ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳ ନେତା ହେଲେ କଂଗ୍ରେସ ନେତା ତଥା ରାୟବରେଲି ସାଂସଦ ରାହୁଲ ଗାନ୍ଧୀ । ଏନେଇ ଗତକାଲି (ମଙ୍ଗଳବାର) କଂଗ୍ରେସ ପକ୍ଷରୁ ଘୋଷଣା କରାଯାଇଛି । 9 ତାରିଖରେ ବସିଥିବା କଂଗ୍ରେସ ସଂସଦୀୟ ଦଳ ବୈଠକରେ ରାହୁଲଙ୍କ ନାମରେ ବିଚାର ବିମର୍ଶ ଜାରି ରହିଥିଲା । ହେଲେ ଆନୁଷ୍ଠାନିକ ଘୋଷଣା କରାଯାଇନଥିଲା । ଗତକାଲି ଇଣ୍ଡିଆ ମେଣ୍ଟର ବୈଠକ ପରେ କଂଗ୍ରେସର ବରିଷ୍ଠ ନେତା ତଥା ସାଙ୍ଗଠନିକ ସମ୍ପାଦକ କେସି ବେଣୁଗୋପାଲ ଏହି ସୂଚନା ଦେଇଛନ୍ତି । କଂଗ୍ରେସ ସଂସଦୀୟ ଦଳର ଅଧ୍ୟକ୍ଷା ସୋନିଆ ଗାନ୍ଧୀ କାମଚଳା ବାଚସ୍ପତି ଭର୍ତ୍ତୃହରି ମହତାବଙ୍କୁ ଚିଠି ଲେଖି ଏସମ୍ପର୍କରେ ଅବଗତ କରିଛନ୍ତି ।
Congress President Mallikarjun Kharge tweets, " in the 18th lok sabha, the house of the people shall truly reflect the aspirations of the last person standing, with rahul gandhi becoming their voice. as congress president, i am confident that a leader who has traversed the length… pic.twitter.com/Hi3oMzatK0
— ANI (@ANI) June 25, 2024
10 ବର୍ଷ ଧରି ଖାଲି ପଡିଥିଲା ଏହି ପଦବୀ :-
ସଦନର ଏହି ପ୍ରତ୍ୟେକ୍ଷ ନିର୍ବାଚିତ ଗୃହରେ ମୋଦି ସରକାରର ପ୍ରଥମ ଦୁଇ ପାଳି ତଥା ଷୋଡଶ ଓ ସପ୍ତଦଶ (2014-2024) ଲୋକସଭାରେ ବିରୋଧୀ ଦଳ ନେତା ପଦବୀ ଖାଲି ପଡିଥିଲା । ସାମ୍ବିଧାନିକ ପରମ୍ପରା ଅନୁସାରେ, ଏହି ପଦବୀ ପାଇଁ ବିରୋଧୀ ଗୋଷ୍ଠୀରେ ଥିବା କୌଣସି ରାଜନୈତିକ ଦଳ ନିକଟରେ ଗୃହର ମୋଟ ସଂଖ୍ୟାର 10 ପ୍ରତିଶତ ପ୍ରତିନିଧିତ୍ବ ରହିବା ଜରୁରୀ । ମାତ୍ର କଂଗ୍ରେସ ସଦନରେ ଦ୍ବିତୀୟ ବୃହତ୍ତମ ଦଳ ହୋଇଥିଲେ ସୁଦ୍ଧା ଏହି ମାପଦଣ୍ଡ ପୂରଣ କରିବାରେ ବିଫଳ ହୋଇଥିଲା । ସେହି କାରଣରୁ ବିରୋଧୀ ଦଳ ପଦବୀ ଖାଲି ପଡିଥିଲା । କଂଗ୍ରେସ 2014ରେ 44 ଓ 2019ରେ 52 ଆସନ ଜିତିଥିଲା । ଏଥର ଦଳ ପାଖରେ 102 ଆସନ ରହିଛି ।
ବିରୋଧୀ ଦଳ ନେତା ହେବାରେ ଗାନ୍ଧୀ ପରିବାରର ତୃତୀୟ ସଦସ୍ୟ ହେଉଛନ୍ତି ରାହୁଲ ଗାନ୍ଧୀ । ଏହା ପୂର୍ବରୁ ରାହୁଲଙ୍କ ପିତା ତଥା ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀ ଓ ମା’ ତଥା ପୂର୍ବତନ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଲୋକସଭାରେ ଏହି ଭୂମିକା ଗ୍ରହଣ କରିସାରିଛନ୍ତି । ଏବେ ରାହୁଲ ବିରୋଧୀ ଦଳ ନେତା ହେବାରେ ଗାନ୍ଧୀ ପରିବାରର ତୃତୀୟ ସଦସ୍ୟ ।
2014ରେ ନରେନ୍ଦ୍ର ମୋଦିଙ୍କ ନେତୃତ୍ବରେ ବିଜେପି କେନ୍ଦ୍ରରେ ସରକାର ଗଠନ କରିବା ପରେ ଅତି ଦୁର୍ବଳ ସ୍ଥିତିରେ ନଜର ଆସିଥିଲେ ବିରୋଧୀ । ଏହା ପୂର୍ବରୁ 2004ରେ ମନମୋହନ ସିଂଙ୍କ ନେତୃତ୍ବାଧୀନ କଂଗ୍ରେସ ସରକାରରେ ପୂର୍ବତନ ଉପ-ପ୍ରଧାନମନ୍ତ୍ରୀ ଲାଲକୃଷ୍ଣ ଆଡଭାନୀ ବିରୋଧୀ ଦଳ ନେତା ଥିଲେ । ସେ ପ୍ରାୟ ସାଢେ ଚାରିବର୍ଷ ଧରି ଏହି ଦାୟିତ୍ବ ତୁଲାଇଥିଲେ । ‘ଉପା’ ଦ୍ବିତୀୟ ପାଳିରେ ଏହି ଦାୟିତ୍ବ ବିଜେପିର ବରିଷ୍ଠ ନେତ୍ରୀ ସୁଷମା ସ୍ବରାଜଙ୍କ କାନ୍ଧକୁ ଆସିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
