ମୁମ୍ବାଇ: ଚର୍ଚ୍ଚାରେ ରହିଛି ଅନନ୍ତ ଅମ୍ବାନି ଓ ରାଧିକା ମର୍ଚାଣ୍ଟଙ୍କ ବିବାହ । ଏହା ପୂର୍ବରୁ ହୋଇଥିବା ସଂଗୀତ ସେରେମନି ମଧ୍ୟ ଦେଶ ବିଦେଶରେ ଚର୍ଚ୍ଚାର ବିଷୟ ପାଲଟିଛି । ଭାଇଜାନ ସଲମାନ ଖାନ ଓ ୟୁଲିଆ ୱନ୍ତୁରଙ୍କ ସମ୍ପର୍କକୁ ନେଇ ଆଜିକାଲି ଜୋରଦାର ଚାଲିଛି ଆଲୋଚନା । ଯଦିଓ ଉଭୟଙ୍କ ପକ୍ଷରୁ କେହିବି ଏନେଇ ଅଫିସିଆଲି ଘୋଷଣା କରିନାହାନ୍ତି, ତଥାପି ଅନନ୍ତ ଅମ୍ବାନିଙ୍କ ସଙ୍ଗୀତ ସେରେମନିରେ ଉଭୟଙ୍କ ଅନ୍ଦାଜକୁ ନେଇ ବେଶ ଚର୍ଚ୍ଚା ।
କହିରଖୁଛୁ, କିଛି ବର୍ଷ ଧରି ୟୁଲିଆ ୱନ୍ତୁର ଓ ସଲମାନ ଖାନଙ୍କୁ ନେଇ ବେଶ ଚର୍ଚ୍ଚା ଲାଗିରହିଛି । ହେଲେ ସାଧାରଣତଃ ଉଭୟଙ୍କୁ କୌଣସି କାର୍ଯ୍ୟକ୍ରମରେ ଏକାଠି ଦେଖିବାକୁ ମିଳିନଥାଏ । ହେଲେ ଏଥର ଅମ୍ବାନିଙ୍କ ସଂଗୀତ କାର୍ଯ୍ୟକ୍ରମରେ ଠୁମକା ଲଗାଇ ଏହି ଯୋଡି ଚାରଚାନ୍ଦ ଲଗାଇଛନ୍ତି । 'ଓ ଓ ଜାନେ ଯାନା' ଗୀତରେ ଡ୍ୟାନ୍ସ କରିଥିବାର ନଜର ଆସିଛନ୍ତି ସଲମାନ ଓ ୟୁଲିଆ । ହାତରେ ଗ୍ଲାସ ଧରି ସଲମାନ ୟୁଲିଙ୍କ ସହ ଡ୍ୟାନ୍ସ କରୁଥିବା ଦେଖିବାକୁ ମିଳିଛି । ଏହାର ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ଭାଇଜାନଙ୍କ ଫ୍ୟାନ୍ସମାନେ ଏହି ଭିଡିଓରେ ଅନେକ କମେଣ୍ଟ କରିଥିବା ଦେଖିବାକୁ ମିଳିଛି । ସୋସିଆଲ ମିଡିଆରେ ପୋଷ୍ଟ ହୋଇଥିବା ସଲମାନଙ୍କ ଡ୍ୟାନ୍ସ ଭିଡିଓରେ ଜଣେ ଫ୍ୟାନ କମେଣ୍ଟ କରି ଲେଖିଛନ୍ତି, କ୍ୟା ବାତ୍ ହୈ ଭାଇଜାନ' । ଆଉ ଜଣେ ୟୁଜର ଲେଖିଛନ୍ତି, 'ଆପ କୀ ଯୋଡି କମାଲ କୀ ହୈ' । କହିରଖୁଛୁ, ଆସନ୍ତା ୧୨ ତାରିଖରେ ହେବାକୁ ଯାଉଛି ମୁକେଶ ଅମ୍ବାନିଙ୍କ ଲାଡଲା ଅନନ୍ତ ଅମ୍ବାନିଙ୍କ ଗ୍ରାଣ୍ଡ ୱେଡିଂ । ଏହି ଉତ୍ସବରେ ସାମିଲ ହେବାକୁ ବହୁ ସେଲିବ୍ରିଟିଙ୍କଠାରୁ ଆରମ୍ଭ କରି ରାଜନେତା ଓ ନାମୀ ବ୍ୟବସାୟୀମାନେ ସାମିଲ ହୋଇଛନ୍ତି । ସେପଟେ ଶୁକ୍ରବାର ହୋଇଥିବା ଏହି ସଂଙ୍ଗୀତ ସେରିମନିରେ ନୀତା ଅମ୍ବାନୀ ବିଶ୍ବକପ ଚମ୍ପିଆନ ଅଧିନାୟକ ରୋହିତ ଶର୍ମାଙ୍କ ସମେତ ସୂର୍ଯ୍ୟ କୁମାର ଯାଦବ ଓ ହାର୍ଦ୍ଦିକ ପାଣ୍ଡ୍ୟାଙ୍କୁ ଷ୍ଟେଜକୁ ଡାକି ସମ୍ବର୍ଦ୍ଧିତ କରିବା ସହ ଭାବବିହ୍ବଳ ହୋଇପଡ଼ିଥିବା ଦେଖିବାକୁ ମିଳିଛି ।
