ହାଇଦ୍ରାବାଦ: ଦେଶରେ ଜାରି ରହିଛି ଲୋକସଭା ନିର୍ବାଚନ ପାଇଁ ମତଦାନ । ରାଜନୈତିକ ଅସ୍ଥିରତା ମଧ୍ୟରେ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଚିଠି ଲେଖିଛନ୍ତି । ଦୁଇ ପୃଷ୍ଠାର ଚିଠି ଲେଖାଯାଇଥିବା ବେଳେ ମଲ୍ଲିକାର୍ଜୁନ ଖଡଗେ କହିଛନ୍ତି, କଂଗ୍ରେସର ନିର୍ବାଚନୀ ଇସ୍ତାହାର, ନ୍ୟାୟ ପତ୍ରର ବାସ୍ତବିକତା ଜଣାଇ ମୁଁ ଖୁସି ହେବି । ଏହାପରେ ସେ ଆଉ କୌଣସି ବିବାଦୀୟ ମନ୍ତବ୍ୟ ଦେବେ ନାହିଁ । ଏଥିପାଇଁ ମୋଦିଙ୍କୁ ସମୟ ମାଗିଛନ୍ତି ଖଡଗେ ।
ମଙ୍ଗଳସୁତ୍ର ନେଇ ଚିଠିର ଉଲ୍ଲେଖ: ଗତ 22 ତାରିଖରେ ଉତ୍ତରପ୍ରଦେଶ ଆଲିଗଡ଼ରେ କଂଗ୍ରେସ ଉପରେ ବର୍ଷିଥିଲେ ପ୍ରଧାନମନ୍ତ୍ରୀ । ମହିଳାଙ୍କ ମଙ୍ଗଳସୂତ୍ର ଉପରେ କଂଗ୍ରେସ-ଇଣ୍ଡିଆ ମେଣ୍ଟର ଆଖି ବୋଲି ପ୍ରଧାନମନ୍ତ୍ରୀ କଟାକ୍ଷ କରିଥିଲେ । ଏନେଇ ଖଡଗେ କହିଛନ୍ତି, "ଆଜି ଆପଣ ଗରିବ ଏବଂ ପଛୁଆ ବର୍ଗର ମହିଳାମାନଙ୍କର ମଙ୍ଗଳସୁତ୍ର ବିଷୟରେ କହୁଛନ୍ତି । ତେବେ ମଣିପୁରରେ ମହିଳା ଏବଂ ଦଳିତ ଯୁବତୀମାନଙ୍କ ପ୍ରତି ହୋଇଥିବା ଅତ୍ୟାଚାର ଏବଂ ଦୁଷ୍କର୍ମକାରୀଙ୍କୁ ମାଳା ପିନ୍ଧାଇ ପାଇଁ ସରକାର ଦାୟୀ ନୁହନ୍ତି କି ? ଆପଣଙ୍କର ସରକାର ସମୟରେ ଯେତେବେଳେ କୃଷକମାନେ ଆତ୍ମହତ୍ୟା କରୁଥିଲେ ସେତେବେଳେ ସେମାନଙ୍କର ସ୍ତ୍ରୀ ଏବଂ ଛୁଆଙ୍କୁ କିଭଳି ସୁରକ୍ଷା ଦେଉଥିଲେ । ଦୟାକରି ନ୍ୟାୟପତ୍ର ବିଷୟରେ ପଢନ୍ତୁ । ଯାହା ଆମେ କ୍ଷମତାକୁ ଆସିବା ପରେ କାର୍ଯ୍ୟକାରୀ ହେବ ।"
ପଦର ଗାରିମା ହରାଉଛନ୍ତି ପ୍ରଧାନମନ୍ତ୍ରୀ: ଚିଠିରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ, କିଛି ଶବ୍ଦକୁ ପ୍ରସଙ୍ଗରୁ ବାହାର କରିବା ନରେନ୍ଦ୍ର ମୋଦିଙ୍କ ଅଭ୍ୟାସ ହୋଇଯାଇଛି । ଏହାସହ ସାମ୍ପ୍ରଦାୟିକ ବିଭାଜନ ସୃଷ୍ଟି କରୁଛନ୍ତି । ଏହାକରି ଆପଣ ନିଜର ଗାରିମା ହରାଉଛନ୍ତି । ଯେତେବେଳେ ଏହା ସମାପ୍ତ ହେବ, ତେବେ ଲୋକମାନେ ମନେ ରଖିବେ ଯେ ନିର୍ବାଚନରେ ହାରିବା ଭୟରେ ଦେଶର ପ୍ରଧାନମନ୍ତ୍ରୀ କେଉଁ ଖରାପ ଭାଷା ବ୍ୟବହାର କରିଥିଲେ ।
ଚିଠିରେ ଏହା ଉଲ୍ଲେଖ: ମଲ୍ଲିକାର୍ଜୁନ ଲେଖିଥିବା ଚିଠିର ଶେଷ ଭାଗକୁ ଏକ ନାଲି ରଙ୍ଗର ସର୍କଲ କରାଯାଇଥିଲା । ଏଥିରେ ଲେଖା ହୋଇଥିଲା, ସମସ୍ତ ଜାତି ଏବଂ ସମ୍ପ୍ରଦାୟର ଯୁବକ, ମହିଳା, କୃଷକ, ଶ୍ରମିକ ଏବଂ ବର୍ଗର ଲୋକଙ୍କୁ ନ୍ୟାୟ ପ୍ରଦାନ କରିବା କଂଗ୍ରେସ ନ୍ୟାୟପତ୍ରର ଉଦ୍ଦେଶ୍ୟ । ଆପଣଙ୍କର ପରାମର୍ଶଦାତା ଆମର ମେନିଫେଷ୍ଟୋ ବିଷୟରେ ବୋଧେ ଆପଣଙ୍କୁ ଭୁଲ ସୂଚନା ଦେଉଛନ୍ତି । ଦେଶର ପ୍ରଧାନମନ୍ତ୍ରୀ ଭୁଲ ବିବୃତ୍ତି ନଦେବାକୁ ନିଶ୍ଚିତ କରିବାକୁ, ମୁଁ ଆପଣଙ୍କୁ ଭେଟି ନ୍ୟାୟପତ୍ରର ବାସ୍ତବତା ବିଷୟରେ ବର୍ଣ୍ଣନା କରି ଅଧିକ ଖୁସି ହେବି ।
ବ୍ୟୁରୋ ରିପୋର୍ଟ, ଇଟିଭି ଭାରତ
