ରାୟପୁର: ଲୋକସଭା ନିର୍ବାଚନ ପାଇଁ ଆଉ ମାତ୍ର କିଛି ମାସ ବାକି । ଏହାରି ଭିତରେ କଂଗ୍ରେସ ନେତା ରାହୁଲ ଗାନ୍ଧୀ ମଣିପୁରରୁ ମୁମ୍ବାଇ ପର୍ଯ୍ୟନ୍ତ 6700 କିଲୋମିଟର ଭାରତ ଯୋଡ ଯାତ୍ରା ଆରମ୍ଭ କରିଛନ୍ତି । ରାହୁଲଙ୍କ ନ୍ୟାୟ ଯାତ୍ରା ଆଜି ଛତିଶଗଡର କୋରବାରୁ ଆରମ୍ଭ ହୋଇଛି । ଏହି ଯାତ୍ରା ବିହାର, ଝାଡ଼ଖଣ୍ଡ ଏବଂ ଓଡିଶା ପରେ ଛତିଶଗଡ଼ରେ ପହଞ୍ଚିଛି । ଯେଉଁଠି କେନ୍ଦ୍ର ସରକାରଙ୍କ ଉପରେ ପ୍ରବଳ ବର୍ଷିଛନ୍ତି କଂଗ୍ରେସ ଯୁବରାଜ ।
କୋରବାରେ ରାହୁଲ ଗାନ୍ଧୀ କହିଛନ୍ତି, "ବିଜେପି ସରକାର ବିମୁଦ୍ରୀକରଣ କରିଥିଲେ ଏବଂ ପରେ ଜିଏସଟି ମଧ୍ୟ ଲାଗୁ କଲେ । ସରକାରଙ୍କ ଏହି ନିଷ୍ପତ୍ତି ଯୋଗୁଁ କ୍ଷୁଦ୍ର ବ୍ୟବସାୟୀମାନେ ସମସ୍ୟାର ସମ୍ମୁଖୀନ ହେଉଛନ୍ତି । ଶକ୍ତି, ପ୍ରତିରକ୍ଷା, ସ୍ୱାସ୍ଥ୍ୟ, ରିଟେଲ ଏବଂ ଏୟାରପୋର୍ଟ ପ୍ରତ୍ୟେକ ସ୍ଥାନରେ ମନୋନୀତ ବ୍ୟକ୍ତି ବିଶେଷ ରହିଛନ୍ତି । ଏହାର ଅର୍ଥ ତିନି-ଚାରିଜଣଙ୍କ ପାଇଁ ସମଗ୍ର ବ୍ୟବସ୍ଥା ଚାଲିଛି । ଅନ୍ୟ ବ୍ୟକ୍ତିବିଶେଷଙ୍କୁ ମୁଦ୍ରାସ୍ଫୀତି ଦ୍ବାରା ଚପାଇ ଦିଆଯାଉଛି । ଏହା ଏକ ପ୍ରକାର ଆର୍ଥିକ ଅନ୍ୟାୟ ଅଟେ । "
ରାହୁଲ ଆହୁରି ମଧ୍ୟ କହିଛନ୍ତି, "ଦେଶରେ ପଛୁଆ ବର୍ଗର 50 ପ୍ରତିଶତ, ଦଳିତ 16 ପ୍ରତିଶତ ରହିଛନ୍ତି । ସେମାନଙ୍କର ସମସ୍ତ କଷ୍ଟ ଉପାର୍ଜିତ ଅର୍ଥ ପୁଞ୍ଜିପତିଙ୍କ କମ୍ପାନୀକୁ ଯାଉଛି । କିନ୍ତୁ ସେମାନଙ୍କ କମ୍ପାନୀରେ କୌଣସି ଦଳିତ ଏବଂ ପଛୁଆ ବର୍ଗର ବ୍ୟକ୍ତି ବିଶେଷ ନାହାନ୍ତି । ଦେଶର ବିଭିନ୍ନ କ୍ଷେତ୍ରରେ ଦଳିତ ଏବଂ ପଛୁଆ ବ୍ୟକ୍ତିବିଶେଷ ଅଂଶଗ୍ରହଣ କରନ୍ତି ନାହିଁ । ହିନ୍ଦୁ ରାଷ୍ଟ୍ର ବିଷୟରେ ବିଜେପି ନାରା ଦେଉଥିବା ବେଳେ ପଛୁଆ, ଦଳିତ ଏବଂ ଆଦିବାସୀ ଶ୍ରେଣୀର ଲୋକମାନେ କିଛି ପାଇ ନାହାନ୍ତି । ରାମ ମନ୍ଦିରର ଉଦଘାଟନ ସମୟରେ ମଧ୍ୟ ଜଣେ ଗରିବ ଶ୍ରମିକ କୃଷକ ଉପସ୍ଥିତ ନଥିଲେ ।"
ଏହା ମଧ୍ୟ ପଢନ୍ତୁ: ଭାରତ ଯୋଡ ନ୍ୟାୟ ଯାତ୍ରା ବେଳେ ରାହୁଲଙ୍କ କାରକୁ ପଥର ମାଡ, ଟିଏମସିକୁ ଘେରିଲା କଂଗ୍ରେସ
ଲୋକସଭା ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ଭାରତ ଯୋଡ ନ୍ୟାୟ ଯାତ୍ରା ଆରମ୍ଭ କରିଛି । ଲୋକଙ୍କୁ ନ୍ୟାୟ ପ୍ରଦାନ କରିବା ଏହି ଯାତ୍ରାର ମୁଖ୍ୟ ଉଦ୍ଦେଶ୍ୟ । ଏହି ଯାତ୍ରା ମାଧ୍ୟମରେ ଦଳ ନିଜର ସମର୍ଥନ ଆଧାରକୁ ମଜବୁତ କରିବାକୁ ଚେଷ୍ଟା କରୁଛି । 14 ଜାନୁଆରୀରୁ ମଣିପୁରରୁ ଆରମ୍ଭ ହୋଇଥିବା ଯାତ୍ରା ଆସନ୍ତା ମାର୍ଚ୍ଚ 20 ତାରିଖରେ ମୁମ୍ବାଇରେ ଶେଷ ହେବ ।
ଅନ୍ୟପଟେ କଂଗ୍ରେସ ମହାସଚିବ ଜୟରାମ ରମେଶ କହିଛନ୍ତି, "ବିହାର ରାଜନୀତିକୁ ନେଇ କଣ କୁହାଯାଇପାରେ। ଯେତେବେଳେ ପଲଟି କୁମାର ଶାସନ କରୁଛନ୍ତି, ସେ କେଉଁ ଆଡେ ଯିବେ କେହି ଜାଣି ନାହାନ୍ତି । ଫ୍ଲୋର ଟେଷ୍ଟର ଆବଶ୍ୟକତା ରହିଛି । ବିଜେପି ଆମ ଦଳକୁ ଭାଙ୍ଗିବାକୁ ଚେଷ୍ଟା କରୁଛି । ଆରଜେଡିକୁ ମଧ୍ୟ ଭାଙ୍ଗିବାକୁ ଚେଷ୍ଟା କରୁଛି, ହେଲେ ସେମାନେ ବିଫଳ ହେବେ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
