ଭୁବନେଶ୍ବର: ଭୁବନେଶ୍ବର ସାଂସଦ ତଥା ବିଜେପିର ଭୁବନେଶ୍ବର ବିଜେପି ସାଂସଦ ପ୍ରାର୍ଥୀ ଅପରାଜିତା ଷଡଙ୍ଗୀ ବାରମ୍ବାର ଆଦର୍ଶ ଆଚରଣ ବିଧି ଉଲ୍ଲଙ୍ଘନ କରୁଥିବା ନେଇ ପୁଣି ଅଭିଯୋଗ ଆଣିଲା ବିଜେଡି । ଶିଶୁଙ୍କୁ ନିର୍ବାଚନ ପ୍ରଚାରରେ ଅପରାଜିତା ବ୍ୟବହାର କରୁଥିବା ଅଭିଯୋଗ । ବହୁବାର ଅଭିଯୋଗ ପରେ ବି ବଦଳୁନାହିଁ ମ୍ୟାଡାମ ଅପରାଜିତାଙ୍କ ଅଭ୍ୟାସ । ଏଭଳି ଅଭିଯୋଗ ସହ ପୁନର୍ବାର ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଦ୍ବାରସ୍ଥ ହୋଇଛି ବିଜେଡି ।
କିଛିଦିନ ତଳେ ଖୋର୍ଦ୍ଧା ଓ ଭୁବନେଶ୍ବରରେ ପ୍ରଚାର ବେଳେ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ଶିଶୁଙ୍କ ବେକରେ ଦଳୀୟ ଉତ୍ତରୀୟ ପକାଇ ବୁଲାଇଥିଲେ । ନିର୍ବାଚନରେ ଶିଶୁଙ୍କୁ ବ୍ୟବହାର କରିବା ସମ୍ପୂର୍ଣ୍ଣ ମନା । କିନ୍ତୁ ଅପରାଜିତା ଶିଶୁଙ୍କୁ ନିର୍ବାଚନ ପ୍ରଚାରରେ ବାରମ୍ବାର ବ୍ୟବହାର କରୁଛନ୍ତି । ଏହି ଅଭିଯୋଗ କରି ଆଜି ବିଜେଡିର ଏକ ପ୍ରତିନିଧି ଦଳ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଛି । ବିଜେଡି ମୁଖପାତ୍ର ଇପ୍ସିତା ସାହୁ କହିଛନ୍ତି, "ଆମ ଅଭିଯୋଗ ଅତ୍ୟନ୍ତ ସମ୍ବେଦନଶୀଳ । ରାଜ୍ୟରେ ଗ୍ରୀଷ୍ମପ୍ରବାହ ବହୁମାତ୍ରାରେ ବଢିଛି । ଆମେ ସମସ୍ତେ ପ୍ରଭାବିତ ହେଉଛନ୍ତି । ପ୍ରକୃତିର ତାଣ୍ଡବଲୀଳାରେ ମଣିଷ ଓ ପଶୁପକ୍ଷୀ ପ୍ରଭାବିତ ହେଉଛନ୍ତି । ଏଭଳି ସ୍ଥିତିରେ ବିଭିନ୍ନ ସ୍ଥାନରେ ପ୍ରଚାରବେଳେ ଛୋଟ ଛୁଆଙ୍କ ବେକରେ ଉତ୍ତରୀୟ ପକାଇ ସେମାନଙ୍କୁ ସାଙ୍ଗରେ ଧରି ପ୍ରଚାର କରାଉଛନ୍ତି ଅପରାଜିତା ।"
ଇପ୍ସିତା ଆହୁରି ମଧ୍ୟ କହିଛନ୍ତି, "ଭୁବନେଶ୍ବର ସାଂସଦ ତଥା ବିଜେପି ପ୍ରାର୍ଥୀ ବାରମ୍ବାର ଆଦର୍ଶ ଆଚରଣ ବିଧି ଉଲ୍ଲଙ୍ଘନ କରିଚାଲିଛନ୍ତି । ଭୁବନେଶ୍ବରର ବିଭିନ୍ନ ସ୍ଥାନରେ ପ୍ରଚାରବେଳେ ଛୋଟ ଛୁଆଙ୍କ ବେକରେ ଉତ୍ତରୀୟ ପକାଇ ସେମାନଙ୍କୁ ସାଙ୍ଗରେ ଧରି ସେ ବୁଲୁଥିଲେ । ଅପରାଜିତା ବାରମ୍ବାର ଏହା କରି ଚାଲିଛନ୍ତି । ଏହା ଅପରାଜିତାଙ୍କର ଏକ ଶସ୍ତା ରାଜନୀତି । ୨୨ ଏପ୍ରିଲରେ ଜଟଣୀରେ ଅପରାଜିତା ପ୍ରଚାର କରୁଥିଲେ । ଏକ ପ୍ରଚାର ବେଳେ ସ୍କୁଲରେ ଫେରୁଥିବା ପିଲାଙ୍କୁ ୪୨ ଡିଗ୍ରୀ ଖରାରେ ତାଙ୍କ ସାଙ୍ଗରେ ଧରି ପ୍ରଚାର କରାଇଛନ୍ତି । ଛୋଟ ପିଲାଙ୍କ ଜୀବନକୁ ବାଜି ଲଗାଇ ପ୍ରଚାରରେ ସାମିଲ କରିବା ନିନ୍ଦନୀୟ ଘଟଣା । ଯାହାର ଫଟୋ ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଦାଖଲ କରିଛୁ । ଅପରାଜିତାଙ୍କ ବିରୋଧରେ କଡାରୁ କଡା କାର୍ଯ୍ୟାନୁଷ୍ଠାନ ଗ୍ରହଣ କାରିବାକୁ ଦାବି କରିଛୁ । ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାଜ୍ୟ ନିର୍ବାଚନ ଅଧିକାରୀ ପ୍ରତିଶ୍ରୁତି ଦେଇଛନ୍ତି ।" ଏହି ପ୍ରତିନିଧି ଦଳରେ ବିଜେଡି ସାଂସଦ ସସ୍ମିତ ପାତ୍ର, ସୁଲତା ଦେଓ, ପ୍ରିୟବ୍ରତ ମାଝୀ, ମଧୁସ୍ମିତା ନାୟକ ପ୍ରମୁଖ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
