ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳ ନେତା ହେଲେ କଂଗ୍ରେସ ନେତା ତଥା ରାୟବରେଲି ସାଂସଦ ରାହୁଲ ଗାନ୍ଧୀ । ଏନେଇ ଗତକାଲି (ମଙ୍ଗଳବାର) କଂଗ୍ରେସ ପକ୍ଷରୁ ଘୋଷଣା କରାଯାଇଛି । 9 ତାରିଖରେ ବସିଥିବା କଂଗ୍ରେସ ସଂସଦୀୟ ଦଳ ବୈଠକରେ ରାହୁଲଙ୍କ ନାମରେ ବିଚାର ବିମର୍ଶ ଜାରି ରହିଥିଲା । ହେଲେ ଆନୁଷ୍ଠାନିକ ଘୋଷଣା କରାଯାଇନଥିଲା । ଗତକାଲି ଇଣ୍ଡିଆ ମେଣ୍ଟର ବୈଠକ ପରେ କଂଗ୍ରେସର ବରିଷ୍ଠ ନେତା ତଥା ସାଙ୍ଗଠନିକ ସମ୍ପାଦକ କେସି ବେଣୁଗୋପାଲ ଏହି ସୂଚନା ଦେଇଛନ୍ତି । କଂଗ୍ରେସ ସଂସଦୀୟ ଦଳର ଅଧ୍ୟକ୍ଷା ସୋନିଆ ଗାନ୍ଧୀ କାମଚଳା ବାଚସ୍ପତି ଭର୍ତ୍ତୃହରି ମହତାବଙ୍କୁ ଚିଠି ଲେଖି ଏସମ୍ପର୍କରେ ଅବଗତ କରିଛନ୍ତି ।
10 ବର୍ଷ ଧରି ଖାଲି ପଡିଥିଲା ଏହି ପଦବୀ :-
ସଦନର ଏହି ପ୍ରତ୍ୟେକ୍ଷ ନିର୍ବାଚିତ ଗୃହରେ ମୋଦି ସରକାରର ପ୍ରଥମ ଦୁଇ ପାଳି ତଥା ଷୋଡଶ ଓ ସପ୍ତଦଶ (2014-2024) ଲୋକସଭାରେ ବିରୋଧୀ ଦଳ ନେତା ପଦବୀ ଖାଲି ପଡିଥିଲା । ସାମ୍ବିଧାନିକ ପରମ୍ପରା ଅନୁସାରେ, ଏହି ପଦବୀ ପାଇଁ ବିରୋଧୀ ଗୋଷ୍ଠୀରେ ଥିବା କୌଣସି ରାଜନୈତିକ ଦଳ ନିକଟରେ ଗୃହର ମୋଟ ସଂଖ୍ୟାର 10 ପ୍ରତିଶତ ପ୍ରତିନିଧିତ୍ବ ରହିବା ଜରୁରୀ । ମାତ୍ର କଂଗ୍ରେସ ସଦନରେ ଦ୍ବିତୀୟ ବୃହତ୍ତମ ଦଳ ହୋଇଥିଲେ ସୁଦ୍ଧା ଏହି ମାପଦଣ୍ଡ ପୂରଣ କରିବାରେ ବିଫଳ ହୋଇଥିଲା । ସେହି କାରଣରୁ ବିରୋଧୀ ଦଳ ପଦବୀ ଖାଲି ପଡିଥିଲା । କଂଗ୍ରେସ 2014ରେ 44 ଓ 2019ରେ 52 ଆସନ ଜିତିଥିଲା । ଏଥର ଦଳ ପାଖରେ 102 ଆସନ ରହିଛି ।
