ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଲ୍ ଗେଟ୍ସଙ୍କ ମଧ୍ୟରେ ଗୁରୁତ୍ବପୂର୍ଣ୍ଣ ଆଲୋଚନା ହୋଇଛି । ଆଜି(ଶୁକ୍ରବାର) ପ୍ରଧାନମନ୍ତ୍ରୀଙ୍କ ବାସଭବନରେ ମୋଦିଙ୍କ ସହ ସାକ୍ଷାତ କରିଥିଲେ ବିଲ୍ ଗେଟ୍ସ । ତେବେ ଆର୍ଟିଫିସିଆଲ ଇଣ୍ଟେଲିଜେନ୍ସ(କୃତ୍ରିମ ବୁଦ୍ଧିମତା) ଠାରୁ ନେଇ ଡିଜିଟାଲ ପେମେଣ୍ଟ ଏବଂ ଜଳବାୟୁ ପରିବର୍ତ୍ତନର ମୁକାବିଲା ଭଳି ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଛି ।
ଜି-20କୁ ନେଇ ଏଭଳି କହିଲେ ମୋଦି: ମୋଦି ଏବଂ ବିଲ୍ ଗେଟ୍ସଙ୍କ ମଧ୍ୟରେ ହୋଇଥିବା ଆଲୋଚନାର ଥିମ ରହିଥିଲା ଏଆଇଟୁ ଡିଜିଟାଲ ପେମେଣ୍ଟ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଲ୍ ଗେଟ୍ସ 2023 ଜି -20 ଶିଖର ସମ୍ମିଳନୀ ଉପରେ ମଧ୍ୟ ଆଲୋଚନା କରିଥିଲେ । ଗତବର୍ଷ ଭାରତରେ ଶିଖର ସମ୍ମିଳନୀ ହୋଇଥିଲା । ଏନେଇ ମୋଦି କହିଛନ୍ତି, "ଜି-20 ଶିଖର ସମ୍ମିଳନୀ ପୂର୍ବରୁ ଆମର ବ୍ୟାପକ ଆଲୋଚନା ହୋଇଥିଲା । ଆପଣ ଦେଖିଥିବେ ଯେ, ଶିଖର ସମ୍ମିଳନୀର କାର୍ଯ୍ୟ ପ୍ରକ୍ରିୟାରେ ଅନେକ ମୋଡ ଆସିଥିଲା । ମୁଁ ଭାବୁଛି ଆଜି ଆମେ ଜି -20ର ମୂଳ ଲକ୍ଷ୍ୟ ଏବଂ ଉଦ୍ଦେଶ୍ୟ ସହିତ ଯୋଡି ହୋଇ ରହିଛୁ ଏବଂ ତାହାକୁ ମୁଖ୍ୟସ୍ରୋତକୁ ଆଣିବୁ ବୋଲି ଭାବୁଛୁ ।" ତେବେ ଭାରତ ଜି 20ର ଆୟୋଜନ କରୁଥିବା ଦେଖି ମୁଁ ବହୁତ ଖୁସି ହୋଇଥିଲି ବୋଲି କହିଛନ୍ତି ବିଲ୍ ଗେଟ୍ସ ।
କୃଷି କ୍ଷେତ୍ରରେ ମଧ୍ୟ ବୈପ୍ଲବିକ ପରିବର୍ତ୍ତନ ଆସିଥିବା ନେଇ ମଧ୍ୟ ଚର୍ଚ୍ଚା ହୋଇଛି । ଯଦି ସ୍ବାସ୍ଥ୍ୟ କ୍ଷେତ୍ର କଥା କହିବା ତାହେଲେ ଡାକ୍ତରଖାନାକୁ ମଧ୍ୟ ଟେକ୍ନୋଲୋଜି ସହିତ ଯୋଡା ଯାଇଛି । 3 କୋଟି ଲକ୍ଷପତି ଦିଦି ସୃଷ୍ଟି କରିବାକୁ ଆମର ଲକ୍ଷ ବୋଲି କହିଛନ୍ତି ମୋଦି । ଏବେ ଗାଁ ଗାଁରେ ଡିଜିଟାଲ ସୁବିଧା ପହଞ୍ଚିଛି ବୋଲି ପ୍ରଧାନମନ୍ତ୍ରୀ ବିଲ୍ ଗେଟ୍ସକୁ କହିଛନ୍ତି ।
