ହାଇଦ୍ରାବାଦ: 2025 ବର୍ଷ ଆରମ୍ଭ ହୋଇଛି । ସାରା ଦେଶରେ ନୂଆବର୍ଷକୁ ଲୋକେ ଧୁମଧାମରେ ସେଲିବ୍ରେଟ କରିଛନ୍ତି । ଏପରି ସମୟରେ ସିନେପ୍ରେମୀଙ୍କ ପାଇଁ ମଧ୍ୟ ଖୁସି ଖବର ରହିଛି । ଚଳିତ ଜାନୁଆରୀ ମାସ ମନୋରଞ୍ଜନରେ ଭରପୁର ରହିବ । ନୂଆ ବର୍ଷ ଉତ୍ସବ ପରେ ଭାରତୀୟ ସିନେମା ଆପଣଙ୍କ ମନୋରଞ୍ଜନ ପାଇଁ ବଡ ପରଦାରେ ଅନେକ ଚଳଚ୍ଚିତ୍ର ମୁକ୍ତିଲାଭ କରିବାକୁ ଯାଉଛି । ଏହି ମାସରେ ରିଲିଜ ହେଉଛି ଅନେକ ଓଲିଉଡ ଫିଲ୍ମ ରିଲିଜ ଅପେକ୍ଷା ରହିଛି । ଓଡ଼ିଆ ଫିଲ୍ମ ୱାଇଫ୍ ଠାରୁ ରଙ୍ଗଶୁର ଯାଏଁ ଅନେକ ଫିଲ୍ମ ରିଲିଜ ହେବାକୁ ଯାଉଛି । ଜାନୁଆରୀ 2025 ରେ ରିଲିଜ୍ ହେବାକୁ ଥିବା ସମ୍ପୂର୍ଣ୍ଣ ଚଳଚ୍ଚିତ୍ରର ତାଲିକା ଉପରେ ନଜର ପକାନ୍ତୁ...
1. ୱାଇଫ୍
ନୂଆ ବର୍ଷରେ ବର୍ଷା ପ୍ରିୟଦର୍ଶିନୀ ପରଦାର ଧମାକା କରିବାକୁ ପ୍ରସ୍ତୁତ । ସେ ଓଡ଼ିଆ ଫିଲ୍ମ 'ୱାଇଫ' ସହ ପୁଣି ପରଦାକୁ ଫେରୁଛନ୍ତି । ନୂଆ ବର୍ଷ ଅବସରରେ ଜାନୁଆରୀ 3ରେ ରିଲିଜ ହେବ ଏହି ଫିଲ୍ମ । ନାରୀ ଜୀବନର ତ୍ୟାଗ ସମର୍ପଣ ଓ ବଳିଦାନର କାହାଣୀ ଏଥିରେ ଦେଖିବାକୁ ମିଳିବ । ଏହି ଫିଲ୍ମର ମୁଖ୍ୟ ଚରିତ୍ରରେ ବର୍ଷା ପ୍ରୟଦର୍ଶିନୀ ନଜର ଆସିବାକୁ ଥିବା ବେଳେ ତାଙ୍କ ବିପକ୍ଷରେ ରହିଛନ୍ତି ଜୟଜିତ । ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ସୁଧାକର ବସନ୍ତ ।
2. ରଙ୍ଗଶୁର
ମକାର ସଂକ୍ରାନ୍ତି ଅବସରରେ ପରଦାକୁ ଆସୁଛି ଓଡ଼ିଆ ଫିଲ୍ମ 'ରଙ୍ଗଶୁର' । ଏହି ଫିଲ୍ମ ଜାନୁଆରୀ 12ରେ ରିଲିଜ ହେବ । ଏଥିରେ ସୂର୍ଯ୍ୟମୟୀ ମୁଖ୍ୟ ଭୂମିକାରେ ନଜର ଆସିବାକୁ ଥିବା ବେଳେ ତାଙ୍କୁ ନୂଆ ଅବତାରରେ ଦେଖିବାକୁ ମିଳିବ । 'ରଙ୍ଗଶୁର' ଚଳଚ୍ଚିତ୍ର ଯାହା ଆମ ଓଡ଼ିଆ ପରମ୍ପରାର ଏକ ପ୍ରାଚୀନ ଲୋକ କଳା ନୃତ୍ୟ ବାଘ ନାଚକୁ ନେଇ ଆସୁଛି । ବାଘ ନାଚ ଯାହା ସମାଜ ପ୍ରତି ଏକ ସୁପ୍ରଭାବ ପକାଉଥିଲା । ଏବେ ପ୍ରାୟ ବିଲୁପ୍ତ । ଏହି ବାଘ ନାଚ କଳାକୁ କେମିତି ପୁନଃଉଦ୍ଧାର କରିପାରିବେ ସେମିତି ଏକ କାହାଣୀକୁ ନେଇ ପ୍ରସ୍ତୁତ ଚଳଚ୍ଚିତ୍ର ରଙ୍ଗ-ଶୁର ।
