ହାଇଦ୍ରାବାଦ: ନିକଟରେ ବିଜେଡିରୁ ଇସ୍ତଫା ଦେଇଥିବା କେନ୍ଦ୍ରାପଡା ସାଂସଦ ଅନୁଭବ ମହାନ୍ତି ଆଜି ଭାରତୀୟ ଜନତା ପାର୍ଟି (ବିଜେପି)ରେ ସାମିଲ ହୋଇଛନ୍ତି । ଦିଲ୍ଲୀ ମୁଖ୍ୟାଳୟରେ ସେ ବିଜେପି ଜାତୀୟ ସାଧାରଣ ସମ୍ପାଦକ ବିନୋଦ ତାଓ୍ବଡେଙ୍କ ଉପସ୍ଥିତିରେ ବିଧିବଦ୍ଧ ଭାବେ ଦଳର ସଦସ୍ୟତା ଗ୍ରହଣ କରିଛନ୍ତି । ଦୁଇଦିନ ତଳେ ସେ ବିଜୁ ଜନତା ଦଳ (ବିଜେଡି)ର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ । ଏହା ପରେ ସେ ବିଜେପିରେ ମିଶିବା ନେଇ ଚର୍ଚ୍ଚା ହେଉଥିଲା । ଓଡିଆ ସିନେ ଜଗତର ଏହି ଜଣାଶୁଣା ତାରକା ପୂର୍ବରୁ ବିଜେଡି ଟିକେଟରେ ଥରେ ରାଜ୍ୟସଭା ଯାଇଥିବା ବେଳେ 2019 ସାଧାରଣ ନିର୍ବାଚନରେ ଚର୍ଚ୍ଚିତ କେନ୍ଦ୍ରାପଡା ସଂସଦୀୟ କ୍ଷେତ୍ରରୁ ସାଂସଦ ଭାବେ ମଧ୍ୟ ନିର୍ବାଚିତ ହୋଇଥିଲେ ।
2019ରେ ବିଜେପିର ହେଭିଓ୍ବେଟ ବୈଜୟନ୍ତ ପଣ୍ଡାଙ୍କୁ ପରାଜିତ କରିଥିଲେ ଅନୁଭବ । ପରବର୍ତ୍ତୀ ସମୟରେ ଦାମ୍ପତ୍ଯ ବିବାଦରେ ଛନ୍ଦି ହୋଇଥିବା ଅନୁଭବଙ୍କୁ ଦଳରେ ସେତେଟା ଗୁରୁତ୍ବ ମିଳିନଥିଲା । ଏଥର ତାଙ୍କ ସ୍ଥାନରେ ଦଳ ଅଂଶୁମାନ ମହାନ୍ତିଙ୍କୁ କେନ୍ଦ୍ରାପଡା ଲୋକସଭା ପ୍ରାର୍ଥୀ ଘୋଷଣା କରିଛି । ଦୁଇଦିନ ପୂର୍ବେ ବିଜେଡିରୁ ଇସ୍ତଫା ଦେଇଥିବା ଅନୁଭବ ଆଜି ବିଜେପିରେ ସାମିଲ ହୋଇଛନ୍ତି । ସେ ବିଧାୟକ ପ୍ରାର୍ଥୀ ଭାବେ ବିଜେପି ଟିକେଟରେ ନଜର ଆସିପାରନ୍ତି । କାରଣ ବିଜେପି ରାଜ୍ୟର ସମସ୍ତ 21 ଲୋକସଭା ଆସନରେ ସାଂସଦ ପ୍ରାର୍ଥୀ ଘୋଷଣା କରିସାରିଛି ।
ଏହା ମଧ୍ଯ ପଢ଼ନ୍ତୁ...ବିଜେଡିକୁ ବାଏ ବାଏ କଲେ କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି - Anubhav Mohanty Quits BJD
ଅନୁଭବଙ୍କ ରାଜନୈତିକ କ୍ୟାରିୟର
