ଗୌହାଟୀ: କୁଖ୍ୟାତ ଖଲିସ୍ତାନୀ ଆତଙ୍କବାଦୀ ତଥା ‘ଓ୍ବାରିସ ପଞ୍ଜାବ ଦେ’ ସଂଗଠନ ମୁଖ୍ୟ ଅମୃତପାଲ ସିଂକୁ ରଖାଯାଇଥିବା ଆସାମର ଦିବୃଗଡ କେନ୍ଦ୍ରୀୟ ଜେଲରେ ସୁରକ୍ଷାରେ ବିଭ୍ରାଟ ସାମ୍ନାକୁ ଆସିଛି । ଏହି କୁଖ୍ୟାତ ଆତଙ୍କବାଦୀ ରହୁଥିବା ସେଲରୁ ଆଜି ଏକାଧିକ ଆପତ୍ତିଜନକ ସାମଗ୍ରୀ ଜବତ କରାଯାଇଛି । ଜବତ ସାମଗ୍ରୀ ମଧ୍ୟରେ ଗୋଟିଏ ସ୍ମାର୍ଟଫୋନ, ଗୋଟିଏ କିପ୍ୟାଡ ଫୋନ, ସ୍ପାଏ କ୍ୟାମେରା, ପେନ, ସ୍ମାର୍ଟଓ୍ବାଚ, ବ୍ଲୁଟୁଥ ପରି ଇଲୋକ୍ଟୋନିକ୍ସ ସାମଗ୍ରୀ ରହିଛି । ଅମୃତପାଲ ଓ ତାର 9ଜଣ ସହଯୋଗୀ ଥିବା ଓ୍ବାର୍ଡରୁ ଏହି ସାମଗ୍ରୀ ସବୁ ଜବତ ହେବା ପରେ ଏହି ଆତଙ୍କବାଦୀଙ୍କ ଓ ଜେଲ କର୍ମଚାରୀଙ୍କ ମଧ୍ୟରେ ଚାଲିଥିବା ମଧୁଚନ୍ଦ୍ରିକା ପଦାରେ ପଡିଛି ।
ଏହି ସବୁ ବୈଦ୍ୟୁତିକ ସାମଗ୍ରୀର ବ୍ୟବହାର କରାଯାଇ ଜେଲ ଭିତରର ସୂଚନା ବାହାରକୁ ପଠାଯାଉଥିବା ସନ୍ଦେହ କରାଯାଉଛି । ଜବତ ସାମଗ୍ରୀ ସମ୍ପର୍କରେ ସୂଚନା ଦେଇ ଆସାମ ପୋଲିସ ମହାନିର୍ଦ୍ଦେଶକ ଜି.ପି ସିଂ କହିଛନ୍ତି, ଅମୃପାଲ ରହୁଥିବା ସେଲରେ କିଛି ବେଆଇନ ଗତିବିଧି ଚାଲିଥିବା ସୂଚନା ମିଳିବା ପରେ ପୋଲିସ ଓ ଜେଲ ଷ୍ଟାଫ ଏହି ସେଲରେ ଯାଞ୍ଚ କରିଥିଲା । ଯେଉଁଥିରେ ଏହିସବୁ ସାମଗ୍ରୀ ଜବତ କରାଯାଇଛି । ଏହା ପରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ଅମୃତପାଲ ସିଂ ଓ ତାର ସହଯୋଗୀ ରହୁଥିବା ସ୍ଥାନ ସହ ଅନ୍ୟାନ୍ୟ ଏନଏସଏ ଓ୍ବାର୍ଡରେ ଅତିରିକ୍ତ ସିସିଟିଭି ଇନଷ୍ଟଲ କରାଯାଇଛି । ସ୍ଥିତିକୁ ଦେଖି ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ତେବେ ଏଠାରେ ଉଲ୍ଲେଖଯୋଗ୍ୟ ଯେ, ଗତବର୍ଷ ପୋଲିସକୁ ନାକେଦମ କରଥିଲା ଏହି ଖଲିସ୍ତାନୀ ଆତଙ୍କବାଦୀ । ପଞ୍ଜାବର ଏକ ଥାନାରେ ପଶି ପୋଲିସ ଉପରେ ମରଣାନ୍ତକ ଆକ୍ରମଣକରିଥିଲା ଅମୃତପାଲ ଓ ତାର ଏକାଧିକ ସହଯୋଗୀ । ଏଥିରେ ଏକାଧିକ ପୋଲିସ ଅଧିକାରୀ ଓ କର୍ମଚାରୀ ଗୁରୁତର ହୋଇଥିଲେ । ‘ପଞ୍ଜାବ ଓ୍ବାରିସ ଦେ’ ନାମରେ ଏହି ଖଲିସ୍ତାନୀ ତଥା ଭାରତ ବିରୋଧୀ ସଂଗଠନର ନେତୃତ୍ବ ନେଉଥିବା ଅମୃତପାଲକୁ ଧରିବା ପାଇଁ ପଞ୍ଜାବ ଓ ହରିୟାଣା ପୋଲିସ ନାକେଦମ ହୋଇଥିଲା ।
ଏହା ମଧ୍ୟ ପଢନ୍ତୁ :- ଗ୍ରୁପ ଲୋନ ନେଇ ମା’ ଫେରାର, 3 ଶିଶୁଙ୍କୁ ମାରି ଜୀବନ ହାରିବାକୁ ବାପାର ଉଦ୍ୟମ !
2023 ମସିହା ଏପ୍ରିଲ ମାସରେ ତାକୁ ଗିରଫ କରାଯିବା ପରେ ସୁରକ୍ଷା ଦୃଷ୍ଟିରୁ ଉତ୍ତର-ପୂର୍ବ ଆସାମର ଦିବୃଗଡ କେନ୍ଦ୍ରୀୟ ଜେଲକୁ ପଠାଯାଇଥିଲା । ସେ ଓ ତାର ସହଯୋଗୀମାନଙ୍କ ବିରୋଧରେ ଜାତୀୟ ସୁରକ୍ଷା ଅଧିନିୟମ ‘ଏନଏସଏ’ ଅନୁସାରେ ଦଫା ଲଗାଯାଇଛି । ତଥାପି ଏହି ହାଇପ୍ରୋଫାଇଲ ଅଭିଯୁକ୍ତ ରହୁଥିବା ସେଲରେ ଏପରି ଏକାଧିକ ଆପତ୍ତିଜନକ ସାମଗ୍ରୀ ଠାବ ହେବା ପରେ ପୋଲିସ ଓ ଜେଲ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