ଜିଡିଟାଲ କ୍ରାନ୍ତିକୁ ନେଇ ମୋଦିଙ୍କ ବୟାନ: ବିଲ୍ ଗେଟ୍ସ ଯେତେବେଳେ ଡିଜିଟାଲ କ୍ରାନ୍ତି ବିଷୟରେ ସୂଚନା ଦେଇଥିଲେ ସେତେବେଳେ ତାଙ୍କୁ NaMo Drone Didi ସ୍କିମ ଉପରେ କହିଥିଲେ ମୋଦି । ପ୍ରଧାନମନ୍ତ୍ରୀ କହିଥିଲେ, "ଯେତେବେଳେ ବିଶ୍ବରେ ଡିଜିଟାଲ ବିଭାଜନ ବିଷୟରେ ଶୁଣିଥିଲି, ସେତେବେଳେ ମୁଁ ଭାବିଥିଲି ଭାରତରେ ମୁଁ ଏହା କରିବାକୁ ଦେବି ନାହିଁ । ଡିଜିଟାଲ ପବ୍ଲିକ ଇନଫ୍ରାଷ୍ଟକଚର ଆବଶ୍ୟକତା ବୃଦ୍ଧି ପାଇଛି । ଭାରତରେ ମହିଳାମାନେ ନୂତନ ଟେକ୍ନୋଲୋଜି ଗ୍ରହଣ କରିବାକୁ ଅଧିକ ଆଗ୍ରହ ପ୍ରକାଶ କରୁଛନ୍ତି । ମୁଁ ନମୋ ଡ୍ରୋନ ଦିଦି ଯୋଜନା ଆରମ୍ଭ କରିଛି । ଏହା ଦ୍ରୁତ ଗତିରେ ଆଗକୁ ବଢୁଛି । ଯେତେବେଳେ ମୁଁ ସେମାନଙ୍କ ସହିତ କଥାବାର୍ତ୍ତା କରେ, ସେମାନେ ବହୁତ ଖୁସି ହୁଅନ୍ତି । ମହିଳାମାନେ କହୁଛନ୍ତି କିପରି ସାଇକେଲ ଚଳାଇବେ ତାହା ଜାଣି ନଥିଲେ କିନ୍ତୁ ସେ ବର୍ତ୍ତମାନ ପାଇଲଟ୍ ଏବଂ ଡ୍ରୋନ୍ ଉଡାଇ ପାରିବେ । ଧୀରେ ଧୀରେ ମାନସିକତାରେ ମଧ୍ୟ ପରିବର୍ତ୍ତନ ଆସୁଛି ।"
ଆର୍ଟିଫିସିଆଲ ଇଣ୍ଟେଲିଜେନ୍ସକୁ ନେଇ ଚର୍ଚ୍ଚା: ନରେନ୍ଦ୍ର ମୋଦି ଏବଂ ବିଲ୍ ଗେଟ୍ସ ଟେକ୍ନୋଲୋଜି, ଏଆଇର ଭୂମିକା ଏବଂ ଉପକାରିତା ଉପରେ ଚର୍ଚ୍ଚା କରିଥିଲେ । ଜି 20 ଶିଖର ସମ୍ମିଳନୀ ସମୟରେ ଏଆଇର ବ୍ୟବହାର କିଭଳି କରାଯାଇଥିବ ତାହା ବିଲ୍ ଗେଟ୍ସକୁ କହିଥିଲେ ପ୍ରଧାନମନ୍ତ୍ରୀ । କାଶୀ ତାମିଲ ସଙ୍ଗମ କାର୍ଯ୍ୟକ୍ରମରେ ହିନ୍ଦୀ ଭାଷଣକୁ କିଭଳି ତାମିଲରେ ଅନୁବାଦ କରାଯାଇଥିଲା ଏବଂ ନମୋ ଆପ୍ରେ କିଭଳି ଏଆଇର ବ୍ୟବହାର କରାଯାଇଥିଲା ସେନେଇ ମଧ୍ୟ ଚର୍ଚ୍ଚା ହୋଇଥିଲା । ଏନେଇ ମୋଦି କହିଛନ୍ତି, "ଆମେ ପ୍ରଥମ ଏବଂ ଦ୍ୱିତୀୟ ଶିଳ୍ପ ବିପ୍ଳବ ସମୟରେ ଆମେ ପଛୁଆ ରହି ଯାଇଥିଲୁ । କାରଣ ଆମେ ଉପନିବେଶ କରିଥିଲୁ । ବେଳେବେଳେ ମୁଁ ଥଟ୍ଟା କରି କହିଥାଏ ଯେ ଆମ ଦେଶରେ ଆମେ ମାତାଙ୍କୁ ଆଇ ବୋଲି କହିଥାଉ । କିନ୍ତୁ ବର୍ତ୍ତମାନ ଯେତେବେଳେ ଏକ ଶିଶୁ ଜନ୍ମ ନିଏ ସେତେବେଳେ ସେ ଆଈ ସହିତ AI ମଧ୍ୟ କହିଥାଏ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