ଓଡିଆ ସିନେ ଜଗତରେ ପ୍ରାୟ ଦୁଇଦଶନ୍ଧି ଧରି ଅଭିନୟ କରି ବେଶ ଲୋକପ୍ରିୟତା ପାଇଥିବା ଅନୁଭବ 2013ରେ ଶାସକ ଦଳ ବିଜେଡିରେ ଯୋଗଦାନ କରିଥିଲେ । 2014ରେ ଦଳ ତାଙ୍କୁ ରାଜ୍ୟସଭା ପଠାଇଥିଲା । ପରେ 2019 ସାଧାରଣ ନିର୍ବାଚନରେ ବିଜେଡି ପାଇଁ ସମ୍ମାନଜନକ ଆସନ ତଥା ରାଜ୍ୟ ରାଜନୀତିର ଚର୍ଚ୍ଚିତ ସଂସଦୀୟ କ୍ଷେତ୍ର କେନ୍ଦ୍ରାପଡା ଆସନରୁ ତାଙ୍କୁ ପ୍ରାର୍ଥୀ କରାଯାଇଥିଲା । ବିଜେଡି ଛାଡି ବିଜେପିରେ ସାମିଲ ହୋଇଥିବା ବରିଷ୍ଠ ରାଜନେତା ତଥା କେନ୍ଦ୍ରାପଡାର ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ସହ ତାଙ୍କର ପ୍ରତିଦ୍ବନ୍ଦ୍ବିତା ହୋଇଥିଲା । ପ୍ରାୟ ଦେଢଲକ୍ଷ ଭୋଟ ବ୍ୟବଧାନରେ ଅନୁଭବ ବୈଜୟନ୍ତଙ୍କୁ ପରାସ୍ତ କରିଥିଲେ । ହେଲେ ପତ୍ନୀ ବର୍ଷାଙ୍କ ସହ ଦାମ୍ପତ୍ୟ କଳହ ଅନୁଭବଙ୍କ ରାଜନୈତିକ କ୍ୟାରିୟର ପାଇଁ ମହଙ୍ଗା ସାବ୍ୟସ୍ତ ହୋଇଥିଲା । ସାଂସଦ ଥାଇ ମଧ୍ୟ ତାଙ୍କୁ ଦଳର ବହୁ କାର୍ଯ୍ୟକ୍ରମରୁ ଦୂରେଇ ରଖାଯାଇଥିବା ଚର୍ଚ୍ଚା ହେଉଥିଲା । ଏପରିକି ଚଳିତ ନିର୍ବାଚନରେ ତାଙ୍କୁ ଆଉ ବିଜେଡି ଟିକେଟ ଦେଇନପାରେ ବୋଲି ମଧ୍ୟ ପୂର୍ବରୁ ଚର୍ଚ୍ଚା ଜାରି ରହିଥିଲା । ଆଜି ଏହି ତାରକା-ସାଂସଦ ବିଜେପିରେ ସାମିଲ ହୋଇଛନ୍ତି ।
ଏହା ମଧ୍ଯ ପଢନ୍ତୁ....ବିଜେଡି ଛାଡିଛନ୍ତି ଏହି ଚର୍ଚ୍ଚିତ ଅଭିନେତା, ଦେଖନ୍ତୁ ଫଟୋ - Ollywood Actors Left Bjd
ବିଜେପିରେ ସିନେ ତାରକା
ନିକଟରେ ଅଭିନୟ ଜଗତରୁ ବିଜେଡି ଟିକେଟରେ ରାଜନୀତିରେ ପ୍ରବେଶ କରିଥିବା ନିର୍ବାଚିତ ଜନପ୍ରତିନିଧି ହୋଇଥିବା ସିଦ୍ଧାନ୍ତ ମହାପାତ୍ର ଓ ଆକାଶ ଦାସ ନାଏକ ମଧ୍ୟ ଦଳ ଛାଡି ବିଜେପିରେ ସାମିଲ ହୋଇଛନ୍ତି । କୌଣସି ନିର୍ବାଚନ ଲଢିନଥିଲେ ସୁଦ୍ଧା ଦୀର୍ଘ ବର୍ଷ ଧରି ବିଜେଡି ଷ୍ଟାର-ପ୍ରଚାରକ ଥିବା ଅନ୍ୟତମ ଲୋକପ୍ରିୟ ଅଭିନେତା ଅରିନ୍ଦମ ରାୟ ମଧ୍ୟ ବିଜେଡିରୁ ଇସ୍ତଫା ଦେଇ ବିଜେପିରେ ସାମିଲ ହୋଇସାରିଛନ୍ତି । ଏହି ସମସ୍ତ ଅଭିନେତା ଏବେ ବିଜେପି ଟିକେଟରେ ବିଧାନସଭା ନିର୍ବାଚନୀ ମୈଦାନରେ ନଜର ଆସିବା ମଧ୍ୟ ପ୍ରାୟ ସ୍ପଷ୍ଟ । ବିଜେପି ରାଜ୍ୟରେ ସମସ୍ତ 21 ସଂସଦୀୟ ଆସନରେ ପ୍ରାର୍ଥୀ ଘୋଷଣା କରିସାରିଥିଲେ ସୁଦ୍ଧା ବିଧାନସଭା ପ୍ରାର୍ଥୀ ଖାତା ଖୋଲିନି ।
ବ୍ୟୁରୋ ରିପୋର୍ଟ, ଇଟିଭି ଭାରତ
