ହାଇଦ୍ରାବାଦ: ଖୁବଶୀଘ୍ର ସାଉଥ୍ ସିନେମା ସୁପରଷ୍ଟାର ଥାଲାପତି ବିଜୟ ତାଙ୍କ ନୂଆ ଚଳଚ୍ଚିତ୍ର 'ଦ ଗ୍ରେଟେଷ୍ଟ ଅଫ ଅଲ ଟାଇମ' (ଗୋଟ) ସହ ପରଦାକୁ ଫେରୁଛନ୍ତି । ଫିଲ୍ମଟି ଚଳିତ ବର୍ଷ ସେପ୍ଟେମ୍ବର ୫ରେ ରିଲିଜ ହେବ । ଯାହାକୁ ନେଇ ବେଶ ଉତ୍ସାହିତ ରହିଛନ୍ତି ଫ୍ୟାନ୍ସ । ଏହାରି ମଧ୍ୟରେ ବର୍ତ୍ତମାନ ଫିଲ୍ମ 'ଦ ଗ୍ରେଟେଷ୍ଟ ଅଫ ଅଲ ଟାଇମ' ବିଷୟରେ ବଡ ଖବର ସାମ୍ନାକୁ ଆସିଛି । ଏଥିରେ ସ୍ୱର୍ଗତ ଅଭିନେତା କ୍ୟାପଟେନ ବିଜୟକାନ୍ତ ମଧ୍ୟ ନଜର ଆସିବେ । AI ମାଧ୍ୟମରେ ବିଜୟକାନ୍ତଙ୍କୁ ଫିଲ୍ମରେ ଦେଖାଇବେ ନିର୍ମାତା । ଯାହା ପାଇଁ ପ୍ରସ୍ତୁତି ଆରମ୍ଭ ହୋଇସାରିଛି । କ୍ୟାପଟେନ ବିଜୟକାନ୍ତଙ୍କ ପତ୍ନୀ ତଥା ଡିଏମଡିକେ ଅଧ୍ୟକ୍ଷ ପ୍ରେମଲତା ବିଜୟକାନ୍ତ ଏହି ସୂଚନା ଦେଇଛନ୍ତି ।
ପ୍ରେମଲତା ବିଜୟକାନ୍ତ ନିକଟରେ ଏକ ସାକ୍ଷାତକାରରେ କହିଛନ୍ତି ଯେ 'ଦ ଗ୍ରେଟେଷ୍ଟ ଅଫ ଅଲ ଟାଇମ' ନିର୍ମାତାମାନେ ତାଙ୍କ ସ୍ୱାମୀ କ୍ୟାପଟେନ ବିଜୟକାନ୍ତଙ୍କୁ ଏହି ଫିଲ୍ମରେ ଦେଖାଇବାକୁ ଚିନ୍ତା କରିଛନ୍ତି । ଚଳଚ୍ଚିତ୍ରରେ ତାଙ୍କର ଏକ କ୍ୟାମିଓ ରୋଲ ରହିବ ଏବଂ ଏଥିପାଇଁ ନିର୍ମାତାମାନେ AI ଅର୍ଥାତ୍ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଟେକ୍ନୋଲୋଜି ବ୍ୟବହାର କରିବେ ।
ସେ ଆହୁରି କହିଛନ୍ତି, ''ନିର୍ଦ୍ଦେଶକ ଭେଙ୍କଟ ପ୍ରଭୁ ତାଙ୍କ ଅନୁମତି ମାଗିବା ପାଇଁ ତାଙ୍କ ବାସଭବନକୁ ଅନେକ ଥର ଯାଇଥିଲେ ଏବଂ ଆଗାମୀ ନିର୍ବାଚନ ପରେ ଥାଲାପତି ବିଜୟ ମଧ୍ୟ ତାଙ୍କୁ ଭେଟିବେ । ଯଦି ତାଙ୍କ ସ୍ୱାମୀ ଜୀବିତ ଥାଆନ୍ତେ, ତେବେ ସେ ଥାଲାପତି ବିଜୟଙ୍କୁ କେବେ ମନା କରିନଥାନ୍ତେ । ସେ ତାଙ୍କୁ ବହୁତ ପସନ୍ଦ କରୁଥିଲେ ।'' ପ୍ରେମଲତା କହିଛନ୍ତି ଯେ ସେ ତାଙ୍କ ପୁଅମାନଙ୍କ ସହ ଆଲୋଚନା କରିବା ପରେ ନିଷ୍ପତ୍ତି ନେବେ ।
ସୂଚନା ଥାଉକି, କ୍ୟାପଟେନ ବିଜୟକାନ୍ତ କୋରୋନାରେ ଚିକିତ୍ସାଧୀନ ଅବସ୍ଥାରେ ଡିସେମ୍ବର ୨୮ରେ ଆଖି ବୁଜିଥିଲେ । ବିଜୟକାନ୍ତ ତାମିଲ ଚଳଚ୍ଚିତ୍ରର ଜଣେ ଜଣାଶୁଣା ଅଭିନେତା ସହ ଜଣେ ରାଜନୀତିଜ୍ଞ ମଧ୍ୟ । ଚଳଚ୍ଚିତ୍ରରେ ସେ ସୈନ୍ୟ ଭୂମିକାରେ ବଳିଷ୍ଠ ଅଭିନୟ କରିଥିବାରୁ ତାଙ୍କୁ କ୍ୟାପଟେନର ଆଖ୍ୟା ଦିଆଯାଇଥିଲା । ସେ ନିଜ କ୍ୟାରିଅରରେ ୧୫୦ରୁ ଅଧିକ ଫିଲ୍ମରେ କାମ କରି ଦର୍ଶକଙ୍କ ମନ ଜିତିଛନ୍ତି । ପରେ ସେ ୨୦୦୫ ମସିହାରେ ଡିଏମଡିକେ ଦଳ ଗଠନ କରି ରାଜନୀତିରେ ପ୍ରବେଶ କରିଥିଲେ ।
ଏହା ମଧ୍ୟ ପଢନ୍ତୁ: ଅଭିନେତା ତଥା ଡିଏମଡିକେ ମୁଖ୍ୟ ବିଜୟକାନ୍ତଙ୍କ ପରଲୋକ
'ଗୋଟ' ଫିଲ୍ମ ବିଷୟରେ କହିବାକୁ ଗଲେ, 'ଗୋଟ' ଏକ ସମୟ-ଭ୍ରମଣ ଚଳଚ୍ଚିତ୍ର ବୋଲି କୁହାଯାଉଛି । ଏଥିରେ ବିଜୟ ଡବଲ ରୋଲରେ ଅଭିନୟ କରୁଛନ୍ତି । କୁହାଯାଉଛି ଯେ ଏହି ଫିଲ୍ମରେ ବିଜୟଙ୍କ ସହ ଲିଓ ସହ-ଅଭିନେତ୍ରୀ ତ୍ରିଷା କ୍ରିଷ୍ଣନ ମୁଖ୍ୟ ଭୂମିକାରେ ନଜର ଆସିବେ । ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଉଛନ୍ତି ଭେଙ୍କଟ ପ୍ରଭୁ । ଫିଲ୍ମଟି ସେପ୍ଟେମ୍ବର ୫ରେ ତାମିଲ, ତେଲୁଗୁ ଏବଂ ହିନ୍ଦୀ ଭାଷାରେ ମୁକ୍ତିଲାଭ କରିବ ।
