ହାଇଦ୍ରାବାଦ: ରାଜନୀତିରେ ଏଣ୍ଟ୍ରି ମାରିବେ କଂଗ୍ରେସ ନେତ୍ରୀ ତଥା ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଭଉଣୀ ପ୍ରିୟଙ୍କା ଗାନ୍ଧୀ । ଆଜି ଭାରତୀୟ ନିର୍ବାଚନ କମିଶନଙ୍କ ପକ୍ଷରୁ ମହାରାଷ୍ଟ୍ର ଏବଂ ଝାଡଖଣ୍ଡ ବିଧାନସଭା ନିର୍ବାଚନ ସହିତ 48ଟି ବିଧାନସଭା କ୍ଷେତ୍ରରେ ଉପ-ନିର୍ବାଚନ ସହିତ 2ଟି ଲୋକସଭା ଆସନରେ ଉପ-ନିର୍ବାଚନ ନେଇ ତାରିଖ ଘୋଷଣା ହୋଇଛି ।
କେରଳ ଓ୍ବାୟନାଡରେ ଆସନ୍ତା ମାସ ଅର୍ଥାତ ନଭେମ୍ବର 13 ତାରିଖରେ ଉପ-ନିର୍ବାଚନ ହେବାକୁ ଥିବା ବେଳେ 23 ତାରିଖରେ ଫଳାଫଳ ଘୋଷଣା ହେବ । ତେବେ କେରଳ ଆସନରୁ ନିର୍ବାଚନରେ ବିଜୟୀ ହେବା ପରେ ଇସ୍ତଫା ଦେଇଥିଲେ କଂଗ୍ରେସ ସାଂସଦ ରାହୁଲ ଗାନ୍ଧୀ । ଆଜି ଉପ-ନିର୍ବାଚନ ତାରିଖ ଘୋଷଣା ପରେ କଂଗ୍ରେସ ପକ୍ଷରୁ ପ୍ରିୟଙ୍କାଙ୍କୁ ମିଳିଛି ଓ୍ବାୟନାଡ ଟିକେଟ । ଦଳ କହିଛି ପ୍ରିୟଙ୍କା ବିଜୟୀ ହୋଇ ଲୋକସଭାକୁ ଆସିବେ ଏବଂ ଦଳ ଲୋକସଭାରେ ମଜବୁତ ହେବ । ରାହୁଲ ଗାନ୍ଧୀ ଓ୍ବାୟନାଡ ଆସନ ଏବଂ ଉତ୍ତର ପ୍ରଦେଶ କଂଗ୍ରେସ ଗଡ ରାଏ ବରେଲି ଉଭୟ ଆସନରୁ ନିର୍ବାଚନ ବିଜୟୀ ହୋଇଥିଲେ । ପରେ ଓ୍ବାୟନାଡ ଲୋକସଭା କ୍ଷେତ୍ରରୁ ଇସ୍ତଫା ଦେଇଥିଲେ ରାହୁଲ ।
ତେବେ ଗତ ଲୋକସଭା ନିର୍ବାଚନ ଫଳାଫଳ ଆସିବା ପରେ କଂଗ୍ରେସ ପକ୍ଷରୁ ଓ୍ବାୟନାଡରେ ପ୍ରିୟଙ୍କାଙ୍କ ପ୍ରାର୍ଥୀତ୍ବ ନେଇ ଘୋଷଣା ହୋଇଥିଲା ଏବଂ ନିର୍ବାଚନ କମିଶନଙ୍କ ତାରଖ ଘୋଷଣା ଔପଚାରିକତା ଥିଲା ।ତେବେ ନିୟମ ମୁତାବକ ନିର୍ବାଚନ ଶେଷ ହେବାର 6 ମାସ ମଧ୍ୟରେ ଉପ ନିର୍ବାଚନ ଅନୁଷ୍ଠିତ ହୁଏ ।
ୱାୟନାଡ଼ରୁ ଲଢ଼ିବେ ପ୍ରିୟଙ୍କା
- ୱାୟନାଡ଼ ସଂସଦୀୟ କ୍ଷେତ୍ରରୁ ଲଢ଼ିବେ ପ୍ରିୟଙ୍କା ଗାନ୍ଧୀ
- ଏଆଇସିସି ପକ୍ଷରୁ ପ୍ରିୟଙ୍କାଙ୍କୁ ପ୍ରାର୍ଥୀ ଘୋଷଣା
- ରାହୁଲ ଗାନ୍ଧୀଙ୍କ ଇସ୍ତଫା ପରେ ଓ୍ବାୟନାଡରେ ହେବ ଉପନିର୍ବାଚନ
