ଭୁବନେଶ୍ବର: ଦିଲ୍ଲୀ ଭଳି ବଡ଼ ବଡ଼ ସହରମାନଙ୍କରେ ବର୍ତ୍ତମାନ ମାତ୍ରାଧିକ ପ୍ରଦୂଷଣ ଯୋଗୁଁ କ୍ରନିକ ଅବ୍ଷ୍ଟ୍ରକ୍ଟିଭ୍ ପଲ୍ମୁନାରୀ ଡିଜିଜ୍ (chronic obstructive pulmonary disease) ବା COPD ସମସ୍ୟାକୁ ନେଇ ଉଦ୍ବେଗ ପ୍ରକାଶ ପାଇଛି । ମୁଖ୍ୟତଃ ବାୟୁ ପ୍ରଦୂଷଣ ଯୋଗୁଁ ସିଓପିଡି ରୋଗୀଙ୍କ ସଂଖ୍ୟା ବୃଦ୍ଧି ପାଉଛି । ସ୍ୱଚ୍ଛ ବାୟୁ ମିଳିବା ଏକପ୍ରକାର ଅସମ୍ଭବ ଲାଗୁଛି । ଲୋକମାନେ ନିଶ୍ବାସ ପ୍ରଶ୍ବାସ ନେବା କଷ୍ଟକର ହୋଇଯାଇଛି । ତେବେ କ'ଣ ଏହି ସିଓପିଡି ରୋଗ, କାହିଁକି ହୁଏ ଓ କିପରି ସୁସ୍ଥ ହେବେ ସେନେଇ ଅଧିକ ଆଲୋଚନା କରିଛନ୍ତି ଡାକ୍ତର ପ୍ରିୟଦର୍ଶିନୀ ପରିଡା ।
COPD କ'ଣ:-
ଡାକ୍ତରଙ୍କ କହିବା ଅନୁସାରେ, ସିଓପିଡି (COPD) ଏକ ସାଧାରଣ ରୋଗ । ଏହାର ଚିକିତ୍ସା ଓ ନିରାକରଣ କରାଯାଇପାରିବ । ଫୁସଫୁସ୍ରେ କୌଣସ ସମସ୍ୟା ହେଲେ ନିଶ୍ବାସ ପ୍ରଶ୍ବାସ ନେବାରେ କଷ୍ଟ ଅନୁଭବ ହୋଇଥାଏ । ଏହାକୁ ସିଓପିଡି କୁହାଯାଏ । ଧୂଳି, ଧୂଆଁ ଓ ଧୂମ୍ରପାନ ହେଉଛି ସିଓପିଡି ସମସ୍ୟାର ମୁଖ୍ୟ କାରଣ । ସେହିପରି ଗରୀବ ଶ୍ରେଣୀର ମହିଳାମାନେ ରୋଷେଇ ଘର ଚୁଲିରୁ ବାହାରୁ ଥିବା ଧୂଆଁ ଯୋଗୁଁ ସିଓପିଡି ସମସ୍ୟାର ଶିକାର ହୋଇଥାନ୍ତି ।
- ଶ୍ବାସକ୍ରିୟାରେ କଷ୍ଟ ଅନୁଭବ ହୁଏ । ଅନେକ ଦିନ ଯାଏ ଏହି ସମସ୍ୟା ଲାଗି ରହିଥାଏ । ଧୀରେ ଧୀରେ ଗୁରୁତର ହେବାରେ ଲାଗେ ।
- କାଶ ହୁଏ । ଶୁଖିଲା କାଶ ହୋଇପାରେ କିମ୍ବା ମୋଟା କଫ ମଧ୍ୟ ଆସିପାରେ । ଛାତିରେ ଯନ୍ତ୍ରଣା ହୁଏ ।
- ଥକ୍କା ଅନୁଭବ ହେବା । ନିଶ୍ବାସ ପ୍ରଶ୍ବାସ ନେବା ସମୟରେ ଛାତିରେ ଏକ ପ୍ରକାର ହ୍ବିସିଲ ଭଳି ଶବ୍ଦ ଆସିଥାଏ ।
- ଭୋକ କମିଯାଏ । ଦୁର୍ବଳ ଲାଗେ ଓ କିଛି କାମ କରିବାକୁ ଇଚ୍ଛା ହୁଏନାହିଁ ।
- କୌଣସି ବ୍ୟକ୍ତିଙ୍କଠାରେ ଏସବୁ ଲକ୍ଷଣ ଦେଖାଗଲେ COPD ବୋଲି କହିପାରିବା ।
COPD କାରଣ ଓ କେଉଁ ବୟସରେ ଦେଖାଯାଏ ?