3. ବଇଦ
ମୌଳିକ କାହାଣୀକୁ ନେଇ ପରଦାକୁ ଆସୁଛି ଓଡ଼ିଆ ଫିଲ୍ମ 'ବଇଦ' । ଯେଉଁଥିରେ କ୍ୟାମେରା ଓ କଣ୍ଟେଣ୍ଟ ନାୟକ ସାଜିଛନ୍ତି । ନୂଆବର୍ଷ ଅବସରରେ ଜାନୁଆରୀ ୧୦ ତାରିଖରେ ସାରା ଓଡ଼ିଶାରେ ମୁକ୍ତିଲାଭ କରିବ ଭିନ୍ନ ଏକ ପ୍ରୟାସର ଓଡ଼ିଆ ଚଳଚିତ୍ର 'ବଇଦ' । ଏହି ଫିଲ୍ମରେ ଅଭିନେତା ସିଦ୍ଧାର୍ଥ ରାୟ, ଶୁଭାଙ୍ଗୀ ହରିଚନ୍ଦନ, ସାଇସ୍ରେଷ୍ଟ ଦାସ, ରାଜେଶ ମହାନ୍ତି ଓ ଶିବାନୀ ଖରା ।
4. ମିଶିରି
ସେହିପରି ଚଳିତ ଜାନୁଆରୀରେ ଆସୁଛି ଓଡ଼ିଆ ରୋମାଣ୍ଟିକ ଫିଲ୍ମ 'ମିଶିରି'। ନିର୍ମଲ୍ ଜୈସୱାଲ୍ ପ୍ରଡ଼କସନ୍, ରିଲ୍ସ ଏନ ରିଲ୍ସ ଏବଂ ଏ ଏ ଏଣ୍ଟରଟେଣ୍ଟମେଣ୍ଟ ଦ୍ୱାରା ପ୍ରଯୋଜିତ ଓଡ଼ିଆ ଚଳଚ୍ଚିତ୍ର "ମିଶିରି" । ଏହି ଚଳଚ୍ଚିତ୍ରର ପ୍ରଯୋଜକ ଭାବେ ନିର୍ମଲ୍ ଜୈସୱାଲଙ୍କ ସହ ସହପ୍ରଯୋଜକ ସ୍ଥିତ ପଟ୍ଟନାୟକ ଓ ଆକାଂକ୍ଷା ପାଢୀ ରହିଛନ୍ତି । ଫିଲ୍ମର ଲେଖକ ଶିବା ରହିଥିବା ବେଳେ ନିର୍ଦ୍ଦେଶକ ଶିଶିର ଓ ପିନାକୀ ରହିଛନ୍ତି । ସଙ୍ଗୀତ ଅଭିଷେକ, ଇଶାନ,କୌଶିକ ରହିଛନ୍ତି। ମୁଖ୍ୟ ଭୂମିକାରେ ଅଭିନେତ୍ରୀ ରୂପଶ୍ରୀ ପଣ୍ଡା ରହିଥିବା ବେଳେ ବିପକ୍ଷରେ ରହିଛନ୍ତି ଅଭିନେତା ଭିଭାସ ଓ ପ୍ରସନଜିତ । ଏହି ଫିଲ୍ମ ଆସନ୍ତା 4ରେ ହେବ ରିଲିଜ ।
ଏହା ମଧ୍ୟ ପଢନ୍ତୁ: 2025କୁ ସ୍ୱାଗତ କଲେ ଓଲିଉଡ଼ ସେଲିବ୍ରିଟି, 2024କୁ ଏମିତି ଦେଲେ ବିଦାୟ
5. ସନାତନୀ
ଅଭିନେତା ସମ୍ୱିତ ଆଚାର୍ଯ୍ୟ ପୁଣି ପରଦାରେ ଧମାକା କରିବାକୁ ପ୍ରସ୍ତୁତ । ସେ ଫିଲ୍ମ 'ସନାତନୀ- କର୍ମ ହିଁ ଧର୍ମ' ସହ ପରଦାକୁ ଫେରୁଛନ୍ତି । ବିଦିଶା କ୍ରାଫ୍ଟ ବ୍ୟାନର୍ରେ ବରିଷ୍ଠ ପ୍ରଯୋଜକ ବିଜୟ କାଣ୍ଡୋଇଙ୍କ ପ୍ରଯୋଜନାରେ ଏହି ସିନେମା ନିର୍ମାଣ ହୋଇଛି । ଫିଲ୍ମଟି ଅନ୍ଧ ବିଶ୍ୱାସ, ଶିକ୍ଷା ସହ ସାମାଜିକ ଓ ମାନସିକତାର ପରିବର୍ତ୍ତନ ସହ ଓଡ଼ିଶାରେ ଚାଲିଥିବା ଧର୍ମାନ୍ତୀକରଣ ପରିବର୍ତ୍ତନର କଥାକୁ ନେଇ ଗତିଶୀଳ ହୋଇଛି । ଏହି ଫିଲ୍ମ ଜାନୁଆରୀରେ ମୁକ୍ତିଲାଭ କରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
