ଭୁବନେଶ୍ବର: ସଂସଦରେ ନୂତନ ଭାବେ ନିର୍ବାଚିତ ହୋଇ ଆସିଥିବା ସାଂସଦମାନେ ଶପଥ ଗ୍ରହଣ କରିବେ । ଆସନ୍ତା ୨୪ ତାରିଖରୁ ଶପଥ ଗ୍ରହଣ କାର୍ଯ୍ୟକ୍ରମ ଅନୁଷ୍ଠିତ ହେବ । ଏହାପୂର୍ବରୁ ଲୋକସଭା ପାଇଁ ନିଯୁକ୍ତ ହୋଇଛନ୍ତି କାମଚଳା ବାଚସ୍ପତି । କଟକର ଲୋକସଭା ସାଂସଦ ଭର୍ତ୍ତୃହରି ମହତାବ ହୋଇଛନ୍ତି ଲୋକସଭାର କାମଚଳା ବାଚସ୍ପତି । ଭର୍ତ୍ତୃହରିଙ୍କୁ କାମଚଳା ବାଚସ୍ପତି ବା ପ୍ରୋ-ଟେମ ସ୍ପିକର ଭାବେ ନିଯୁକ୍ତି ଦେଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ତେବେ ଶପଥ ଗ୍ରହଣ ପାଇଁ ଆଜି (ଶନିବାର) ସନ୍ଧ୍ୟାରେ ଦିଲ୍ଲୀ ଅଭିମୁଖେ ବାହାରି ଯାଇଛନ୍ତି ଓଡିଶାର ବିଜେପି ସାଂସଦମାନେ ।
ଏହି ଅବସରରେ ନିଜ ମାତୃଭାଷା ତଥା ସାନ୍ତାଳୀ ଭାଷାରେ ଶପଥ ଗ୍ରହଣ କରିବେ ବୋଲି କହିଛନ୍ତି ମୟୂରଭଞ୍ଜ ସାଂସଦ ନବ ଚରଣ ମାଝୀ । ଆଗାମୀ ଦିନରେ କିଭଳି ସାନ୍ତାଳୀ ଭାଷା ଲୋକ ଲୋଚନକୁ ଆସିବ ଏବଂ ଏହାର ପ୍ରଚାର ପ୍ରସାର କିଭଳି ହେବ ସେନେଇ ରାଜ୍ୟ ଏବଂ କେନ୍ଦ୍ର ସରକାରଙ୍କ ସହିତ ଆଲୋଚନା କରିବେ ବୋଲି କହିଛନ୍ତି ନବ ଚରଣ ମାଝୀ । ବାଲେଶ୍ବର ସାଂସଦ ପ୍ରତାପ ଷଡ଼ଙ୍ଗୀ କହିଛନ୍ତି, "ଓଡ଼ିଶାର ଗୁରୁତ୍ବ ବଢିଯାଇଛି । ବିଜେଡି ପାର୍ଲିଆମେଣ୍ଟରୁ ଆଉଟ ହୋଇଯାଇଛି । କଂଗ୍ରେସ ମାତ୍ର ଗୋଟିଏ ସିଟ୍ରେ ଜିତିଛି । ଜଣେ ଓଡ଼ିଆ ସାଂସଦ ବାଚସ୍ପତି ଭାବରେ ଶପଥ ପାଠ କରାଇବେ । ଏହା ମଧ୍ୟ ଗର୍ବର ବିଷୟ । ମୁଁ ସଂସ୍କୃତରେ ଶପଥ ପାଇଁ ଲେଖିକି ଦେଇଛି । ଅନୁମତି ମିଳିଲେ ସଂସ୍କୃତ ଭାଷାରେ ଶପଥ ନେବି ।"
ଆସ୍କା ସାଂସଦ ଅନୀତା ପ୍ରିୟଦର୍ଶିନୀ ପ୍ରତିକ୍ରିୟାରେ କହିଛନ୍ତି, "ଓଡିଶାବାସୀ ଏକ ଗୁରୁଦାୟିତ୍ବ ଦେଇଛନ୍ତି । ବିଜେପିର ୨୦ ସାଂସଦଙ୍କୁ ନିର୍ବାଚିତ କରି ସଂସଦ ପଠାଇଛନ୍ତି । ଓଡିଶାର ଭାଷା, ସ୍ବର ଏବଂ ସମସ୍ୟାକୁ ଦିଲ୍ଲୀ ଦରବାରରେ ଉଠାଇ, ତାର ସମାଧାନ କିଭଳି କରାଯାଇ ପାରିବ ସେ ଗୁରୁଦାୟିତ୍ବ ଆମକୁ ଦିଆଯାଇଛି । ସେ ଆଶା ଭରଷାକୁ ଆମେ ଭାଙ୍ଗିବୁ ନାହିଁ । ଓଡ଼ିଆ ଭାଷାରେ ମୁଁ ଶପଥ ନେବି । ଓଡ଼ିଆ ଅସ୍ମିତା, ଓଡ଼ିଆ ଭାଷା, ସ୍ବାଭିମାନ ଓ ସମ୍ମାନର ଲଢେଇ ଥିଲା । ପ୍ରତ୍ୟେକ ଓଡ଼ିଆର ବିଜୟ ହୋଇଛି । ପ୍ରତ୍ୟେକ ଓଡ଼ିଆଙ୍କ ସ୍ବର ହିଁ ସେଠି କାଲି ଶପଥ ନେବ । ଓଡ଼ିଆ ଜାତି କାଲି ଶପଥ ନେବ । ଲୋକଙ୍କର ଆଶା ଆକାଂକ୍ଷା ଅଛି ଆମ ଉପରେ । କେବେ ନିରାଶ ହେବାକୁ ଦେବୁନି । ଆମର ଗୋଟିଏ ଦାୟିତ୍ବ ଓଡିଶାର ସମସ୍ୟା ଦିଲ୍ଲୀ ଦରବାରରେ ପହଞ୍ଚାଇବା । ସେସବୁର ସମଧାନ ସହିତ ଓଡିଶାର ଲୋକେ କିପରି ସମ୍ମାନ ଓ ସ୍ବାଭିମାନ ସହକାର ବଞ୍ଚିବେ ତାହା ଆମର ଦାୟିତ୍ବ ରହିବ ।" ସେପଟେ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ କହିଛନ୍ତି, "ମୁଁ ଓଡ଼ିଆ ଭାଷାରେ ଶପଥ ନେବି । ସବୁଠୁ ବଡ଼ କଥା ହେଲା ସଂସଦରେ କାମଚଳା ବାଚସ୍ପତି ଆମକୁ ଶପଥ ପାଠ କରାଇବେ । ଏହା ବଡ଼ ଖୁସିର କଥା ।"
ଇଟିଭି ଭାରତ, ଭୁବନେଶ୍ବର
