୧୫ଟି ପ୍ରେକ୍ଷାଳୟରେ ମୁକ୍ତିଲାଭ କଲା ଓଡ଼ିଆ ଫିଲ୍ମ 'ଆକାଶବାଣୀ'

Odia Film Akashvani: ଫିଲ୍ମ ଫ୍ରାଇଡରେ ଓଡ଼ିଶାର ୧୫ଟି ପ୍ରେକ୍ଷାଳୟରେ ମୁକ୍ତିଲାଭ କରିଛି ଓଡ଼ିଆ ଚଳଚ୍ଚିତ୍ର 'ଆକାଶବାଣୀ' । ଦର୍ଶକଙ୍କୁ ଏହା ଭରପୁର ମନରୋଞ୍ଜନ ଯୋଗାଇବ ବୋଲି ଆଶା ରଖିଛନ୍ତି ନିର୍ମାତା । ଅଧିକ ପଢନ୍ତୁ

ଭୁବନେଶ୍ୱର: ମୁକ୍ତିଲାଭ କଲା ଓଡ଼ିଆ ଚଳଚ୍ଚିତ୍ର 'ଆକାଶବାଣୀ' । ଫିଲ୍ମ ଫ୍ରାଇଡରେ ଓଡ଼ିଶାର ୧୫ଟି ପ୍ରେକ୍ଷାଳୟରେ ଓଡ଼ିଆ ଚଳଚ୍ଚିତ୍ର 'ଆକାଶବାଣୀ' ମୁକ୍ତିଲାଭ କରିଛି । ଶ୍ରୀବୀରବଲ୍‌ ଏଣ୍ଟରଟେନ୍‌ମେଣ୍ଟ ବ୍ୟାନରରେ ନିର୍ମିତ ହୋଇଛି ଏହି ଚଳଚ୍ଚିତ୍ର । ଭୁବନେଶ୍ୱରର ସିନେପ୍ଲେକ୍ସରେ ଏହାର ପ୍ରିମିୟର ହୋଇଯାଇଛି । କଟକର ଆଇନକ୍ସ ଏବଂ ବ୍ରହ୍ମପୁରରେ ମଧ୍ୟ 'ଆକାଶବାଣୀ'ର ପ୍ରିମିଅର ଶୋ' ହୋଇଥିଲା । ପ୍ରଥମ ଶୋ'ରେ ସମସ୍ତ ପ୍ରେକ୍ଷାଳୟ ହାଉସଫୁଲ୍ ହୋଇଥିଲା । ଏଥିରେ ବନ୍ଧୁତ୍ଵ ଓ ପାରିବାରିକ ବନ୍ଧନକୁ ସୁନ୍ଦର ଭାବେ ଚିତ୍ରଣ କରାଯାଇଛି । ସେହିପରି ଲଭ୍, କମେଡି ତଥା ମଣିଷ ଜୀବନର ବିଭିନ୍ନ ଦିଗକୁ ଫିଲ୍ମରେ ଉପସ୍ଥାପନ କରାଯାଇଛି । ଦର୍ଶକଙ୍କୁ ଏହା ଭରପୁର ମନରୋଞ୍ଜନ ଯୋଗାଇବ ବୋଲି ଆଶା ରଖିଛନ୍ତି ନିର୍ମାତା ।

ତ୍ରିପତି ସାହୁଙ୍କ ନିର୍ଦ୍ଦେଶିତ ଏବଂ ରୋହନ ଗର୍ଗଙ୍କ ପ୍ରଯୋଜିତ ଏହି ସିନେମାର ସିନେମାଟୋଗ୍ରାଫର ଅଛନ୍ତି ସ୍ୱର୍ଶ ପ୍ରସାଦ (ବୁବୁ) । ଏଥିରେ ଅଭିନେତା ରୋହନଙ୍କୁ ନାୟକ ଭାବେ ଦେଖିବାକୁ ମିଳିଥିବାବେଳେ ତାଙ୍କ ବିପକ୍ଷରେ ନାୟିକା ସାଜିଛନ୍ତି ପୂଜା । ସିନେମାର କାହାଣୀ ଗଣେଶରାମ ଅଗ୍ରୱାଲ ଓ ସଂଳାପରେ ଡ. ନିର୍ମଳ ନାୟକ ଥିବାବେଳେ ସମସ୍ତ ଗୀତ ମଧ୍ୟ ସେ ରଚନା କରିଥିବା କହିଛନ୍ତି । ଏଥିରେ ଗୋଟିଏ ହିନ୍ଦୀ ଗୀତକୁ କୁକୁ ପ୍ରଭାସ ଲେଖିଛନ୍ତି । ସେହିପରି ସମସ୍ତ ଗୀତକୁ ସୁମଧୁର ସଙ୍ଗୀତରେ ସଜାଇଛନ୍ତି ଅଭିଜିତ ମଜୁମଦାର । ଚଳଚ୍ଚିତ୍ରର ଗୀତଗୁଡ଼ିକ ମଧ୍ୟ ଦର୍ଶକଙ୍କ ମନକୁ ଛୁଇଁବ ବୋଲି ଆଶା ରଖିଛି ପ୍ରଯୋଜନା ସଂସ୍ଥା ।

ଫିଲ୍ମର ବିଭିନ୍ନ ଚରିତ୍ରରେ ପ୍ରଦ୍ୟୁମ୍ନ ଲେଙ୍କା, ପୃଥ୍ବୀରାଜ ନାୟକ, ପ୍ରତିଭା ପଣ୍ଡା, ନମିତା ଦାସ, ବେବି ପ୍ରଧାନ, ଜୋଜୋ, ଅମର ମହାପାତ୍ର, ରୋସନ ଭରଦ୍ବାଜ, ପ୍ରତାପ ସୁମନ ମହାରଣା, ମଧୁ ପ୍ରମୁଖଙ୍କୁ ଦେଖିବାକୁ ମିଳିବ । ଅଭିନେତା ରୋହନ‌ ପୂର୍ବରୁ ଲଭ୍ ଇମ୍ପସିବଲ୍ , ଡଟପେନ୍ ଭଳି ଚଳଚ୍ଚିତ୍ରରେ ଅଭିନୟ କରି ବେଶ ଲୋକପ୍ରିୟତା ସାଉଣ୍ଟିଛନ୍ତି । ଅଭିନେତା ରୋହନ କହିଛନ୍ତି, "ଏହି ଫିଲ୍ମଟି ଭଲ ହେବ ଓ ଦର୍ଶକଙ୍କ ମନକୁ ଛୁଇଁବ ବୋଲି ଆମେ ଆଶା ରଖିଛୁ ।"ସେପଟେ ନିର୍ଦ୍ଦେଶକ ତ୍ରିପତି ସାହୁ କହିଛନ୍ତି, ଆମେ 2023ରୁ ଏହି ଚଳଚ୍ଚିତ୍ର ପାଇଁ କଷ୍ଟ କରିଆସୁଥିଲୁ । ବର୍ତ୍ତମାନ ଏହା ରିଲିଜ ହୋଇଛି । ପ୍ରେକ୍ଷାଳୟରେ ରିଲିଜ ପରେ ଦର୍ଶକଙ୍କ ଭଲ ପାଇବା ମଧ୍ୟ ମିଳୁଛି ।"

ଇଟିଭି ଭାରତ, ଭୁବନେଶ୍ୱର