ସିମଲା: କସ୍ମେଟିକ ଫ୍ୟାକ୍ଟ୍ରିରେ ନିଆଁ ଲାଗିବା ଘଟଣାକୁ 24 ଘଣ୍ଟା ବିତିଯାଇଥିଲେ ସୁଦ୍ଧା ଉଦ୍ଧାରକାର୍ଯ୍ୟ ଶେଷ ହୋଇନାହିଁ । ବର୍ତ୍ତମାନ ସୁଦ୍ଧା 5ଜଣଙ୍କ ମୃତ୍ୟୁ ହୋଇଛି । ଗତକାଲି(ଶୁକ୍ରବାର) ଡାକ୍ତରଖାନାରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ବେଳେ ଉଦ୍ଧାରକାରୀ ଟିମ ଆଜି(ଶନିବାର) ଆଉ 4ଟି ମୃତଦେହ ଉଦ୍ଧାର କରିଛନ୍ତି । ତେବେ ଏହି ଘଟଣାରେ ସ୍ଥାନୀୟ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ବେଳେ ପ୍ୟାକ୍ଟ୍ରି ମାଲିକଙ୍କୁ ଗିରଫ କରାଯାଇଛି । ଅନ୍ୟପଟେ ଏହି ଘଟଣାରେ ଏସଆଇଟ ତଦନ୍ତ କରାଯିବା ନେଇ ସୂଚନା ରହିଛି ।
24 ଘଣ୍ଟା ପରେ ବି ଲିଭିନି ନିଆଁ: ସୂଚନା ଅନୁସାରେ, ଶୁକ୍ରବାର ଅପରାହ୍ନ ପ୍ରାୟ 1.30 ସମୟରେ, ହିମାଚଳ ପ୍ରଦେଶ ସୋଲନର ଶିଳ୍ପାଞ୍ଚଳର ବଦ୍ଦି ଝାଡମାଜରୀ ସ୍ଥିତ କସମେଟିକ ପ୍ରଡକ୍ଟ ଉତ୍ପାଦନ କରୁଥିବା ଏକ କାରଖାନାରେ ବଡ ଧରଣର ଅଗ୍ନିକାଣ୍ଡ ଘଟିଥିଲା । ଏହା ପରେ ଅଗ୍ନିଶମ ବାହିନୀ ନିଆଁ ଲିଭାଇବା କାର୍ଯ୍ୟ ଆରମ୍ଭ କରିଥିଲେ । କାରଖାନାରେ ରାସାୟନିକ ପଦାର୍ଥ ରହିଥିବାରୁ ନିଆଁ ଶୀଘ୍ର ବ୍ୟାପି ଯାଇଥିଲା । ଫଳରେ ହୁତୁହୁତୁ ହୋଇ ଜଳିଥିଲା କାରଖାନା । ତେବେ ନିଆଁ ଲାଗିବାକୁ 24 ଘଣ୍ଟା ବିତିଥିବା ବେଳେ, ବର୍ତ୍ତମାନ ସୁଦ୍ଧା ଆୟତ୍ତ କରିବାରେ ବିଫଳ ହୋଇଛନ୍ତି ଅଗ୍ନିଶମ ବାହିନୀ ।
ଏହା ମଧ୍ୟ ପଢନ୍ତୁ: କସ୍ମେଟିକ ଫ୍ୟାକ୍ଟ୍ରିରେ ଭୟଙ୍କର ଅଗ୍ନିକାଣ୍ଡ, ଜଣେ ମୃତ, 32 ଆହତ, 9 ନିଖୋଜ
ଆଜି(ଶନିବାର) ଡିଜିପି ସଞ୍ଜୟ କୁଣ୍ଡୁ ଘଟଣାସ୍ଥଳରେ ପହଞ୍ଚିବା ସହିତ ଉଦ୍ଧାର କାର୍ଯ୍ୟ ତ୍ବରାନ୍ବିତ କରିବା ପାଇଁ ନିର୍ଦ୍ଦେଶ ଦେଇଥିଲେ । ଏହି ମାମଲାରେ ପ୍ଲାଣ୍ଟ ମୁଖ୍ୟ ଚନ୍ଦ୍ର ଶେଖରକୁ ବାନ୍ଧିଛି ପୋଲିସ । ନିଆଁ ଲାଗିବା ପରେ ବୋରୋଟିଓ୍ବାଲା ଥାନାରେ ଧାରା 285, 336, 337, 304 ଅନୁଯାୟୀ ଏକ ମାମଲା ରୁଜୁ ହୋଇଥିଲା । ତେବେ ପ୍ଲାଣ୍ଟ ମୁଖ୍ୟଙ୍କୁ ଗିରଫ କରାଯାଇଥିବା ନେଇ ଏଏସପି ଅଶୋକ ବର୍ମା ସୂଚନା ଦେଇଛନ୍ତି । ଏହି ଘଟଣାକୁ ନେଇ ସ୍ବତନ୍ତ୍ର ତଦନ୍ତକାରୀ ଟିମ(SIT) ତଦନ୍ତ ପାଇଁ ସୁପାରିସ କରିଛନ୍ତି ଡିଜିପି ସଞ୍ଜୟ କୁଣ୍ଡୁ । ସ୍ବତନ୍ତ୍ର ତଦନ୍ତକାରୀ ଟିମ ଫ୍ୟାକ୍ଟ୍ରିକୁ ଯାଇ ପୁଙ୍ଖାନୁପୁଙ୍ଖ ଯାଞ୍ଚ କରିବ ।
ନିଆଁ ଲାଗିବା ସମୟରେ ଫ୍ୟାକ୍ଟ୍ରିରେ 80ରୁ 85 ଜଣ ରହିଥିବା ବେଳେ ନିଆଁ ଲାଗିବା ପରେ ସଙ୍ଗେସଙ୍ଗେ 30ଜଣ ଆହତଙ୍କୁ ଉଦ୍ଧାର କରାଯାଇ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ଜଣଙ୍କର ହସ୍ପିଟାଲରେ ମୃତ୍ୟୁ ହୋଇଥିବା ବେଳେ 29ଜଣଙ୍କ ଚିକିତ୍ସା ଜାରି ରହିଛି । ଅନ୍ୟପଟେ 13 ଜଣ ନିଖୋଜ ହୋଇଥିବା ବେଳେ ଆଜି ଆଉ 4ଜଣଙ୍କ ମୃତଦେହ ଉଦ୍ଧାର କରାଯାଇଛି । ସମୁଦାୟ 5ଜଣଙ୍କ ମୃତ୍ୟୁ ହୋଇଛି । ଆହୁରି 9ଜଣ ନିଖୋଜ ରହିଥିବା ସୂଚନା ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
