ଭୁବନେଶ୍ବର: ଓଡିଆ ଅସ୍ମିତାକୁ ନେଇ ଚାଲିଥିବା ରାଜନୀତିକୁ ନେଇ କଂଗ୍ରେସର ସମାଲୋଚନା । ଆଜି ଭୁବନେଶ୍ୱର କଂଗ୍ରେସ ଭବନରେ ଏକ ସାମ୍ବାଦିକ ସମ୍ମିଳନୀରେ ଉଭୟ ବିଜେଡି ଓ ବିଜେପି ସରକାରକୁ ଟାର୍ଗେଟ କରିଛି କଂଗ୍ରେସ । ଓଡ଼ିଆ ଅସ୍ମିତା ଆଜି ଗୁରୁତର ବିପଦ ଅବସ୍ଥାରେ କେବଳ ଜଣେ ତାମିଲ ଅଫିସରଙ୍କୁ ସମ୍ପୂର୍ଣ୍ଣ ନିୟନ୍ତ୍ରଣ ଦିଆଯାଇଥିବାରୁ ଏବଂ ଏହି ଅଫିସରଙ୍କୁ ଖୋଲା ଛୁଟି ଦେବାରେ ବିଜେପି ମଧ୍ୟ ସମାନ ପରିମାଣରେ ଦାୟୀ ବୋଲି ପିସିସି ଭିନ୍ନକ୍ଷମ ବିଭାଗର ଅଧ୍ୟକ୍ଷ ଜିତେନ୍ଦ୍ର ବିଶ୍ବାଳ କହିଛନ୍ତି । ନବୀନ ସରକାର ଅପେକ୍ଷାକୃତ କନିଷ୍ଠ ଆଇଏଏସ ଅଧିକାରୀଙ୍କୁ ତାଙ୍କର ଅନେକ ବରିଷ୍ଠ ଅଫିସର ମାନଙ୍କୁ ଅତିକ୍ରମ କରି ସମ୍ପୂର୍ଣ୍ଣ ଅଧିକାର ଦେଇ ପାରିଛନ୍ତି ,କାରଣ କାରଣ କେନ୍ଦ୍ରର ମୋଦି ସରକାର ଏହାକୁ କେବଳ ଅନୁମତି ଦେଇନାହାଁନ୍ତି ବରଂ ଏହାକୁ ସୁଗମ କରିଛନ୍ତି ।
କେନ୍ଦ୍ର ଗୃହମନ୍ତ୍ରୀ ଅମିତ ସାହା ନିଜେ ହିଁ ତାମିଲ ଅଧିକାରୀଙ୍କୁ ସିଧାସଳଖ ଯେତେବେଳେ ଚାହିଁବେ ସେତେବେଳେ ଭେଟିବା ପାଇଁ ଖାଲି ଅନୁମତି ଦେଇନଥିଲେ ବରଂ ବିଭିନ୍ନ ହୋଟେଲ ଏବଂ କାର୍ଯ୍ୟାଳୟରେ ବ୍ୟକ୍ତିଗତ ଭାବେ ବାରମ୍ବାର ସାକ୍ଷାତ କରୁଥିଲେ ବୋଲି କଂଗ୍ରେସ ଅଭିଯୋଗ କରିଛି । ଜିତେନ୍ଦ୍ର କହିଛନ୍ତି," ଓଡ଼ିଆ ଅସ୍ମିତାକୁ ଲୁଟ କରିବା ପାଇଁ ସବୁ ପ୍ରକାର ସାହାଯ୍ୟ ଯୋଗାଇ ଦେବା ପରେ ସୁରକ୍ଷା ନାଁରେ ଏହି ନିର୍ବାଚନ ଲଢ଼ୁଥିବା ବିଜେପି ଡବଲ ଷ୍ଟାଣ୍ଡାର୍ଡ କରୁଛି । ବିଜେପି ବିଜେଡିର ଏହି ଲଢେଇ କେବଳ ଓଡିଶା ଜନସାଧାରଣଙ୍କୁ ଠକି ପ୍ରତାରଣା କରି ଭୋଟ ନେବା ଏବଂ ପରେ ମିଳିତ ଭାବେ ସେମାନଙ୍କୁ ଆଉ 5 ବର୍ଷ ଲୁଟ କରିବା ପାଇଁ ଷଡଯନ୍ତ୍ର ଛଡା ଆଉ କିଛି ନୁହେଁ । ବିଜେପି ଏବଂ ବିଜେଡି ସର୍ବଦା ଏକାଠି ଥିଲେ ,ରହିଛନ୍ତି ଆଉ ଆଗକୁ ଏକାଠି ରହିବେ ମଧ୍ୟ । ଯଦି ଓଡ଼ିଶାର ଲୋକମାନେ ପ୍ରକୃତ ପରିବର୍ତ୍ତନ ଚାହୁଁଛନ୍ତି ସେମାନେ ଅନୁଭବ କରିବା ଦରକାର ଯେ ରାଜ୍ୟରେ ସେମାନଙ୍କ ପାଇଁ କଂଗ୍ରେସ ହିଁ ହେଉଛି ଏକମାତ୍ର ବିକଳ୍ପ ।"
