ହାଇଦ୍ରାବାଦ: ବଲିଉଡ ଅଭିନେତ୍ରୀ ପରିଣୀତି ଚୋପ୍ରା ଆଜିକାଲି ନିଜ ବିବାହ ଜୀବନୀକୁ ନେଇ ଚର୍ଚ୍ଚାରେ ରହିଛନ୍ତି । ରାଘବ ଚଢାଙ୍କୁ ବିବାହ ପରେ ଅଭିନେତ୍ରୀଙ୍କ ଫିଲ୍ମ କ୍ୟାରିୟରକୁ ନେଇ ବିଭିନ୍ନ ପ୍ରଶ୍ନ ଉଠିଥିଲା । ପରିଣୀତି ରାଜନୀତିରେ ଯୋଗ ଦେବେ ବୋଲି ଚର୍ଚ୍ଚା ଜୋର ଧରିଥିଲା । ବର୍ତ୍ତମାନ ଅଭିନେତ୍ରୀ ନିଜେ ଘୋଷଣା କରିଛନ୍ତି ଯେ, ସେ ମ୍ୟୁଜିକ ଇଣ୍ଡଷ୍ଟ୍ରିଜରେ କ୍ୟାରିଅର ଆରମ୍ଭ କରିବେ । ଅଭିନେତ୍ରୀ ସୋସିଆଲ ମିଡିଆରେ ଏହା ଘୋଷଣା କରିଛନ୍ତି ।
ପରିଣୀତି ଇନଷ୍ଟାଗ୍ରାମରେ ଏକ ଭିଡିଓ ସେୟାର କରି କହିଛନ୍ତି ଯେ ସେ ସଙ୍ଗୀତ ଜଗତରେ ନିଜର କ୍ୟାରିୟର ଆରମ୍ଭ କରିବାକୁ ଯାଉଛନ୍ତି । ପରିଣୀତି ଚୋପ୍ରା ତାଙ୍କ ନୂତନ ଯାତ୍ରା ପାଇଁ ବହୁତ ଉତ୍ସାହିତ ଅଛନ୍ତି । ପ୍ରଶଂସକଙ୍କ ସହ ଏହି ଖୁସି ଖବର ସେୟାର କରି ଅଭିନେତ୍ରୀ ଲେଖିଛନ୍ତି, 'ସଙ୍ଗୀତ ମୋ ପାଇଁ ସବୁବେଳେ ଖୁସିର ସ୍ଥାନ ଅଟେ । ମୁଁ ବର୍ଷ ବର୍ଷ ଧରି ମଞ୍ଚରେ ଅନେକ ସଂଗୀତଜ୍ଞଙ୍କ ଅଭିନୟ ଦେଖୁଛି । ବର୍ତ୍ତମାନ ମୁଁ ମଧ୍ୟ ଏହି ଦୁନିଆର ଏକ ଅଂଶ ହେବାକୁ ଯାଉଛି । ଏଥିପାଇଁ ମୁଁ ନିଜକୁ ବହୁତ ଭାଗ୍ୟବାନ ମନେ କରୁଛି । ମୋ ଜୀବନରେ ଏକ ନୂତନ ଅଧ୍ୟାୟ ଆରମ୍ଭ କରିବାକୁ ମୁଁ ବହୁତ ଉତ୍ସାହିତ ।'
ଏଥିସହ ଅଭିନେତ୍ରୀ ତାଙ୍କର ନୂଆ ପ୍ରୋଜେକ୍ଟ ମଧ୍ୟ ଘୋଷଣା କରିଛନ୍ତି । "ଏହି ଚମତ୍କାର କ୍ୟାରିୟର ପାଇଁ ମୁଁ ଶ୍ରେଷ୍ଠ ମନୋରଞ୍ଜନ ପରାମର୍ଶଦାତାମାନଙ୍କ ସହ ହାତ ମିଳାଉଛି, ତେଣୁ ଏହି ବର୍ଷ ଆପଣଙ୍କ ପାଇଁ କିଛି ଆଶ୍ଚର୍ଯ୍ୟଜନକ ଜିନିଷ ଅଛି । ମୁଁ ଆଶା କରେ ତୁମେମାନେ ମୋ ପରି ସେତିକି ଉତ୍ସାହିତ ରହିଛ।" କହିରଖୁଛୁ କି, ଏହି କମ୍ପାନୀ ସହ ଅରିଜିତ ସିଂ, ସୁନୀଧି ଚୌହାନ, ବାଦଶାହ, ଅମିତ ତ୍ରିବେଦୀଙ୍କ ସମେତ ୨୫ ରୁ ଅଧିକ ବଡ଼ କଳାକାରଙ୍କ ନାମ ଜଡ଼ିତ । ଅଭିନେତ୍ରୀଙ୍କ ଏହି ପୋଷ୍ଟ ସେୟାର ହେବା ମାତ୍ରେ ଫ୍ୟାନ୍ସ କମେଣ୍ଟ ବର୍ଷା କରିଛନ୍ତି । ତାଙ୍କର ଏହି ନୂତନ ଯାତ୍ରା ପାଇଁ ପ୍ରଶଂସକମାନେ ତାଙ୍କୁ ଅନେକ ଶୁଭେଚ୍ଛା ଜଣାଇଛନ୍ତି । ମନୀଷ ମଲହୋତ୍ରା ମଧ୍ୟ ପରିଣୀତିଙ୍କ ପୋଷ୍ଟରେ ହାର୍ଟ ଇମୋଜି ଦେଇଛନ୍ତି ।
ଏହା ମଧ୍ୟ ପଢନ୍ତୁ: ସାତଜନ୍ମର ସାଥୀ ହେଲେ ରାଘବ-ପରିଣୀତି, ସରିଲା ବିବାହ
ସୂଚନା ଥାଉ କି, ମେ ୧୩, ୨୦୨୩ରେ ନିର୍ବନ୍ଧ ପରେ ସେପ୍ଟେମ୍ବର ୨୪, ୨୦୨୩ରେ ପରିଣୀତି ଚୋପ୍ରା ଏବଂ ଆପ୍ ନେତା ରାଘବ ଚଢାଙ୍କ ମଧ୍ୟରେ ବିବାହ ହୋଇଥିଲା । ଖୁବ ଧୁମଧାମରେ ଏହି ଦମ୍ପତି ରାଜସ୍ଥାନ ଉଦୟପୁରରେ ଘନିଷ୍ଠ ବନ୍ଧୁ ଏବଂ ପରିବାର ସଦସ୍ୟଙ୍କ ଉପସ୍ଥିତିରେ ବିବାହ କରିଥିଲେ ।
