ଭୁବନେଶ୍ବର: ନିର୍ବାଚନ ହାରିବା ଜାଣିବା ପରେ ବିଜେପି ହିଂସାର ବାଟ ଆପଣାଇଥିବା ଅଭିଯୋଗ କରିଛି ବିଜେଡ଼ି । ଗତକାଲି ରାତିରେ ବିଜେପି ପୁଣି ଥରେ ରକ୍ତମୁଖା ହୋଇଥିଲା । ଭଦ୍ରକ ଜିଲ୍ଲା ବାସୁଦେବପୁର ନିର୍ବାଚନ ମଣ୍ଡଳୀର ସାନକୃଷ୍ଣପୁର ପଞ୍ଚାୟତ ଚାନ୍ଦିମାଳ ଗାଁରେ ଥିବା ବିଜେଡି କାର୍ଯ୍ୟାଳୟକୁ ଭଙ୍ଗାରୁଜା କରିଛି ବିଜେପି । ଯାହାର ଅଭିଯୋଗରେ ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଦ୍ୱାରସ୍ଥ ହୋଇଛି ବିଜେଡି । ବିଜେଡିର ଏକ ପ୍ରତିନିଧି ମଣ୍ଡଳୀ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ପ୍ରମାଣ ସହିତ ଅଭିଯୋଗ କରିଛନ୍ତି ।
ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିବା ପରେ ବିଜେଡି ମୁଖପାତ୍ର ମହିକ୍ଷିତା ମିଶ୍ର କହିଛନ୍ତି ଯେ, 2024 ନିର୍ବାଚନରେ ଶୋଚନୀୟ ପରାଜୟ ବରଣ କରିବାକୁ ଯାଉଛନ୍ତି ବୋଲି ବିଜେପି ଜାଣିସାରିଛି । ନିର୍ବାଚନ ହାରିବା ଜାଣିବା ପରେ ବିଜେପି ହିଂସାର ବାଟ ଆପଣାଇଛି । ଗତକାଲି ରାତିରେ ବିଜେପି ପୁଣି ଥରେ ରକ୍ତ ମୁଖା ହୋଇଛି । ଗତକାଲି ରାତିରେ ଭଦ୍ରକ ଜିଲ୍ଲା ବାସୁଦେବପୁର ନିର୍ବାଚନ ମଣ୍ଡଳୀର ସାନକୃଷ୍ଣପୁର ପଞ୍ଚାୟତ ଚାନ୍ଦିମାଳ ଗାଁରେ ଥିବା ବିଜେଡି କାର୍ଯ୍ୟାଳୟକୁ ଭଙ୍ଗାରୁଜା କରିଛନ୍ତି । ବିଜେପି ବିଧାୟକ ପ୍ରାର୍ଥୀ ବାଣୀ କଲ୍ୟାଣ ମହାନ୍ତିଙ୍କର ଜଣେ ସମର୍ଥକ ଦିନେଶ ନାୟକ ଓ ତାଙ୍କର ସାଥୀ ଏହି କାର୍ଯ୍ୟ କରିଥିବା କହିଛି ବିଜେଡି । ଜବରଦସ୍ତ ବିଜେଡି କାର୍ଯ୍ୟାଳୟରେ ପଶି ଆସବାବପତ୍ର ଭଙ୍ଗାରୁଜା କରିଛନ୍ତି । ବିଜେଡି କର୍ମୀଙ୍କୁ ମାଡ ମାରିବା ସହ ଧମକ ମଧ୍ୟ ଦେଇଛନ୍ତି ।
