ଶୀତ ଦିନେ ଚର୍ମ ସମସ୍ୟା ସାଧାରଣ ହୋଇଥାଏ । ଶୀତଳ ପବନ ଓ ଶୁଷ୍କ ପାଗ ଆମ ଚର୍ମକୁ ଶୁଖିଲା ଓ ରୁକ୍ଷ କରିଦିଏ । ଏହି କାରଣରୁ ଓଠ, ହାତଗୋଡ ଫାଟିବା ଭଳି ସମସ୍ୟା ଦେଖାଯାଏ । ଧୀରେ ଧୀରେ ଚେହେରାରୁ ଚମକ କମିବା ଆରମ୍ଭ କରେ । ତେଣୁ ଶୀତ ଋତୁରେ ନିଜ ଚର୍ମର ବିଶେଷ ଯତ୍ନ ନେବା ଆବଶ୍ୟକ । ଏନେଇ ବିଶେଷଜ୍ଞଙ୍କ କହିବା କଥା, ଶୀତ ଦିନ ଆମର ସ୍ବାସ୍ଥ୍ୟ ଓ ଚର୍ମ ପାଇଁ ଅନୁକୂଳ ହୋଇନଥାଏ । ଏହି ସମୟରେ ଆମର କିଛି ସାଧାରଣ ଭୁଲ୍ ଡ୍ରାଏନେସ ସମସ୍ୟାକୁ ଆହୁରି ବଢାଇଦିଏ ଏବଂ ଚେହେରାରୁ ପ୍ରାକୃତିକ ଚମକ କମିଯାଏ । ତେବେ ଉପଯୁକ୍ତ ଯତ୍ନ ଏବଂ ଅଭ୍ୟାସ ମାଧ୍ୟମରେ ଆମେ ନିଜ ତ୍ବଚାର ଚମକ ବଜାୟ ରଖିପାରିବା ।
ଏହି ଖବରରେ ଜାଣନ୍ତୁ 5ଟି ଭୁଲ୍ ଯାହା ଶୀତ ଦିନେ ଆପଣଙ୍କ ଚର୍ମ ସମସ୍ୟା ଅଧିକ ବଢାଇଥାଏ ।
କମ୍ ପାଣି ପିଇବା: ସାଧାରଣତଃ ଶୀତ ଦିନେ ଥଣ୍ଡା ପାଗ ଯୋଗୁଁ କମ୍ ଶୋଷ ଲାଗିଥାଏ । ତେଣୁ ଲୋକମାନେ ମଧ୍ୟ କମ୍ ପାଣି ପିଇଥାନ୍ତି । ଏହାଦ୍ବାରା ଶରୀର ଡିହାଇଡ୍ରେଟ ହୋଇଯାଏ । ଡ୍ରାଏନେସ ସମସ୍ୟା ବଢିଯାଏ ଏବଂ ଚର୍ମ ରୁକ୍ଷ ହୋଇଯାଏ । ପାଣି କେବଳ ଚର୍ମକୁ ମଇଶ୍ଚରାଇଜ କରେ ନାହିଁ ବରଂ ଶରୀରରୁ ବିଷାକ୍ତ ଏବଂ ବର୍ଜ୍ୟ ପଦାର୍ଥ ବାହାର କରିବାରେ ମଧ୍ୟ ସାହାଯ୍ୟ କରେ । ଏଥିପାଇଁ ଶୀତ ଦିନେ ଦୈନିକ 8ରୁ 10 ଗ୍ଲାସ ପାଣି ପିଇବା ଉଚିତ୍ ।
ମଇଶ୍ଚରାଇଜର ବ୍ୟବହାର ନକରିବା: ଥଣ୍ଡା ବାୟୁ ତ୍ବଚାରୁ ନମନୀୟତା କମାଇ ଶୁଷ୍କ କରିଦିଏ । ଏପରି ସ୍ଥଳେ ଯଦି ଆପଣ ମଇଶ୍ଚରାଇଜର ଲଗାଉ ନାହାନ୍ତି ତେବେ ଚର୍ମ ଫାଟିବା ସହ ମଳିନ ଦେଖାଯାଏ । ଶୀତରୁ ତ୍ବଚାକୁ ହାଇଡ୍ରେଟ ରଖିବା ପାଇଁ ନିୟମିତ ଭାବେ ମଇଶ୍ଚରାଇଜର ବ୍ୟବହାର କରିବା ଉଚିତ୍ । ଖାସ୍ କରି ଗାଧୋଇବା ପରେ ହାତଗୋଡ ଓ ମୁହଁରେ ଲଗାନ୍ତୁ ।
