ଆରମ୍ଭ କରିଛି । ବିଜେଡି ମୀନା ମାଝୀଙ୍କୁ ଟିକେଟ ଦେଇଥିବା ବେଳେ ପୂର୍ବରୁ ସେ କେନ୍ଦୁଝରଗଡ଼ ପୌରପାଳିକାର ନଗରପାଳ ଭାବେ କାର୍ଯ୍ୟ କରିସାରିଛନ୍ତି । ଗତ ୨୦ ବର୍ଷ ମଧ୍ୟରେ ସବୁବେଳେ ବିଜେଡି ନିଜର ପ୍ରାର୍ଥୀ ବଦଳାଇଛି । କେନ୍ଦୁଝରରେ ମେଡିକାଲ କଲେଜ ଓ ଧରଣୀଧର ବିଶ୍ବବିଦ୍ୟାଳୟ ପ୍ରତିଷ୍ଠା ସହ ବିଜେଡି ସରକାର ଲୋକଙ୍କ ପାଇଁ ଜନ୍ମରୁ ମୃତ୍ୟୁ ଯାଏଁ ବିଭିନ୍ନ ଯୋଜନାକୁ ପ୍ରସଙ୍ଗ କରି ଲୋକଙ୍କ ପାଖକୁ ଯାଉଛନ୍ତି ମୀନା ।
ଏହା ମଧ୍ୟ ପଢନ୍ତୁ... କେନ୍ଦୁଝର ସଦର ନିର୍ବାଚନ ମଣ୍ଡଳୀରେ କର୍ମୀ ସମ୍ମିଳନୀ କରି ପ୍ରାଚର ମୈଦାନକୁ ଓହ୍ଲାଇଲେ ମୀନୀ ମାଝୀ - Meena Majhi Election Campaign
କଂଗ୍ରେସ ପ୍ରାର୍ଥୀ ପ୍ରତିଭା ନାଏକ ମଧ୍ୟ ଜଣେ ଅଭିଜ୍ଞ ରାଜନୀତି ପରିବାରର ହୋଇଥିବାରୁ ୩ ପ୍ରାର୍ଥୀଙ୍କ ଲଢ଼େଇ ଜୋରଦାର ହେବା ପରିସ୍ଥିତି ରହିଛି । ପ୍ରତିଭାଙ୍କ ସ୍ବାମୀ ସୁବର୍ଣ୍ଣ ନାଏକ ୨୦୦୯ରେ ଇଞ୍ଜିନିୟରିଂ ଚାକିରି ଛାଡି ବିଜେଡିରେ ଯୋଗ ଦେଇ ପ୍ରଥମଥର ବିଧାୟକ ହୋଇଥିଲେ । ପରେ ଦଳ ତାଙ୍କୁ ଆଉ ଟିକଟ୍ ଦେଇନଥିଲା । ପ୍ରତିଭା ମଧ୍ୟ ଝୁମ୍ପୁରା ବ୍ଲକର ଅଧ୍ୟକ୍ଷା ସହିତ ଜିଲ୍ଲା ପରିଷଦ ସଦସ୍ୟା ଭାବେ କାର୍ଯ୍ୟ କରିଥିଲେ । ଏଥର ସେ କଂଗ୍ରେସରେ ଯୋଗଦେବା ପରେ ଦଳ ତାଙ୍କ ଉପରେ ଆସ୍ଥା ପ୍ରକଟ କରି ପ୍ରାର୍ଥୀ କରିଛି ।
ତେବେ ଏହି ତ୍ରିକୋଣୀୟ ମହାଲଢେଇକୁ ନେଇ ବୁଦ୍ଧିଜୀବୀ ମତ ଦେଇଛନ୍ତି ଯେ ଯଦି କଂଗ୍ରେସ ଅଧିକ ଭୋଟ ପାଏ ତେବେ ବିଜେପି ବହୁମତ ପାଇବ ଏବଂ କଂଗ୍ରେସ କମ୍ ଭୋଟ ପାଏ ତେବେ ବିଜେଡି ବିଜୟୀ ହେବାର ସମ୍ଭାବନା ରହିଛି । ପ୍ରକାଶ ଯେ କେନ୍ଦୁଝର ଜିଲ୍ଲାରେ ଚତୁର୍ଥ ପର୍ଯ୍ୟାୟରେ ନିର୍ବାଚନ ଥିବା ବେଳେ ମେ ମାସ ୬ ତାରିଖ ନାମାଙ୍କନ ପତ୍ର ଦାଖଲ ଶେଷ ଦିନ ଅଛି। ସେହିପରି ମେ ମାସ ୨୫ ରେ ଭୋଟଦାନ ଅଛି ।
ଇଟିଭି ଭାରତ, କେନ୍ଦୁଝର
