ଢେଙ୍କାନାଳ: ଭୋଟରଙ୍କୁ ପ୍ରଭାବିତ କରିବାକୁ ଶାଢୀ ବାଣ୍ଟିଲେ ବିଜେଡି ବିଧାୟକ ପ୍ରାର୍ଥୀ । ଢେଙ୍କାନାଳ ପରଜଙ୍ଗ ବିଧାୟକ ତଥା ବିଜେଡି ବିଧାୟକ ପ୍ରାର୍ଥୀ ନୃସିଂହ ଚରଣ ସାହୁ ଏକ ସାଧାରଣ ସଭାରେ ମହିଳାଙ୍କୁ ଶାଢୀ ବାଣ୍ଟି ନିର୍ବାଚନ ଆଚରଣ ବିଧିର ଉଲ୍ଲଘଂନ କରିଛନ୍ତି । ଏନେଇ ଅଭିଯୋଗ ମିଳିବା ପରେ ଆକ୍ସନ ମୁଡକୁ ଆସିଛନ୍ତି ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଅମ୍ରିତ ଋତୁରାଜ । ଯାଞ୍ଚ ରିପୋର୍ଟକୁ ଆଧାର କରି ବିଧାୟକଙ୍କ ବିରୋଧରେ ଥାନାରେ ମାମଲା ରୁଜୁ କରିବାରୁ ସେ ଏସପିଙ୍କୁ ଲିଖିତ ଭାବେ ନିର୍ଦ୍ଦେଶ ଦେଇଛନ୍ତି ।
ସୂଚନା ମୁତାବକ, ଗତ ୩୧ ତାରିଖରେ ପରଜଙ୍ଗ ନିର୍ବାଚନ ମଣ୍ଡଳୀ ଅନ୍ତର୍ଗତ କଙ୍କଡ଼ାହାଡ଼ ବ୍ଲକ ପିତଳଧୁଆ ଗ୍ରାମ ବେଲ୍ଲାବଣିଆ ସାହିରେ ପରଜଙ୍ଗ ବିଧାୟକ ନୃସିଂହ ଚରଣ ସାହୁ ଏକ ସାଧାରଣ ସଭାରେ ଯୋଗ ଦେଇଥିଲେ । ସେଠାରେ ୧୦ରୁ ୨୦ ଜଣ ଲୋକଙ୍କ ସମେତ ସ୍ୱତନ୍ତ୍ର ଉନ୍ନୟନ ପରିଷଦର ସଭ୍ୟ କରୁଣାକର ହେମ୍ବ୍ରମ ମଧ୍ୟ ଉପସ୍ଥିତ ରହିଥିଲେ l ଏହି ସଭାରେ ବିଧାୟକ ଲୋକମାନଙ୍କୁ ବାଦ୍ୟଯନ୍ତ୍ର ଓ ମହିଳାମାନଙ୍କୁ ଶାଢୀ ବଣ୍ଟନ କରିଥିଲେ l ଯାହାକି ନିର୍ବାଚନ ଆଚରଣ ବିଧିର ଉଲ୍ଲଂଘନ l ଆଚରଣ ବିଧି ଅନୁଯାୟୀ ଏହା ବଳବତ୍ତର ଥିବାବେଳେ କେହି ବି ନେତା ଭୋଟରକୁ ପ୍ରଭାବିତ କଲାଭଳି କୌଣସି ଦ୍ରବ୍ୟ କିମ୍ବା ଉପହାର ଦେଇପାରିବେ ନାହିଁ l ଏହି ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ନିର୍ବାଚନ ଅଧିକାରୀ ।
ଏହା ମଧ୍ୟ ପଢନ୍ତୁ: ଆଚରଣବିଧି ଉଲ୍ଲଙ୍ଘନ କରୁଛି ବିଜେଡ଼ି, ନିର୍ବାଚନ ଅଧିକାରୀଙ୍କୁ ଭେଟିଲା ବିଜେପି - Bjp Meet Ceo
ଏହା ମଧ୍ୟ ପଢନ୍ତୁ: ବାଜିଲା ନିର୍ବାଚନ ବିଗୁଲ, ଲାଗୁ ହେଲା ଆଚରଣ ସଂହିତା; ଜାଣନ୍ତୁ କଣ ଏହି କଟକଣା
ଏ ସମ୍ପର୍କରେ କଙ୍କଡ଼ାହାଡ଼ ବ୍ଲକ ଉନ୍ନୟନ ଅଧିକାରୀ, ଫ୍ଲାଇଙ୍ଗ ସ୍କ୍ବାର୍ଡ ଓ ପରଜଙ୍ଗ ବିଧାନସଭା କ୍ଷେତ୍ରର ରିଟର୍ଣ୍ଣିଂ ଅଫିସରଙ୍କ ତଦନ୍ତ ରିପୋର୍ଟ ଆଧାରରେ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଅମ୍ରିତ ଋତୁରାଜ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ମାମଲା ଦାୟର ସହିତ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ।
ପ୍ରକାଶ ଥାଉକି, ଆଚରଣ ବିଧି ଅନୁଯାୟୀ ଏହା ଲାଗୁ ହେବା ପରେ ନିର୍ଦ୍ଦିଷ୍ଟ ରାଜନୈତିକ ଦଳକୁ ଲାଭ ଦେଉଥିବା କୌଣସି କାର୍ଯ୍ୟରେ ସାଧାରଣ ବା ସରକାରୀ ଟଙ୍କା ଖର୍ଚ୍ଚ ହୋଇପାରିବ ନାହିଁ । କୌଣସି ଦଳ କିମ୍ବା ପ୍ରାର୍ଥୀଙ୍କ ସ୍ବାର୍ଥ ପାଇଁ ସରକାରୀ ଯାନ ବ୍ୟବହାର କରାଯିବ ନାହିଁ । କୌଣସି ପ୍ରକାର ସରକାରୀ ଘୋଷଣା, ଉଦଘାଟନ, ଭିତ୍ତିପ୍ରସ୍ଥର ସ୍ଥାପନ ଆଦି କାର୍ଯ୍ୟ କରାଯାଇପାରିବ ନାହିଁ । ଏହି ସମୟରେ ସରକାର ଭୋଟରଙ୍କୁ ପ୍ରଭାବିତ କଲାଭଳି କୌଣସି ମାଗଣା ଅଥବା ଲୋଭନୀୟ ଘୋଷଣା କରିପାରିବେ ନାହିଁ ।
ଇଟିଭି ଭାରତ, ଢେଙ୍କାନାଳ
