ହାଇଦ୍ରାବାଦ: କଙ୍ଗନା ରାଣାୱତ ତାଙ୍କ ଅଭିନୟ ଏବଂ ସବୁ କ୍ଷେତ୍ରରେ ନିଜର ମତ ପ୍ରକାଶ କରିବା ପାଇଁ ଜଣାଶୁଣା । ଆଜିକାଲି କଙ୍ଗନା ରାଣାୱତ ରାଜନୀତିରେ ଏଣ୍ଟ୍ରି କରିବା ନେଇ ଶିରୋନାମାରେ ରହିଛନ୍ତି । ନିକଟରେ ଏକ ବାର୍ତ୍ତାଳାପ ସମୟରେ କଙ୍ଗନାଙ୍କୁ ପଚରାଯାଇଥିଲା ଯେ ସେ ଲୋକସଭା ନିର୍ବାଚନ ଲଢିବାକୁ ଯୋଜନା କରୁଛନ୍ତି କି? କଙ୍ଗନା ଏହି ପ୍ରଶ୍ନରେ ପ୍ରତିକ୍ରିୟା ଦେଇ କହିଛନ୍ତି ଯେ ରାଜନୀତିରେ ପ୍ରବେଶ କରିବାର ଏହା ହେଉଛି ଉପଯୁକ୍ତ ସମୟ ।
କଙ୍ଗନା ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରଶ୍ନର ଉତ୍ତରରେ ସେ କହିଛନ୍ତି, 'ମୁଁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବି କି ନାହିଁ ଘୋଷଣା କରିବାର ମୋର ଅଧିକାର ନାହିଁ। ତଥାପି, ମୁଁ ରାଜନୀତିରେ ନ ରହି ମଧ୍ୟ ଜଣେ ସଚେତନ ମହିଳା ଅଟେ । ମୁଁ ସବୁବେଳେ ମୋ ଦେଶ ପାଇଁ କାମ କରିଛି ।' ସେ ଆହୁରି ମଧ୍ୟ କହିଛନ୍ତି, 'ମୁଁ ଫିଲ୍ମ ସେଟରୁ ମଧ୍ୟ ରାଜନୈତିକ ଦଳ ସହ ଲଢିଛି। ମୁଁ ରାଜନୀତିରେ ଏଣ୍ଟ୍ରି କରେ କିମ୍ୱା ନ କରେ । ମୁଁ ମୋ ଦେଶ ପାଇଁ କାର୍ଯ୍ୟ ଜାରି ରଖିବି । ମୋତେ ଏସବୁ କରିବାକୁ କେହି ଅଟକାଇ ପାରିବେ ନାହିଁ । ଯଦିଓ, ଯଦି ମୁଁ ରାଜନୀତିରେ ପ୍ରବେଶ କରିବାର ସୁଯୋଗ ପାଏ, ତେବେ ମୁଁ ନିଶ୍ଚିତ ଭାବେ ରାଜନୀତିରେ ପ୍ରବେଶ କରିବାକୁ ଚାହେଁ ଏବଂ ମୁଁ ଭାବୁଛି ଏହା ହେଉଛି ଉପଯୁକ୍ତ ସମୟ ।'
ସେ ଆହୁରି କହିଛନ୍ତି, ଏହି ଦେଶ ଏବଂ ଦେଶର ଲୋକମାନେ ମୋତେ ବହୁତ ଭଲପାଇବା ଦେଇଛନ୍ତି । ମୁଁ ଉତ୍ତରୁ ଅଟେ, ହେଲେ ମୁଁ ଦକ୍ଷିଣରୁ କାମ କରିଆସିଛି । ମୁଁ ମୋ ଫିଲ୍ମରେ ଦିଲ୍ଲୀ ଏବଂ ହରିୟାଣାର ଝିଅଙ୍କ ଭୂମିକାରେ ଅଭିନୟ କରିଛି । ଏତିକି ନୁହଁ ମୁଁ ଝାନ୍ସୀ ରାଣୀଙ୍କ ଭୂମିକାରେ ମଧ୍ୟ ଅଭିନୟ କରିଛି । ଏହି ଦେଶ ମୋତେ ବହୁତ କିଛି ଦେଇଛି । ଏଣୁ ମୁଁ ମଧ୍ୟ ମୋ ଦେଶକୁ କିଛି ଦେବାକୁ ଚାହୁଁଛି । ମୁଁ ଏହି କଥା ଅନୁଭବ କରୁଛି ଯେ, ମୋତେ ବହୁତ ଭଲପାଇବା ମିଳୁଛି ଏବଂ ଲୋକେ ମୋର ପ୍ରଶଂସା ବି କରୁଛନ୍ତି ।
ଏହା ମଧ୍ୟ ପଢନ୍ତୁ: ଦେଶର ପ୍ରଧାନମନ୍ତ୍ରୀ ହେବାକୁ ଚାହାଁନ୍ତି କି କୁଇନ ? ଏପରି ଜବାବ ଦେଲେ ଅଭିନେତ୍ରୀ
କଙ୍ଗନାଙ୍କ ୱାର୍କଫ୍ରଣ୍ଟ କଥା କହିବାକୁ ଗଲେ, ତାଙ୍କୁ ଶେଷ ଚଳଚ୍ଚିତ୍ର 'ତେଜସ୍'ରେ ଦେଖିବାକୁ ମିଳିଥିଲା । ବର୍ତ୍ତମାନ ଅଭିନେତ୍ରୀଙ୍କୁ ଆଗାମୀ ଫିଲ୍ମ 'ଏମରଜେନ୍ସି' ରେ ଦେଖିବାକୁ ମିଳିବ, ଯାହାର ସେ ନିର୍ଦ୍ଦେଶନା ମଧ୍ୟ ଦେଇଛନ୍ତି । ଏହି ଫିଲ୍ମରେ କଙ୍ଗନା ପୂର୍ବତନ ଭାରତୀୟ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଭୂମିକାରେ ନଜର ଆସିବେ । ଏହି ଚଳଚ୍ଚିତ୍ରରେ ଅନୁପମ ଖେର ଏବଂ ଦିବଙ୍ଗତ ଅଭିନେତା ସତୀଶ କୌଶିକ ମଧ୍ୟ ଅଭିନୟ କରିଛନ୍ତି । ଏହି ଫିଲ୍ମ ଚଳିତ ବର୍ଷ ଜୁନ ୧୪ରେ ରିଲିଜ ହେବ ।
