ରାଞ୍ଚି: ଆଉ ଦିନକ ପରେ ଝାଡଖଣ୍ଡରେ ପଡ଼ିବ ଭୋଟ । ଆସନ୍ତା ୧୩ରେ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଥିବାବେଳେ ଶେଷ ଦିନରେ ଜମିଛି ପ୍ରଚାର । ଆଜି ଦିନିକିଆ ଝାଡଖଣ୍ଡ ଗସ୍ତ କରିଥିଲେ ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଷଢେଇକଳାରେ ବିରାଟ ଜନସଭାକୁ ସମ୍ବୋଧିତ କରିଛନ୍ତି ମୋହନ ଚରଣ ମାଝୀ । ବିଜେପି ପ୍ରାର୍ଥୀ ଚମ୍ପାଇ ସୋରେନଙ୍କ ପାଇଁ ପ୍ରଚାର ମୈଦାନକୁ ଓହ୍ଲାଇ ଭୋଟ ଭିକ୍ଷା କରିଛନ୍ତି ।
ଝାଡଖଣ୍ଡରେ ମୋହନ ମାଝୀଙ୍କ ପ୍ରଚାର:
ଆସନ୍ତା ୧୩ତାରିଖରେ ଝାଡଖଣ୍ଡରେ ପ୍ରଥମ ପର୍ଯ୍ୟାୟ ମତଦାନ ଅନୁଷ୍ଠିତ ହେବ । ଆଜି ଶେଷ ଦିନରେ ଜମିଛି ପ୍ରଚାର । ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋସିଆଲ ମିଡିଆ ହ୍ୟାଣ୍ଡେଲ ଟ୍ବିଟରେ ଉଲ୍ଲେଖ କରିଛନ୍ତି, "ଜନସଭାରେ ଲୋକଙ୍କ ଉତ୍ସାହ ଦର୍ଶାଉଛି ଏଥର ଝାଡଖଣ୍ଡରେ ମଧ୍ୟ ପଦ୍ମ ଫୁଟିବ ।"
ଝାଡ଼ଖଣ୍ଡର ଷଢେଇକଳାରେ ବିରାଟ ଜନସଭାକୁ ସମ୍ବୋଧନ କରି @BJP4Jharkhand ପ୍ରାର୍ଥୀ @ChampaiSoren ଙ୍କ ପାଇଁ ପ୍ରଚାର କଲି। ଜନସଭାରେ ଲୋକଙ୍କ ଉତ୍ସାହ ଦର୍ଶାଉଛି ଏଥର ଝାରଖଣ୍ଡରେ ମଧ୍ୟ ପଦ୍ମ ଫୁଟିବ।
— Mohan Charan Majhi (@MohanMOdisha) November 11, 2024
ଆଉ ୧୨ ଦିନ ପରେ ଦୁର୍ନୀତିଗ୍ରସ୍ତ ଜେଏମଏମ ସରକାରକୁ ବାଏ ବାଏ କରିବେ ଝାଡ଼ଖଣ୍ଡ ବାସୀ। ନଭେମ୍ବର ୨୩ରେ ଝାଡ଼ଖଣ୍ଡ ବାସୀ ନୂଆ ସକାଳ… pic.twitter.com/bY5vcfNk1k
ମୋହନ ଚରଣ ମାଝୀ ଆହୁରି କହିଛନ୍ତି, "ଆଉ ୧୨ ଦିନ ପରେ ଦୁର୍ନୀତିଗ୍ରସ୍ତ JMM ସରକାରକୁ ବାଏ ବାଏ କରିବେ ଝାଡଖଣ୍ଡବାସୀ । ନଭେମ୍ବର ୨୩ରେ ଝାଡ଼ଖଣ୍ଡବାସୀ ନୂଆ ସକାଳ ଦେଖିବେ । ଓଡ଼ିଶାବାସୀ ଯେମିତି ଡବଲ ଇଞ୍ଜିନ ସରକାର ଦ୍ବାରା ଉପକୃତ ହେଉଛନ୍ତି ଝାଡ଼ଖଣ୍ଡବାସୀ ମଧ୍ୟ ଠିକ ସେମିତି ଉପକୃତ ହେବେ ।"
ଷ୍ଟାର ପ୍ରଚାରକ ମୋହନ:
