ଭୁବନେଶ୍ବର: ଡି ଏସ କୁଟ୍ଟେଙ୍କ ବିରୋଧରେ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହେଲା ବିଜେପି । ପୂର୍ବତନ ରାଜ୍ୟ ବିଜେପି ସଭାପତି ସମୀର ମହାନ୍ତିଙ୍କ ନେତୃତ୍ୱରେ ବିଜେପି ପ୍ରତିନିଧି ଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଛନ୍ତି । ପୂର୍ବତନ ରାଜ୍ୟ ସଭାପତି ସମୀର ମହାନ୍ତିଙ୍କ ନେତୃତ୍ୱରେ ବିଜେପି ପ୍ରତିନିଧି ଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଛନ୍ତି । ସମୀର ମହାନ୍ତି କହିଛନ୍ତି, "କୁଟ୍ଟେ ପୂର୍ବରୁ ସମସ୍ତ ନିର୍ବାଚନ କାର୍ଯ୍ୟରେ ସମ୍ପୃକ୍ତ ଥିଲେ। କିନ୍ତୁ ଏବେ ନିର୍ବାଚନ ଆଦର୍ଶ ଆଚରଣ ବିଧି ଲାଗୁ ହୋଇଛି, ଭାରତୀୟ ନିର୍ବାଚନ ଆୟୋଗ ଦିଲ୍ଲୀରୁ ଚିଠି ଲେଖିଛନ୍ତି ଯେ ତାଙ୍କୁ ନିର୍ବାଚନ କାମରେ ଲଗାଇବେ ନାହିଁ । କିନ୍ତୁ କୁଟ୍ଟେ ଆଇଆଇସି ଓ ଏସପି, ରାଜନୈତିକ ଲୋକମାନଙ୍କୁ ଫୋନ କରି ଦଳୀୟ ଆଧାରରେ କାର୍ଯ୍ୟ କରୁଛନ୍ତି । ରାଜ୍ୟରେ ନିର୍ବାଚନ ଆଚରଣ ବିଧିର ଉଲଂଘନ ହେଉଛି ।" ଏନେଇ ମୁଖ୍ୟ ନିର୍ବାଚନ ଅଧିକାରୀଙ୍କୁ ଜଣାଇଛି ବିଜେପି ।
ଡି ଏସ କୁଟ୍ଟେଙ୍କ ସବୁ ମୋବାଇଲ ସିଜ କରି ସିଡିଆର ଯାଞ୍ଚ କରିବା ସହ କାହା ସହ ଫୋନରେ କଥା ହେଉଛନ୍ତି, ଏହା ସାର୍ବଜନୀନ କରାଯାଉ ବୋଲି ଦାବି କରିଛି ବିଜେପି ପ୍ରତିନିଧି ଦଳ । ସେହିପରି ଏକ ସର୍ଭେ ସଂସ୍ଥାର ରିପୋର୍ଟ ନିର୍ଦ୍ଦିଷ୍ଟ ଖବରକାଗଜରେ ଦୁଇ ଦିନ ତଳେ ଛପା ଯିବାକୁ ନେଇ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହେଲା ବିଜେପି । ଅଭିଯୋଗ ଅନୁସାରେ, ଗୋଟିଏ ସର୍ଭେ ସଂସ୍ଥା ରିପୋର୍ଟ ଦେଇଛି ଯେ 66 ଭାଗ ଲୋକ ନବୀନ ପଟ୍ଟନାୟକଙ୍କୁ ଓଡ଼ିଶାର ମୁଖ୍ୟମନ୍ତ୍ରୀ ଭାବେ ଚାହୁଁଛନ୍ତି । ଏହାକୁ ନିର୍ଦ୍ଦିଷ୍ଟ ସର୍ବ ପୁରାତନ ଖବରକାଗଜରେ ପେଡ୍ ନ୍ୟୁଜ ଭାବେ ଛପାଯାଇଛି । ଏହାଦ୍ବାରା ଆଦର୍ଶ ଆଚରଣ ବିଧି ଉଲଙ୍ଘନ ହୋଇଛି ବୋଲି ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଅଭିଯୋଗ କରିବା ସହ କାର୍ଯ୍ୟାନୁଷ୍ଠାନ ପାଇଁ ଦାବି କରିଛି ଦଳ ।
ପୂର୍ବତନ ରାଜ୍ୟ ବିଜେପି ସଭାପତି ସମୀର ମହାନ୍ତି ଆହୁରି ମଧ୍ୟ କହିଛନ୍ତି, "ଓଡି଼ଶା ବୋଧହୁଏ ଏକମାତ୍ର ରାଜ୍ୟ ଯେଉଁଠି ପ୍ରଶାସନିକ ଅଧିକାରୀମାନେ ଶାସକ ଦଳର ଗୁଣ୍ଡାଭଳି କାର୍ଯ୍ୟ କରିବା ସହ କର୍ମୀ ସାଜି ନିର୍ବାଚନ ପ୍ରଚାର ମଧ୍ୟ କରନ୍ତି । ନିର୍ବାଚନ ଆସିଲେ ବିଜୁ ଜନତା ଦଳ ସରକାରୀ କର୍ମଚାରୀମାନଙ୍କୁ ନିଜର କର୍ମୀ ଭଳି ବ୍ୟବହାର କରେ । ଯାହାର ନମୁନା ବିଗତ ଦିନମାନଙ୍କରେ ଦେଖାଯାଇଛି ଏବଂ ବର୍ତ୍ତମାନ ମଧ୍ୟ ଜାରି ରହିଛି । ସରକାରୀ କର୍ମଚାରୀଙ୍କୁ ଦଳୀୟ କାର୍ଯ୍ୟରେ ଲଗାଇବାରୁ ରାଜ୍ୟ ସରକାର ବିଚ୍ୟୁତ ରୁହନ୍ତୁ । ଯଦି ନରହିବେ ତାହାଲେ କିଛିଦିନ ତଳେ ନିର୍ବାଚନ କମିଶନ ଯେଉଁଭଳି ରାଜ୍ୟର ୫ଜଣ ବରିଷ୍ଠ ଆଇପିଏସ ଅଫିସର ଓ ୨ଜଣ ଆଇଏଏସଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି, ସେହିଭଳି ସ୍ଥିତି ଉତ୍ପନ ହେବ ।"
ଇଟିଭି ଭାରତ, ଭୁବନେଶ୍ବର