"ଲୋକସଭା ଉପନିର୍ବାଚନ ତାରିଖ ଘୋଷଣା ପରେ ଆମେ ବହୁତ ଉତ୍ସାହିତ । ରେକର୍ଡ ମାର୍ଜିନ୍ 5 ଲକ୍ଷରୁ ଅଧିକ ଭୋଟରେ ପ୍ରିୟଙ୍କା ଓ୍ବାୟନାଡ ଆସନରୁ ବିଜୟୀ ହେବେ । ଆମେ ଉପନିର୍ବାଚନ ପାଇଁ ପ୍ରସ୍ତୁତି ଚଳାଇଥିଲୁ । ଓ୍ବାୟନାଡରେ ଗତ କିଛି ମାସ ଧରି ଦଳ ପକ୍ଷରୁ କ୍ୟାମ୍ପେନିଂ ଏବଂ ଭୋଟର ପଞ୍ଜିକରଣ କାର୍ଯ୍ୟକ୍ରମ ଚାଲୁ ରହିଥିଲା," ବୋଲି ଏରନାକୁଲମ୍ ଲୋକସଭା ସାଂସଦ ହିବି ଇଦେନ୍ 'ଇଟିଭି ଭାରତ'କୁ କହିଛନ୍ତି ।
ସେ ପୁଣି କହିଛନ୍ତି, "ଲୋକସଭାରେ ପ୍ରିୟଙ୍କାଙ୍କ ଉପସ୍ଥିତି ଦଳକୁ ବଳ ଯୋଗାଇବ ବା ସହିତ ଅଧିକ ଶକ୍ତିଶାଳୀ କରିବ । ସେ ବର୍ତ୍ତମାନ ଓ୍ବାୟନାଡବାସୀଙ୍କ ବିକାଶ କଥା ଉପରେ ଫୋକସ କରିବେ ।" ତେବେ ଇଦେନଙ୍କ ମତରେ ପ୍ରିୟଙ୍କା ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ପରି ରାଜନୈତିକ ଗୋଟିଚାଳନାରେ ଧୁରନ୍ଧର ଏବଂ ଦକ୍ଷିଣ ଭାରତୀୟ ରାଜ୍ୟରୁ ତାଙ୍କ ରାଜନୈତିକ କ୍ୟାରିଅରର ଆରମ୍ଭ ହେବ ।
ଦୁଇ ରାଜ୍ୟରେ ବିଧାନସଭା ନିର୍ବାଚନ- ବାଜିଲା ବିଗୁଲ-
ବାଜିଲା ଦୁଇ ରାଜ୍ୟର ନିର୍ବାଚନ ବିଗୁଲ । ମହାରାଷ୍ଟ୍ରରେ ଗୋଟିଏ ପର୍ଯ୍ୟାୟରେ ହେବ ମତଦାନ । ମହାରାଷ୍ଟ୍ରର 288 ଆସନ ପାଇଁ ପଡ଼ିବ ଭୋଟ୍ । 20 ନଭେମ୍ବରରେ ଗୋଟିଏ ପର୍ଯ୍ୟାୟରେ ମହାରାଷ୍ଟ୍ରରେ ପଡ଼ିବ ଭୋଟ । 23ରେ ହେବ ଗଣତି। ସେହିପରି ଝାଡଖଣ୍ଡ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା କଲେ ନିର୍ବାଚନ କମିଶନ । ଝାଡଖଣ୍ଡର 81 ଆସନରେ ହେବ ମତଦାନ। ଦୁଇଟି ପର୍ଯ୍ୟାୟରେ ଭୋଟ ଗ୍ରହଣ କରାଯିବ। ନଭେମ୍ବର 13 ତାରିଖରେ ପ୍ରଥମ ପର୍ଯ୍ୟାୟ ଓ 20ରେ ଦ୍ବିତୀୟ ପର୍ଯ୍ୟାୟ ମତଦାନ। ନଭେମ୍ବର 23ରେ ଝାଡଖଣ୍ଡରେ ମଧ୍ୟ ଭୋଟ ଗଣତି ହେବ।
ପ୍ରିୟଙ୍କାର ରାଜନୈତିକ ଅଭିଜ୍ଞତା-
