ଲକ୍ଷ୍ନୌ: ଜ୍ଞାନବ୍ୟାପୀ ମସଜିଦ ପରିସରରେ ଆଜି ପୂଜାର୍ଚ୍ଚନା କରିବା ପାଇଁ ବାରାଣାସୀ କୋର୍ଟ ହିନ୍ଦୁପକ୍ଷଙ୍କୁ କୋର୍ଟ ଅନୁମତି ପ୍ରଦାନ କରିଛନ୍ତି । ତେବେ ମସଜିଦରେ ଏକାଧିକ ତେହଖାନା ଥିବା ବେଳେ ଉତ୍ତର ଭାଗରେ ଥିବା ‘ବ୍ୟାସଜୀ କା ତେହଖାନ’ ରେ ହିନ୍ଦୁପକ୍ଷ ପୂଜା ପାଇଁ ଅନୁମତି ପାଇଛି । ଆସନ୍ତା ସପ୍ତାହକ ମଧ୍ୟରେ ସ୍ଥାନୀୟ ପ୍ରଶାସନ ପୂଜାର୍ଚ୍ଚନା କରାଯିବାର ସମସ୍ତ ବ୍ୟବସ୍ଥା କରିବ । କାଶୀ ବିଶ୍ବନାଥ ମନ୍ଦିର ଟ୍ରଷ୍ଟ ଦ୍ବାରା ଚୟନ ପୂଜାରୀ କିମ୍ବା ସେବାୟତ ପୂଜକ ଭାବେ ନିଯୁକ୍ତ ହେବେ । ତେବେ କଣ ଏହି ସ୍ଥାନର ମହତ୍ବ । କାହିଁକି ଏଠାରେ ପୂଜା କରିବା ପାଇଁ ମିଳିଲା ଅନୁମତି ଜାଣନ୍ତୁ
ତେହଖାନା କ’ଣ :- ମସଜିଦର ତଳମହଲା ବା ବେସମେଣ୍ଟରେ ମୋଟ ଚାରୋଟି 'ତେହଖାନା' ରହିଛି । ତେହଖାନାର ଅର୍ଥ ହେଉଛି ଭୂତଳ କୋଠରୀ ବା ବେସମେଣ୍ଟରେ ଥିବା ପ୍ରକୋଷ୍ଠ । ଏହି 4 ତେହଖାନା ମଧ୍ୟରୁ ଗୋଟିଏ ବାରାଣାସୀର ବ୍ୟାସ ପରିବାର ମାଲିକାନାରେ ରହିଛି । ଶୈଳେନ୍ଦ୍ର କୁମାର ପାଠକ ବ୍ୟାସ ମସଜିଦ କିମିଟି ବିରୋଧରେ ଏକ ମାମଲା ଦାଏର କରିଥିଲେ । ସ୍ଥାନୀୟ ଜିଲ୍ଲା ମାଜିଷ୍ଟ୍ରେଟଙ୍କୁ ଏହି ବେସମେଣ୍ଟର ରିସିଭର ଭାବରେ ନିଯୁକ୍ତ କରିବାକୁ ସେ ଆବେଦନରେ ଦର୍ଶାଇଥିଲେ ।
1993 ପର୍ଯ୍ୟନ୍ତ ହେଉଥିଲା ପୂଜାର୍ଚ୍ଚନା:- ଦାବି ଅନୁସାରେ, 1993 ମସିହା ପର୍ଯ୍ୟନ୍ତ ପୂଜକ ସୋମନାଥ ବ୍ୟାସ ଏହି ତେହଖାନାରେ ପୂଜାର୍ଚ୍ଚନା କରୁଥିଲେ । ପରେ ଏହାକୁ ପ୍ରଶାସନ ଦ୍ବାରା ବନ୍ଦ କରି ଦିଆଯାଇଥିଲା । ସୋମନାଥ ବ୍ୟାସଙ୍କ ନାତି ଶୈଳେନ୍ଦ୍ର କୁମାର ପାଠକ ବ୍ୟାସ ପୁଣି ଥରେ ଏଠାରେ ପୂଜାର୍ଚ୍ଚନାର ଅନୁମତି ଦାବିରେ କୋର୍ଟଙ୍କ ଦ୍ବାରସ୍ଥ ହୋଇଥିଲେ । ସେ ଏହା ମଧ୍ୟ ଅଭିଯୋଗ କରିଥିଲେ ଯେ, ଏଠାରେ ପୂଜାର୍ଚ୍ଚନା ବନ୍ଦ କରାଯିବା ପରେ ମସଜିଦ କମିଟି ସଦସ୍ୟ ଏହି ତେହଖାନାକୁ ନିୟମିତ ପ୍ରବେଶ କରୁଛନ୍ତି ଓ କବଜା ମଧ୍ୟ କରିସାରିଛନ୍ତି । ହେଲେ ଏହି ଅଭିଯୋଗକୁ ପ୍ରତିପକ୍ଷ ଅଞ୍ଜୁମ ଇନ୍ତିଜାମିଆ କମିଟି ପକ୍ଷରୁ ଖଣ୍ଡନ କରାଯାଇଥିଲା । ତେବେ ବ୍ୟାସ ପରିବାର ବ୍ୟତୀତ ପରବର୍ତ୍ତୀ ସମୟରେ ହିନ୍ଦୁପକ୍ଷ ମସଜିଦରେ ପୂଜାର୍ଚ୍ଚନା କରିବାକୁ ଅନୁମତି ମାଗି ଏକାଧିକ ମାମଲା ଦାଏର କରିଛନ୍ତି, ଯାହାର ଶୁଣାଣି ଏବେ ଜାରି ରହିଛି ।
ମନ୍ଦିରର ଭଗ୍ନାବଶେଷ ଉପରେ ଛିଡା ହୋଇଛି ମସଜିଦ
ତେବେ ନିକଟରେ କୋର୍ଟଙ୍କ ନିର୍ଦ୍ଦେଶରେ ଶେଷ ହୋଇଥିବା ‘ଏଏସଆଇ’ ସର୍ଭେରେ ଏହି ମସଜିଦ ଏକ ବିଶାଳ ହିନ୍ଦୁ ମନ୍ଦିର ଉପରେ ନିର୍ମାଣ ହୋଇଥିବା ପ୍ରମାଣ ସାମ୍ନାକୁ ଆସିଛି । ହିନ୍ଦୁ ମନ୍ଦିର ଭଗ୍ନାବଶେଷ ଏହି ମସଜିଦର ନିର୍ମାଣରେ ବ୍ୟବହାର ମଧ୍ୟ ହୋଇଛି । ଯାହାର ପ୍ରମାଣ ମସଜିଦର ଏକାଧିକ ଅଂଶରେ ସ୍ପଷ୍ଟ ଦୃଶ୍ୟମାନ ମଧ୍ୟ ହେଉଛି । ମସଜିଦର ପଶ୍ଚିମ ଭାଗ ପ୍ରାଚୀରରେ ହିନ୍ଦୁ ମନ୍ଦିରର ଏକ ବିଶାଳ ଅଂଶ ମଧ୍ୟ ଅକ୍ଷତ ରହିଛି । ତେବେ ଏହି ମସଜିଦରେ ଏବେ ହିନ୍ଦୁପକ୍ଷ ପୂଜାର୍ଚ୍ଚନା କରିବା ଆରମ୍ଭ କରିବା ପରେ ଅନ୍ୟ ଗୁରୁତ୍ବପୂର୍ଣ୍ଣ ତଥ୍ୟ ସାମ୍ନାକୁ ଆସିପାରେ । 17ଦଶ ଶତାବ୍ଦୀରେ ଏହି ମସଜିଦ ନିର୍ମାଣ ହେବା ପୂର୍ବରୁ ଏଠାରେ ଏକ ବିଶାଳ ହିନ୍ଦୁମନ୍ଦିର ଥିବା ନେଇ ‘ଏସଏସଇ’ର ରିପୋର୍ଟରେ ସ୍ପଷ୍ଟ ପ୍ରମାଣ ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
