ସମ୍ବଲପୁର: ଜିଲ୍ଲାର 4 ଟି ବିଧାନସଭା ସିଟ ପାଇଁ ପ୍ରାର୍ଥୀ ଘୋଷଣା କରିଛି କଂଗ୍ରେସ । ଗତକାଲି ସମ୍ବଲପୁର, ରେଙ୍ଗାଲି ଓ କୁଚିଣ୍ଡାରେ ଦଳ ନୂତନ ଚେହେରାକୁ ପ୍ରାର୍ଥୀ କରିଥିବା ବେଳେ ରେଢ଼ାଖୋଲରୁ ଆସଫ ଅଲ୍ଲୀ ଖାଁଙ୍କୁ ପୁଣି ଥରେ ଦଳ ଟିକେଟ ଦେଇଛି । ସମ୍ବଲପୁର ବିଧାନସଭା ସିଟ ପାଇଁ ନୂତନ ଚେହେରା ଦୁର୍ଗା ପାଢ଼ୀ, ରେଙ୍ଗାଲି ପାଇଁ ଦିଲ୍ଲୀପ ଦୁରିଆ ଓ କୁଚିଣ୍ଡା ପାଇଁ କେଦାର ବରିହାଙ୍କ ପରି ନୂଆ ଚେହେରାକୁ ଦଳ ଟିକେଟ ଦେଇଛି । ସମ୍ବଲପୁର ବିଧାନସଭା ସିଟ ଏକ ମର୍ଯ୍ୟାଦାପୂର୍ବ ସିଟ ହୋଇଥିବା ବେଳେ ଏହା ବିଜେପିର ଗଡ଼ ଭାବେ ପରିଚିତ । ଏଠାରେ ବିଜେପିର ପ୍ରାର୍ଥୀ ଭାବେ ବିରୋଧୀ ଦଳର ନେତା ଜୟ ନାରାୟଣ ମିଶ୍ର ଓ ବିଜେଡି ପ୍ରାର୍ଥୀ ଭାବେ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ମୈଦାନକୁ ଓହ୍ଲାଇଛନ୍ତି । ଏଭଳି ସ୍ଥିତିରେ କଂଗ୍ରେସ ଏଠାରେ ଦୁର୍ଗା ପାଢ଼ୀଙ୍କ ପରି ଏକ ନୂତନ ଚେହେରାଙ୍କୁ ପ୍ରାର୍ଥୀ କରିଛି ।
ଏହା ମଧ୍ୟ ପଢନ୍ତୁ .... ଭାରି ପଡ଼ିଲା ପୁଅ ପ୍ରେମ, କଂଗ୍ରେସରୁ ବହିଷ୍କାର ହେଲେ ସୁର - Sura Routray Expelled From Congress
ଅନ୍ୟପଟେ ଶିଳ୍ପ ବହୁଳ ରେଙ୍ଗାଲି ବିଧାନସଭା ଆସନରେ କଂଗ୍ରେସର ଟିକେଟ ପାଇଛନ୍ତି ଦିଲ୍ଲୀପ ଦୁରିଆ । ସେ ଦୀର୍ଘ ଦିନରୁ ବିଜେଡିରେ ଥିବା ବେଳେ ବିଜେଡିର ରାଜ୍ୟ ଯୁଗ୍ମ ସମ୍ପାଦକ ଥିଲେ । ତେବେ ଦଳ ଅବହେଳା କରୁଥିବା ଅଭିଯୋଗ କରି ସେ କଂଗ୍ରେସରେ ମିଶିବା ସହ ରେଙ୍ଗାଲି ଟିକେଟ ପାଇଛନ୍ତି । ସେ ଏଥର ନିର୍ବାଚନରେ ନିଯୁକ୍ତି ସମସ୍ୟା ଓ ଜମି ପଟ୍ଟା ସମସ୍ୟାକୁ ମୁଖ୍ୟ ମୁଦ୍ଦା କରିବେ ବୋଲି କହିଛନ୍ତି । ଏଥର ରେଙ୍ଗାଲିର ସ୍ବାଭିମାନୀ ମାଟି ପରିବର୍ତ୍ତନ ଚାହେଁ ବୋଲି କହିଛନ୍ତି ଦିଲ୍ଲୀପ । ଦିଲ୍ଲୀପ ରେଙ୍ଗାଲି ଅଞ୍ଚଳରେ ଯୁବପିଢିଙ୍କ ମଧ୍ୟରେ ଭଲ ଲୋକପ୍ରିୟ ଥିବା ବେଳେ ସମାଜସେବା ମଧ୍ୟ କରି ଆସୁଛନ୍ତି l ତେଣୁ ଚଳିତ ନିର୍ବାଚନରେ ସେ କଂଗ୍ରେସର ପକେଟ ଭୋଟ ସହ ବିଜେଡିର କିଛି ଭୋଟ କାଟି ନିଜ ଆଡକୁ ଆଣି ପାରନ୍ତି । ଫଳରେ କଂଗ୍ରେସର ଭୋଟ ସଂଖ୍ୟା ବୃଦ୍ଧି କରିବ ବୋଲି ଆଶା କରାଯାଉଛି ।
ସେହିପରି ଆଦିବାସୀ ଅଧ୍ୟୁଷିତ କୁଚିଣ୍ଡା ବିଧାନସଭା ଆସନରେ କଂଗ୍ରେସ ଦଳ ନୂଆ ଚେହେରା କେଦାର ବରିହାଙ୍କୁ ଟିକେଟ ଦେଇଛି । କେଦାର ବରିହା ପୂର୍ବରୁ ଜମେନକେରା ବ୍ଲକ ଅଧ୍ୟକ୍ଷ ଥିବା ବେଳେ ବର୍ତ୍ତମାନ ସେ ଟିକବା ପଞ୍ଚାୟତର ସମିତି ସଭ୍ୟ ଅଛନ୍ତି । ସେ ଏଥର ବିଜେଡି ଓ ବିଜେପି ସରକାରଙ୍କ ବିଫଳତାକୁ ଲୋକଙ୍କ ନିକଟରେ ପହଞ୍ଚାଇବା ସହ କଂଗ୍ରେସର ୫ ନ୍ୟାୟ ଓ ୨୫ ଗ୍ୟାରେଣ୍ଟିକୁ ଘରକୁ ଘର ପହଞ୍ଚାଇ ଜୟଯୁକ୍ତ ହେବେ ବୋଲି ଆଶା ପ୍ରକଟ କରିଛନ୍ତି କେଦାର । ସମଗ୍ର ଜମେନକିରା ବ୍ଲକ ଅଞ୍ଚଳରେ କେଦାରଙ୍କ ଭଲ ସଂଗଠନ ରହିଥିବାରୁ ସେହି ଅଞ୍ଚଳରେ କଂଗ୍ରେସର ଭୋଟ ବୃଦ୍ଧି ହୋଇପାରେ ।
ରେଢ଼ାଖୋଲ ବିଧାନସଭା ଆସନ ପାଇଁ କଂଗ୍ରେସ ଦଳ ପୁଣି ଥରେ ବରିଷ୍ଠ ନେତା ଆସଫ ଅଲ୍ଲୀ ଖାଁଙ୍କୁ ଟିକେଟ ଦେଇଛି । ଆସଫ ପୂର୍ବରୁ 3 ଥର କଂଗ୍ରେସ ପ୍ରାର୍ଥୀ ହୋଇ ପରାଜିତ ହୋଇଥିଲେ ମଧ୍ୟ ଦଳ ପୁଣି ଥରେ ତାଙ୍କ ଉପରେ ଆସ୍ଥା ପ୍ରକଟ କରିଛି । ମୁଖ୍ୟତଃ ଆସଫଙ୍କ ରେଢ଼ାଖୋଲ ଅଞ୍ଚଳରେ ଭଲ ସଂଗଠନ ରହିଥିବା ବେଳେ ବର୍ଷ ତମାମ ସେ ଲୋକଙ୍କ ସହ ରହିଛନ୍ତି । ଏଥରର ସେ ରେଢାଖୋଲର ମୌଳିକ ସମସ୍ୟା ଯଥା ଦାଦନ ସମସ୍ୟା, ଶିକ୍ଷା ସମସ୍ୟା, ନିଯୁକ୍ତି ଅଭାବ ଭଳି ପ୍ରସଙ୍ଗକୁ ଅସ୍ତ୍ର କରିବେ ବୋଲି ସୂଚନା ଦେଇଛନ୍ତି । ଗତ ନିର୍ବାଚନରେ ସେ ଦ୍ଵିତୀୟ ସ୍ଥାନରେ ରହିଥିଲେ । ତେବେ ଏହି ୪ଟି ସିଟରେ କଂଗ୍ରେସର ପ୍ରାର୍ଥୀମାନେ ନିଜର ରଣନୀତି ଫଳରେ ଲୋକଙ୍କ ଭୋଟ ହାତେଇବାରେ ସଫଳ ହେବେ କି ନାହିଁ ତାହା ସମୟ କହିବ ।
ଇଟିଭି ଭାରତ, ସମ୍ବଲପୁର
