ନୂଆଦିଲ୍ଲୀ: ଇଣ୍ଡିଆ ମେଣ୍ଟର ନେତାମାନେ ଆଜି ଦିଲ୍ଲୀର ରାମଲୀଲା ମୈଦାନରେ 'ଗଣତନ୍ତ୍ର ବଞ୍ଚାଅ' ମହାରାଲି କରୁଛନ୍ତି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀକୁ ବିରୋଧ କରି ଏକାଠି ହୋଇଛନ୍ତି ପ୍ରମୁଖ ବିରୋଧୀ ନେତା । ଆଜି ରାଜଧାନୀରେ ବିରୋଧୀଙ୍କ ଏହି ବିଶାଳ ସମାବେଶକୁ ବିଜେପି କଡ଼ା ସମାଲୋଚନା କରିଛି । ବାସ୍ତବରେ ବିରୋଧୀଙ୍କ ଏହା 'ଗଣତନ୍ତ୍ର ବଞ୍ଚାଅ' ରାଲି ନୁହେଁ, ବରଂ ପରିବାର ବଞ୍ଚାଅ ରାଲି ଓ 'ଦୁର୍ନୀତି ଲୁଚାଅ ରାଲି' ବୋଲି କହି କଟାକ୍ଷ କରିଛନ୍ତି ବିଜେପି ମୁଖପାତ୍ର ସୁଧାଂଶୁ ତ୍ରିବେଦୀ ।
ବିଜେପି ନେତା ତ୍ରିବେଦୀ କଂଗ୍ରେସ, ଡିଏମକେ ଓ ଆରଜେଡି ସମେତ ଅନ୍ୟ ବିରୋଧୀ ଦଳ ନେତାଙ୍କ ବିରୋଧରେ ଥିବା ଦୁର୍ନୀତି ମାମଲା ଉଠାଇ କହିଛନ୍ତି ଯେ, ୨୦୧୪ ପୂର୍ବରୁ ଏହିସବୁ ଅଭିଯୋଗ ହୋଇଥିଲା । କିନ୍ତୁ ରାଜନୈତିକ ଅସହିଷ୍ଣୁତା କାରଣରୁ ମୋଦି ସରକାର ସେମାନଙ୍କୁ ଫସାଇଥିବା ବିରୋଧୀ ଅଭିଯୋଗ କରୁଛନ୍ତି । ଥରେ ଆନ୍ନା ହଜାରେଙ୍କ ନେତୃତ୍ବରେ ଐତିହାସିକ ରାମଲୀଲା ମୈଦାନରେ 'ଦୁର୍ନୀତି ବିରୋଧି ଭାରତ' ଆନ୍ଦୋଳନର ଆୟୋଜନ ହୋଇଥିଲା, ହେଲେ ଆଜି ଏହି ମୈଦାନରେ 'ଦୁର୍ନୀତି ସହ ସମସ୍ତେ' ରାଲି ଆୟୋଜିତ ହୋଇଛି ।
ଆପ୍ ଏବଂ ଅନ୍ୟ ବିରୋଧୀ ଦଳଗୁଡିକ ଏକାଠି ହେବା ସମ୍ପର୍କରେ ସୁଧାଂଶୁ ତ୍ରିବେଦୀ କହିଛନ୍ତି, ଯେଉଁ ଲୋକମାନେ ଅନେକ ନେତାଙ୍କୁ ଚୋର ବଦମାସ କହି ତଡି ଦେଇଥିଲେ ଆଜି ସେମାନେ ତାଙ୍କ ସହ ହାତ ମିଶାଇଛନ୍ତି ଯାହାକି ଏକ ଅଜବ ଓ ତାଜୁବ କଲାଭଳି ଦୃଶ୍ୟ । ବର୍ତ୍ତମାନ ତାଙ୍କର ନେତା ଲାଲୁ ପ୍ରସାଦ ଯାଦବ, ଯିଏ ଅନେକ ଦୁର୍ନୀତି ମାମଲାର ଦୋଷୀ । ଆଜି ଏ ସମସ୍ତେ ଏକାଠି ହୋଇଛନ୍ତି ସେମାନଙ୍କର ପୂର୍ବ ପାପ ଲୁଚାଇବାକୁ । ଯେଉଁ ଦଳଗୁଡିକ ରାମ ମନ୍ଦିର ବିରୋଧି ଥିଲେ, ହିନ୍ଦୁ ଧର୍ମକୁ ସମାଲୋଚନା କରୁଥିଲେ, ଦେବାଦେବୀଙ୍କ ପ୍ରତି ଆପତ୍ତିଜନକ ଟିପ୍ପଣୀ ଦେଇଥିଲେ, ସେମାନେ ନିଜର ପୁରୁଣା ଅପରାଧ ଲୁଚାଇବାକୁ ରାମଲୀଲା ମୈଦାନକୁ ବ୍ୟବହାର କରୁଛନ୍ତି ।
