ହାଇଦ୍ରାବାଦ: ଅକ୍ଷୟ କୁମାରଙ୍କ ସହ 'ସିଂ ଇଜ ବ୍ଲିଙ୍ଗ୍' ଏବଂ 'ରୋବଟ୍ ୨' ଚଳଚ୍ଚିତ୍ରରେ ନଜର ଆସିଥିବା ବିଦେଶୀ ଅଭିନେତ୍ରୀ ଏମି ଜ୍ୟାକସନ ନିଜ ଦୀର୍ଘ ଦିନର ପ୍ରେମିକ ଏଡ ୱେଷ୍ଟୱିକଙ୍କୁ ବିବାହ କରିବାକୁ ଯାଉଛନ୍ତି । ଇଟାଲୀରେ ଉଭୟଙ୍କ ବିବାହ ହେବାକୁ ଥିବା ବେଳେ ସପରିବାର ସହ ଏମି ଏବଂ ଏଡ ଇଟାଲି ଯାତ୍ରା କରିଛନ୍ତି । ଏହି ସମୟର କିଛି ଫଟୋ ସେ ସୋସିଆଲ ମିଡିଆରେ ସେୟାର କରିଛନ୍ତି । ଯେଉଁଥିରେ ଏମି ଜ୍ୟାକସନ ତାଙ୍କ ପ୍ରେମିକଙ୍କ ସହ ରୋମାଣ୍ଟିକ ହେଉଥିବାର ନଜର ଆସିଛନ୍ତି । ଏଥିସହ ପୁରା ପରିବାର ମଧ୍ୟ ନଜର ଆସିଛନ୍ତି ।
ଇଟାଲୀରେ ଏମି କରିବେ ବିବାହ
ଏମି ଜ୍ୟାକସନ ଏବଂ ଏଡ ୱେଷ୍ଟୱିକ ଇଟାଲୀର ଅମାଲଫି କୋଷ୍ଟରେ ବିବାହ କରିବାକୁ ଯାଉଛନ୍ତି। ଏହି ସମୟରେ, ବିବାହ ପୂର୍ବରୁ ଏମି ତାଙ୍କ ଭାବି ସ୍ୱାମୀଙ୍କ ସହ ଏକ ଚାର୍ଟାର୍ଡ ବିମାନରେ ରୋମାଣ୍ଟିକ ଅନ୍ଦାଜରେ ନଜର ଆସିଛନ୍ତି । ପ୍ରଥମ ଫଟୋରେ ଏମି ଏଡ ୱେଷ୍ଟୱିକଙ୍କ କୋଳରେ ବସି ତାଙ୍କୁ ଲିପଲକ କରୁଥିବାର ନଜର ଆସିଛନ୍ତି । ଅନ୍ୟଫଟୋରେ ଉଭୟଙ୍କ ପରିବାର ସଦସ୍ୟଙ୍କୁ ଦେଖିବାକୁ ମିଳିଛି । ଏହା ବ୍ୟତୀତ ଅଭିନେତ୍ରୀଙ୍କ ପୁଅ ଆଣ୍ଡ୍ରିୟୁ ମଧ୍ୟ ଏହି ବିବାହ ଉତ୍ସବରେ ଯୋଗଦେବାକୁ ଇଟାଲୀ ଯାଉଛନ୍ତି। ଏହି ଫଟୋ ସେୟାର କରି ଏମି ଏଡ ୱେଷ୍ଟୱିକଙ୍କୁ ଟ୍ୟାଗ କରି କ୍ୟାପସନରେ ଲେଖିଛନ୍ତି, ''ଚାଲ ବିବାହ କରିବା ବେବି ।''
2 ବର୍ଷ ଡେଟିଂ ପରେ ଏମି ଏଡଙ୍କୁ କରିବେ ବିବାହ