ଗରମ ପାଣିରେ ଗାଧୋଇବା: ଶୀତ ଦିନେ ଥଣ୍ଡା ପାଣି ଦେଖିବା ମାତ୍ରେ ଡର ଲାଗେ । ଗରମ ପାଣିରେ ଆରାମ ଲାଗିଥାଏ । ଏହି କାରଣରୁ ଅଧିକାଂଶ ଲୋକେ ଶୀତ ଦିନେ ଗରମ ପାଣିରେ ଗାଧୋଇଥାନ୍ତି । ହେଲେ ଆପଣ ଜାଣନ୍ତି କି, ଗରମ ପାଣିରେ ଗାଧୋଇବା ଦ୍ବାରା ଚର୍ମରୁ ପ୍ରାକୃତିକ ତୈଳ ନଷ୍ଟ ହୋଇଯାଏ । ଏହାଦ୍ବାରା ଚର୍ମ ରୁକ୍ଷ ଓ ଶୁଷ୍କ ହୋଇଯାଏ । ଶୀତରେ ନଖ ଉଷୁମ ପାଣିରେ ଗୋଧୋଇବା ଭଲ । ଗାଧୋଇବା ପରେ ମଇଶ୍ଚରାଇଜର ଲଗାଇବାକୁ ଭୁଲିବେ ନାହିଁ ।
ଖରାରେ ନ ବସିବା: ଶୀତ ଦିନେ ଖରାରେ ବସିବାକୁ ଆରାମ ଲାଗିଥାଏ । କିନ୍ତୁ କିଛି ଲୋକ କଳା ପଡିଯିବା ବା ଟ୍ୟାନିଂ ଭୟରେ ଖରାଠୁ ଦୂରେଇ ରୁହନ୍ତି । ଏହାଯୋଗୁଁ ଶରୀରରେ ଭିଟାମିନ ଡି ଅଭାବ ହୋଇପାରେ । ଏହି ଭିଟାମିନ ଆମର ଚର୍ମ ଓ କେଶ ପାଇଁ ଜରୁରୀ ହୋଇଥାଏ । ତେଣୁ ପ୍ରତିଦିନ 10ରୁ 15 ମିନିଟ୍ ସୂର୍ଯ୍ୟକିରଣରେ ବସନ୍ତୁ । ଏହା ତ୍ବଚା ସୁସ୍ଥ ରଖିବା ସହ ସ୍ବାସ୍ଥ୍ୟ ପାଇଁ ମଧ୍ୟ ଲାଭଦାୟକ ।
ଅତ୍ୟଧିକ ଶୋଇବା: ଶୋଇବାକୁ କାହାକୁ ବା ଭଲ ଲାଗେନା ! ସୁସ୍ଥ ଶରୀର ପାଇଁ ଉପଯୁକ୍ତ ନିଦ୍ରା ଜରୁରୀ ହୋଇଥାଏ । କିନ୍ତୁ ଯେମିତି କୁହାଯାଏ- 'ଅତ୍ୟଧିକ ସବୁବେଳେ କ୍ଷତିକାରକ' । ଶୀତ ଦିନେ ଥଣ୍ଡା ପାଗ ଶରୀରକୁ ଅଳସୁଆ କରିଥାଏ । ସମସ୍ତେ କେବଳ ଶୋଇ ରହିବାକୁ ଭଲ ପାଆନ୍ତି । ହେଲେ ଅତ୍ୟଧିକ ଶୋଇବା ଆମ ସ୍ବାସ୍ଥ୍ୟ ପ୍ରତି ହାନିକାରକ ହୋଇଥାଏ । ଏହି କାରଣରୁ ବିଭିନ୍ନ ସ୍ବାସ୍ଥ୍ୟ ସମସ୍ୟା ମଧ୍ୟ ଦେଖାଯାଇପାରେ ।
ଏହା ମଧ୍ୟ ପଢନ୍ତୁ: ପ୍ରସବ ପରର ଅବସାଦ କ'ଣ ? କିପରି ମୁକୁଳିବେ ମହିଳା, ପରାମର୍ଶ ଦେଲେ ଡାକ୍ତର - POSTPARTUM DEPRESSION
ଏହା ମଧ୍ୟ ପଢନ୍ତୁ: କୋରାପୁଟ ଯାଉଥିଲେ ନିଶ୍ଚୟ ବୁଲନ୍ତୁ ଏହି 6 ପର୍ଯ୍ୟଟନସ୍ଥଳୀ - TOURIST PLACE IN KORAPUT
(Disclaimer- ଏଠାରେ ଦିଆଯାଇଥିବା ସମସ୍ତ ସୂଚନା କେବଳ ଆପଣଙ୍କ ଜାଣିବା ପାଇଁ । ଏହା ଉପରେ ବିଚାର କରିବା ପୂର୍ବରୁ ବିଶେଷଜ୍ଞଙ୍କ ପରାମର୍ଶ ନେବା ଭଲ ।)