ବିଜେପି ପକ୍ଷରୁ ଜାରି ହୋଇଥିଲା 40 ଜଣିଆ ଷ୍ଟାର ପ୍ରଚାରକ ତାଲିକା । ଯେଉଁଥିରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ନାଁ ସାମିଲ ରହିଥିଲା । ପ୍ରଚାରର ଶେଷ ଦିନରେ ଷଢେଇକଳା ଆସନ ପାଇଁ ପ୍ରାର୍ଥୀ ହୋଇଥିବା ଚମ୍ପାଇ ସୋରେନଙ୍କ ପାଇଁ ପ୍ରଚାର କରିଛନ୍ତି । ତାଙ୍କ ସହ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ମଧ୍ୟ ଉପସ୍ଥିତ ଥିଲେ ।
ଏହା ବି ପଢନ୍ତୁ...ଝାଡ଼ଖଣ୍ଡ ନିର୍ବାଚନ: BJP ପାଇଁ ଆଜି ପ୍ରଚାର କରିବେ ମୁଖ୍ୟମନ୍ତ୍ରୀ ମୋହନ ମାଝୀ
ଚମ୍ପାଇ ସୋରେନଙ୍କ ବିଷୟରେ...
କହିରଖୁଛୁ, ଚମ୍ପାଇ ସୋରେନ ହେଉଛନ୍ତି ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ । ହେମନ୍ତ ସୋରେନ ଜେଲ ଯିବା ପରେ ମୁଖ୍ୟମନ୍ତ୍ରୀ ଭାବେ ଦାୟିତ୍ବ ନେଇଥିଲେ ଚମ୍ପାଇ । ହେଲେ ଜେଲରୁ ଫେରିବା ପରେ ହେମନ୍ତ ପୁନର୍ବାର କ୍ଷମତା ହାତେଇଥିଲେ । ପରବର୍ତ୍ତୀ ସମୟରେ ଅର୍ଥାତ୍ ଗତ ଅଗଷ୍ଟ ୨୮ରେ ତାରିଖରେ ବିଧାୟକ ପଦ ସହ JMMର ପ୍ରାଥମିକ ସଦସ୍ୟତା ପଦରୁ ଇସ୍ତଫା ଦେଇଥିଲେ ଚମ୍ପାଇ ସୋରେନ । ଅଗଷ୍ଟ ୩୦ ତାରିଖରେ ସେ ବିଜେପିରେ ସାମିଲ ହୋଇଥିଲେ ।
13ରେ ପ୍ରଥମ ପର୍ଯ୍ୟାୟ ଭୋଟ:
ଝାଡଖଣ୍ଡରେ ଦୁଇଟି ପର୍ଯ୍ୟାୟରେ ଭୋଟ ଅନୁଷ୍ଠିତ ହେବାକୁ ଯାଉଛି । ପ୍ରଥମ ପର୍ଯ୍ୟାୟ (ନଭେମ୍ବର 13)ରେ 43ଟି ସିଟରେ ମତଦାନ ହେବାକୁ ଯାଉଛି । ସେହିପରି ଦ୍ବିତୀୟ ପର୍ଯ୍ୟାୟ ବା ଅନ୍ତିମ ପର୍ଯ୍ୟାୟ(ନଭେମ୍ବର 20)ରେ 38ଟି ଆସନରେ ମତଦାନ ହେବ । ଏବଂ ଭୋଟ ଗଣତି 23ରେ ହେବ । ଆଜି ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଶେଷ ପ୍ରଚାର ଥିଲା । ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସମେତ ଅନେକ ରାଜ୍ୟର ମୁଖ୍ୟମନ୍ତ୍ରୀ ମଧ୍ୟ ଜୋରଦାର ପ୍ରଚାର କରିଥିଲେ ।
ଏହା ବି ପଢନ୍ତୁ...ନିର୍ଣ୍ଣାୟକ ହେବେ ଓଡିଆ ଭୋଟର ! ଝାଡଖଣ୍ଡ ମୁହାଁ ମାଳ ମାଳ ଓଡିଆ ନେତା
