ଚେନ୍ନାଇ: ଆଖି ବୁଜିଲେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟାକାରୀ । ଆଜି(ବୁଧବାର) ସକାଳେ ଚେନ୍ନାଇ ସ୍ଥିତ ରାଜୀବ ଗାନ୍ଧୀ ଜେନେରାଲ ହସ୍ପିଟାଲରେ ହତ୍ୟାକାରୀ ସନ୍ଥନଙ୍କ ମୃତ୍ୟୁ ହୋଇଛି । ସନ୍ଥନର ବୟସ 55 ବର୍ଷ ବୋଲି କୁହାଯାଇଛି ।
ସୂଚନା ଅନୁସାରେ, ଯକୃତରେ ସମସ୍ୟା ଏବଂ କ୍ରିପ୍ଟୋଜେନିକ ସିରୋସିସ କାରଣରୁ ଗତ ଜାନୁଆରୀ ମାସରୁ ରାଜୀବ ଗାନ୍ଧୀ ଜେନେରାଲ ହସ୍ପିଟାଲରେ ଭର୍ତ୍ତି ହୋଇଥିଲା । ତେବେ ଆଜି(ବୁଧବାର) ସକାଳେ ତାଙ୍କୁ ହାର୍ଟଆଟାକ ଆସିଥିବା ନେଇ ଡାକ୍ତର ତୀରାରାଜନ ସୂଚନା ଦେଇଛନ୍ତି । ଏହାରି ଭିତରେ ସକାଳ 7ଟା 50ମିନଟରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି ।
୧୯୯୧ ମସିହା ମେ ୩୧ ତାରିଖ ଦିନ ତାମିଲନାଡୁର ଏକ ରାଜନୈତିକ ସଭାରେ ଧନୁନାମକ ମହିଳା ଆତ୍ମଘାତୀ ବିସ୍ଫୋରଣ ଦ୍ବାରା ହତ୍ୟା କରାଯାଇଥିଲା । ଏହି ମାମଲାରେ ପେରିଭାଲାନ ସମେତ ୭ ଜଣ ଦୋଷୀ ସାବ୍ୟସ୍ତ ହୋଇଥିଲେ । ତେବେ ହତ୍ୟାକଣ୍ଡରେ ସନ୍ଥନ ସାମିଲ ହୋଇଥିବା ବେଳେ ତାଙ୍କୁ ମୃତ୍ୟୁ ଦଣ୍ଡାଦେଶ ଦିଆଯାଇଥିଲା । 32 ବର୍ଷରୁ ଅଧିକ ବର୍ଷ ଧରି କାରାଗାରରେ ରହିବା ପରେ ତାଙ୍କ ସହିତ 5ଜଣଙ୍କୁ ନଭେମ୍ବର 2022ରେ ମୁକ୍ତ କରାଯାଇଥିଲା । ଏହାପରେ ସେମାନଙ୍କୁ ଏକ ସ୍ବତନ୍ତ୍ର କ୍ୟାମ୍ପରେ ରଖାଯାଇଥିଲା । ତେବେ ସନ୍ଥନ ତାଙ୍କ ମାଆଙ୍କ ସହ ରହିବା ପାଇଁ ଶ୍ରୀଲଙ୍କା ଫେରିବା ପାଇଁ ମାଡ୍ରାସ ହାଇକୋର୍ଟରେ ଆବେଦନ କରିଥିଲେ ।
ରାଜୀବ ଗାନ୍ଧୀ ସରକାରୀ ହସ୍ପିଟାଲରେ ଗଣମାଧ୍ୟମକୁ ସୂଚନା ଦେଇ ସନ୍ଥନଙ୍କ ଓକିଲ ପୁଗାଲେନ୍ଧି କହିଛନ୍ତି, "କେନ୍ଦ୍ର ସରକାର ଶ୍ରୀଲଙ୍କାକୁ ଫେରାଇବା ପାଇଁ ତାଙ୍କୁ କୌଣସି ପ୍ରକାର ସାହାଯ୍ୟ କରିନଥିଲେ । ଚିକିତ୍ସାରେ ବିଳମ୍ବ ହେତୁ ତାଙ୍କର ମୃତ୍ୟୁ ହୋଇଛି । ଆଇନ ଅନୁସାରେ, ମୃତଦେହ ତାଙ୍କ ଘରକୁ ପଠାଯିବ । ଶ୍ରୀଲଙ୍କାର ଜାଫାନ୍ନାରେ ତାଙ୍କ ଘର ।
ପ୍ରକାଶଥାଉକି, ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟା ମାମଲାରେ ସମ୍ପୃକ୍ତ 6 ଜଣ ଦୋଷୀ ନଭେମ୍ବର 2022ରେ ଜେଲରୁ ମୁକ୍ତ ହୋଇଥିଲେ । ମାମଲାରେ ସମ୍ପୃକ୍ତ 6 ଜଣ ଦୋଷୀ ଜେଲରୁ ମୁକୁଳିଥିଲେ । ସୁପ୍ରିମକୋର୍ଟ ରାୟ ଶୁଣାଣି କରି ଏହି ନିର୍ଦ୍ଦେଶ ଦେଇଥିଲେ । ଏହି ମାମଲାରେ 7 ଜଣ ସମ୍ପୃକ୍ତ ଥିଲେ । ନଳିନୀ ଶ୍ରୀହରନ, ଆର ପି ରବିଚନ୍ଦ୍ରନଙ୍କ ସମେତ ଅନ୍ୟ 4 ଜଣଙ୍କୁ ଜେଲରୁ ମୁକ୍ତ କରାଯାଇଥିଲା । ପୂର୍ବରୁ ଏ.ଜି ପେରିଭାଲାନଙ୍କୁ ମୁକ୍ତ କରାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