କଂଗ୍ରେସର ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ କଂଗ୍ରେସ ଟିକଟରୁ ଆଜି ଯାଏଁ ପ୍ରତ୍ୟକ୍ଷ ନିର୍ବାଚନ ଲଢି ନଥିଲେ ମଧ୍ୟ ଦଳର ଜଣେ ବରିଷ୍ଠ ନେତ୍ରୀ ଏବଂ ଅଭିଜ୍ଞତା ସମ୍ପନ୍ନ । ଦଳ ପକ୍ଷରୁ ଆୟୋଜିତ ନିର୍ବାଚନୀ ସଭାକୁ ସେ ଅନେକ ଥର ସମ୍ବୋଧିନ କରିସାରିଛନ୍ତି । ଲୋକସଭା ହେଉକି ବିଧାନସଭା ଶାଣିତ ଢଙ୍ଗରେ ବିଜେପି ଟାର୍ଗେଟ୍ କରିବା ସହିତ କଂଗ୍ରେସ ପାଇଁ ଭୋଟ ମାଗି ସଫଳ ମଧ୍ୟ ହୋଇଛନ୍ତି । ଏକାଧିକ ପ୍ରସଙ୍ଗରେ ମୋଦି ସରକାରକୁ ଟାର୍ଗେଟ କରି ଅନେକ ଥର କାଠଗଡାକୁ ଟାଣିଛନ୍ତି । ପୂର୍ବତନ ପ୍ରଧାନମନ୍ତ୍ରୀ ତଥା ବାପା ରାଜୀବ ଗାନ୍ଧୀଙ୍କ ଲୋକପ୍ରିୟତା ଓ ଜଣେ ପ୍ରଧାନମନ୍ତ୍ରୀ ଭାବେ ତାଙ୍କ କାମ କରିବାର ତରିକାକୁ ମନେ ପକାନ୍ତି ପ୍ରିୟଙ୍କା । ରାଜୀବ ଗାନ୍ଧୀଙ୍କ ଲୋକଙ୍କ ପ୍ରଧାନମନ୍ତ୍ରୀ ଥିଲେ, ଲୋକଙ୍କ ଠାରୁ ଗାଳି ମଧ୍ୟ ଶୁଣୁଥିଲେ ବୋଲି ପ୍ରିୟଙ୍କା କହିସାରିଛନ୍ତି ।
କଂଗ୍ରେସ କ୍ରାଇସିସ୍ ମ୍ୟାନେଜର ପ୍ରିୟଙ୍କା !
ଉତ୍ତର ପ୍ରଦେଶରେ ଦଳ ପାଇଁ ନିକଟରେ କ୍ରାଇସିସ୍ ମ୍ୟାନେଜର ସାଜିଥିଲେ ପ୍ରିୟଙ୍କା । ଗତ ଲୋକସଭାରେ ଉତ୍ତର ପ୍ରଦେଶରେ କଂଗ୍ରେସ ଏବଂ ସମାଜାବଦୀ ଦଳ ମଧ୍ୟରେ ମେଣ୍ଟ କରାଇବାରେ ବଡ ଭାମିକା ନିର୍ବାହ କରିଥିଲେ କଂଗ୍ରେସ ଭେଟେରାନ ନେତ୍ରୀ ତଥା ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଓ ଦଳର ମହାସଚିବ ପ୍ରିୟଙ୍କା ଗାନ୍ଧୀ । ପ୍ରିୟଙ୍କା ସିଧା ଆସନ ବୁଝାମଣା ନେଇ ଅଖିଳେଶଙ୍କ କ୍ୟାମ୍ପ ସହ ଆଲୋଚନା କରି ଏହି ସମସ୍ୟାର ସମାଧାନରେ ପହଞ୍ଚିଥିବା ଚର୍ଚ୍ଚା ହୋଇଥିଲା । ସୂତ୍ରରୁ ମିଳିଥିବା ସୂଚନା ଅନୁସାରେ, ରାହୁଲ ଗାନ୍ଧୀଙ୍କୁ ଭଉଣୀ ପ୍ରିୟଙ୍କା ଅଖିଳେଶଙ୍କ ସହ ଆଲୋଚନା କରାଇଥିଲେ । ଉଭୟଙ୍କ ମଧ୍ୟରେ ଫୋନରେ ଆସନ ବୁଝାମଣା ବିବାଦର ଆଲୋଚନା ହୋଇଥିଲା ।
