ନୂଆପଡା: ନିର୍ବାଚନ ପାଖେଇ ଆସୁଥିବା ବେଳେ ସରଗରମ ହେଉଛି ନିର୍ବାଚନ ମଇଦାନ । ଭୋଟରମାନଙ୍କୁ ଆକୃଷ୍ଟ କରିବା ପାଇଁ ପ୍ରାଣପଣେ ଚେଷ୍ଟା କରୁଛନ୍ତି ପ୍ରାର୍ଥୀ । ପ୍ରଦେଶ କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ବରିଷ୍ଠ କଂଗ୍ରେସ ନେତା ଭକ୍ତ ଚରଣ ଦାସ ଆଜି ନୂଆପଡା ଜିଲ୍ଲାରେ ମାରାଥନ ଭୋଟ ପ୍ରଚାର କରିଛନ୍ତି । ତାଙ୍କ ସହିତ କଂଗ୍ରେସର କଳାହାଣ୍ଡି ଲୋକସଭା ପ୍ରାର୍ଥୀ ଦ୍ରୌପଦୀ ମାଝୀ ମଧ୍ୟ ଲୋକଙ୍କୁ ଭୋଟ ଭିକ୍ଷା କରିଛନ୍ତି । ପ୍ରଚାର ସମୟରେ ବରିଷ୍ଠ କଂଗ୍ରେସ ନେତ୍ରୀ ତଥା ଲୋକସଭା ପ୍ରାର୍ଥୀ ଦ୍ରୌପଦୀ ମାଝୀଙ୍କୁ ସ୍ଥାନେ ସ୍ଥାନେ ବିପୁଳ ସ୍ୱାଗତ ସମ୍ବର୍ଦ୍ଧନା ମିଳିଛି ।
ଖବର ଅନୁସାରେ, ପ୍ରଥମେ ନୂଆପଡା ସଦର ଠାରେ କଂଗ୍ରେସ ଜିଲ୍ଲା ସଭାପତି ସୁରେଶ ଆଜାଦଙ୍କ ନେତୃତ୍ୱରେ କଂଗ୍ରେସର ଶତାଧିକ ନେତା କର୍ମୀ ସ୍ୱାଗତ କରିଥିଲେ । ଏହାପରେ ତରବୋଡ, କୋମନା ଠାରେ ମଧ୍ୟ ସ୍ୱାଗତ ଜଣାଇ କରାଯାଇଥିଲା । ଶେଷରେ ଖଡ଼ିଆଳ ଠାରେ କଂଗ୍ରେସ ନେତା କମଳ ଚରଣ ତାଣ୍ଡିଙ୍କ ନେତୃତ୍ୱରେ ଶତାଧିକ କର୍ମୀ ଭକ୍ତ ଦାସ ଏବଂ ସାଂସଦ ପ୍ରାର୍ଥୀ ଦ୍ରୌପଦୀ ମାଝୀଙ୍କୁ ଖଡ଼ିଆଳ ବ୍ଲକ ଛକଠାରେ ସ୍ୱାଗତ କରିଛନ୍ତି । 'ଭକ୍ତ ଦାସ ଜିନ୍ଦାବାଦ' ଧ୍ୱନୀରେ ପ୍ରକମ୍ପିତ ଖଡ଼ିଆଳ ସହର । ଖଡ଼ିଆଳ ବ୍ଲକ ଛକଠାରୁ ଆମ୍ବେଦକର ଛକ ପର୍ଯ୍ୟନ୍ତ ପଦଯାତ୍ରା କରି ଲୋକଙ୍କୁ ଭୋଟ ମାଗିଛନ୍ତି ଭକ୍ତ ଦାସ ।
ଏହା ମଧ୍ୟ ପଢନ୍ତୁ: ବିଜେପିର ମହିଳା କାର୍ଡ ନା ବିଜେଡି-କଂଗ୍ରେସର ଟାଣୁଆ ନେତା, କାହାର ହେବ କଳାହାଣ୍ଡି ଲୋକସଭା ? - Kalahandi Lok Sabha Constituency
ପ୍ରଚାର କରିବା ସମୟରେ ଭକ୍ତ ଦାସ ଦମ୍ଭୋକ୍ତି କରି କହିଛନ୍ତି, "କଳାହାଣ୍ଡି ନୂଆପଡାରେ କଂଗ୍ରେସ ସ୍ଥିତି ମଜବୁତ ରହିଛି । 24 ବର୍ଷର ନବୀନ ସରକାର ଏବଂ 10 ବର୍ଷର ମୋଦି ସରକାରକୁ ଲୋକେ ଦେଖି ସାରିଲେଣି । ଦୁର୍ନୀତି ଭ୍ରଷ୍ଟାଚାରରେ ଡୁବିରହିଥିବା ସରକାରକୁ ଲୋକେ ବୁଝି ସାରିଲେଣି । ଏଥର କଳାହାଣ୍ଡି ଲୋକସଭା କ୍ଷେତ୍ରରେ ନୂଆପଡା ଏବଂ କଳାହାଣ୍ଡିରେ 7 ଗୋଟି ବିଧାୟକ ପ୍ରାର୍ଥୀ ଏବଂ ଲୋକସଭା ପ୍ରାର୍ଥୀ ସୁନିଶ୍ଚିତ ନିର୍ବାଚନ ବିଜୟୀ ହେବେ ।"
ଅନ୍ୟପଟେ କଂଗ୍ରେସ ବିଧାୟକ ଅଧିରାଜ ମୋହନ ପାଣିଗ୍ରାହୀ କଂଗ୍ରେସରୁ ଇସ୍ତଫା ଦେଇ ବିଜେଡି ଶିବିରରେ ସାମିଲ ହୋଇଛନ୍ତି । ଏହା ପ୍ରଭାବ ପକାଇବ ବୋଲି ପ୍ରଶ୍ନ କରାଯାଇଥିବା ବେଳେ କୌଣସି ପ୍ରଭାବ ପଡିବ ନାହିଁ ବୋଲି ଭକ୍ତ ଦାସ କହିଛନ୍ତି । କଂଗ୍ରେସ ସବୁବେଳେ ନେତା ତିଆରି କରେ ପୁଣି ନେତା ତିଆରି କରିବା ଏଥିରେ କିଛି ଅସୁବିଧା ନାହିଁ ବୋଲି କହିଛନ୍ତି । ସେହିଭଳି କଳାହାଣ୍ଡି ଲୋକସଭା କଂଗ୍ରେସ ପ୍ରାର୍ଥୀ ଦ୍ରୌପଦୀ ମାଝୀ ସମସ୍ତଙ୍କ ସହଯୋଗ କାମନା କରିଛନ୍ତି । ମୋତେ ସହଯୋଗ କରନ୍ତୁ ମୁଁ ବିଜୟୀ ହୋଇ କଳାହାଣ୍ଡି ଓ ନୂଆପଡାର ସର୍ବାଙ୍ଗୀନ ବିକାଶ କରିବି ବୋଲି କହିଛନ୍ତି ।
ଇଟିଭି ଭାରତ, ନୂଆପଡା