ସୂଚନା ଥାଉ କି, 2021 ମସିହାରେ ଏହି କପଲ ଏକ କାର୍ଯ୍ୟକ୍ରମରେ ଭେଟିଥିଲେ। ପରେ ଏଡ ୱେଷ୍ଟୱିକ ସ୍ୱିଜରଲ୍ୟାଣ୍ଡର ପିକଚୁ ବ୍ରିଜ୍ ଉପରେ ଏମିଙ୍କୁ ପ୍ରପୋଜ କରିଥିଲେ । ଏହା ପରେ ଦମ୍ପତି 2022 ଜୁନରେ ସୋସିଆଲ ମିଡିଆରେ ଏକ ଫଟୋ ସେୟାର କରି ନିଜ ସମ୍ପର୍କକୁ ନିଶ୍ଚିତ କରିଥିଲେ। ତେବେ ଦୁଇ ବର୍ଷ ଡେଟିଂ ପରେ ଏବେ ଉଭୟ ବିବାହ କରିବାକୁ ମନସ୍ଥ କରିଛନ୍ତି। ବର୍ତ୍ତମାନ 2024 ରେ ଇଟାଲିରେ ଉଭୟଙ୍କ ପଡିବ ହାତଗଣ୍ଠି।
ଏମିଙ୍କ ଏକ ପୁଅ ରହିଛନ୍ତି
ଏଡ ୱେଷ୍ଟୱିକ ପୂର୍ବରୁ ଏମି ଜ୍ୟାକସନ ବ୍ୟବସାୟୀ ଜର୍ଜ ପାନାୟିଟୁଙ୍କୁ ଡେଟ କରୁଥିଲେ। ବିବାହ ପୂର୍ବରୁ ମା ହୋଇଥିଲେ ଏମି। ଉଭୟଙ୍କର ଏକ ପାଞ୍ଚ ବର୍ଷର ପୁଅ ଆଣ୍ଡ୍ରିଆସ ରହିଛନ୍ତି। ଜର୍ଜଙ୍କ ସହ ବ୍ରେକଅପ ପରେ ଏଡ ୱେଷ୍ଟୱିକ୍ ଏମିଙ୍କ ଜୀବନରେ ଏଣ୍ଟ୍ରି କରିଥିଲେ । ଦୁହେଁ ଶୀଘ୍ର ବିବାହ କରିବାକୁ ଯାଉଛନ୍ତି ।
ଏହା ମଧ୍ୟ ପଢନ୍ତୁ: ଏମିଙ୍କ ଘରେ କୁନି ଅତିଥି, ସେୟାର କଲେ ଖୁସି
ଏମି ଜ୍ୟାକସନଙ୍କ ଫିଲ୍ମ ବିଷୟରେ କହିବାକୁ ଗଲେ, ତାମିଲ ଚଳଚ୍ଚିତ୍ର 'ମାଦ୍ରାସାପଟ୍ଟିନମ୍' (2010) ସହିତ ଭାରତୀୟ ସିନେମାରେ ପ୍ରବେଶ କରିଥିଲେ। ଏହା ପରେ ତାଙ୍କୁ 2012 ରେ ବଲିଉଡ ଫିଲ୍ମ 'ଏକ ଦିୱାନା ଥା'ରେ ଦେଖିବାକୁ ମିଳିଥିଲା। ହିନ୍ଦୀ ଏବଂ ତାମିଲ ସହିତ ଏମି ଅଲ୍ଲୁ ଅର୍ଜୁନ ଏବଂ ରାମ ଚରଣଙ୍କ ଅଭିନୀତ ଚଳଚ୍ଚିତ୍ର ୟେଭାଡୁ (2014) ରେ ତେଲୁଗୁ ଭାଷାରେ କାମ କରିଥିଲେ। ସିଂ ଇଜ ବ୍ଲିଙ୍ଗ୍, ଥାଙ୍ଗା ମାଗାନ୍ (2015), ଗେଟୁ, ଥେରି, ଫ୍ରିକ୍ ଅଲି, ଦେବୀ (2016), ବୁଗି ମ୍ୟାନ୍, ଦି ଭିଲେନ୍, 2.0 (2018), ମିଶନ୍ ଅଧ୍ୟାୟ 1 ଏବଂ କ୍ରାକ୍ (2024) ଭଳି ଚଳଚ୍ଚିତ୍ରରେ କାମ କରିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