ଆସ୍ଥାମା ସାଧାରଣତଃ ଛୋଟ ପିଲା ଏବଂ ଯୁବବର୍ଗଙ୍କୁ ହେଉଥିବାବେଳେ COPD ବିଶେଷ ଭାବରେ ୪୦ ବର୍ଷରୁ ଅଧିକ ବୟସର ବ୍ୟକ୍ତିଙ୍କୁ ହୋଇଥାଏ । ଏହାର ପ୍ରମୁଖ କାରଣଗୁଡିକ ହେଲା:-
ଧୂମ୍ରପାନ: ନିଜ ଧୂମ୍ରପାନ କରୁଥିଲେ କିମ୍ବା ଧୂମ୍ରପାନ କରୁଥିବା ବ୍ୟକ୍ତିଙ୍କ ନିକଟରେ ରହିଲେ ସିଓପିଡି ସମସ୍ୟା ହୋଇପାରେ ।
ଚୁଲି ଧୂଆଁ: ଗାଁ ଗହଳିରେ ଚୁଲିରେ ରୋଷେଇ କରୁଥିଲେ ଏଥିରୁ ବାହାରୁଥିବା ଧୂଆଁ ସଂସ୍ପର୍ଶରେ ଆସିବା ଯୋଗୁଁ ମଧ୍ୟ ହୋଇପାରେ ।
କେମିକାଲ କାରଖାନା: ଯେଉଁ ଲୋକମାନେ ଗ୍ୟାସ୍ କେମିକାଲ କାରଖାନା ଆଦିରେ କାମ କରୁଛନ୍ତି ସେମାନଙ୍କୁ ସିଓପିଡି ସମସ୍ୟା ଦେଖାଯାଇଥାଏ ।
ଶ୍ବାସ ରୋଗୀ: ପୁରୁଣା ଶ୍ବାସରୋଗ କିମ୍ବା ଟିବି ଥିବା ଲୋକଙ୍କ ମଧ୍ୟ ସିଓପିଡି ହେବାର ସମ୍ଭାବନା ଥାଏ ।
ବଂଶାନୁକ୍ରମିକ: ପରିବାର କାହାକୁ ହୋଇଥିଲେ ଅନ୍ୟ ସଦସ୍ୟଙ୍କୁ ହୋଇପାରେ । ଏଥିସହ ପ୍ରି-ମାଚୁଅର ବା ସମୟ ପୂର୍ବରୁ ଶିଶୁ ଜନ୍ମ ହୋଇଥିଲେ ଏବଂ ଛୋଟ ବେଳୁ ବାରମ୍ବାର ନିମୋନିଆ ସହ ଥଣ୍ଡା କାଶ କଫ ରହୁଥିଲେ ସେମାନଙ୍କୁ ସିଓପିଡି ରିସ୍କ ଅଧିକ ଥାଏ ।
COPD ଚିହ୍ନିବା ପାଇଁ ସ୍ପାଇରୋ ମେଟ୍ରିକ ଆବଶ୍ୟକ ଯାହାକୁ ପାଲ୍ମାନାରୀ ଫଙ୍କସନ ଟେଷ୍ଟ କୁହାଯାଇଥାଏ ।
COPDରୁ କିଭଳି ବର୍ତ୍ତିବା:
- ଧୂମ୍ରପାନରୁ ନିବୃତ୍ତ ରହିବା ଆବଶ୍ୟକ । ଯଦି ନିକୋଟିନ ବନ୍ଦ ହୋଇପାରୁନି ସେମାନଙ୍କୁ ନିକୋଟିନ ଥେରାପି, ଫରମାକୋ ଥେରାପି ଦିଆଯାଉଛି ।
- ଅଧିକ ଧୂଳି ଧୂଆଁ ସ୍ଥାନକୁ ଯିବାରୁ ଦୂରେଇ ରହିବା । ମାସ୍କ ବ୍ୟବାହାର କରିବା । କାଠ ଚୁଲା ବା ଷ୍ଟୋଭ ଧୂଆଁ ଦୂରରେ ରହିବା ।ଟିକକରଣ କରିବା ।
- ବିଶେଷ ଭାବରେ COPD ରୋଗୀମାନଙ୍କୁ ନିମୋନିଆ ହେବାର ସମ୍ଭାବନା ଥାଏ । ଏହି ରୋଗୀଙ୍କୁ ଟୀକାକାରଣ କରିବା ଆବଶ୍ୟକ ।
- ଶାରୀରିକ ଭାବରେ ସୁସ୍ଥ ରଖିବା । ନିୟମିତ ଭାବେ ବ୍ୟାୟମ ଯୋଗ କରିବା ଆବଶ୍ୟକ ।
- ସ୍ବାସ୍ଥ୍ୟକର ଖାଦ୍ୟ ସେବନ ଉପରେ ଅଧିକ ଗୁରୁତ୍ଵ ଦେବା ଆବଶ୍ୟକ ବୋଲି କହିଛନ୍ତି ଡାକ୍ତର ପ୍ରିୟଦର୍ଶିନୀ ପରିଡା ।
ଏହା ମଧ୍ୟ ପଢନ୍ତୁ: ଆଣ୍ଟିବାୟୋଟିକ୍ସ ଖାଉଛନ୍ତି କି ? ଡାକ୍ତର କହିଲେ ଜୀବନ ପାଇଁ ସାଜିପାରେ ବିପଦ ଏହା ମଧ୍ୟ ପଢନ୍ତୁ: ମଳରେ ରକ୍ତ ପଡିବା କେବଳ ମଳକଣ୍ଟକ ନୁହେଁ, ହୋଇପାରେ ଏହି କ୍ୟାନ୍ସର |
ଇଟିଭି ଭାରତ, ଭୁବନେଶ୍ବର
