ହାଇଦ୍ରାବାଦ: ଶେଷ ହୋଇଛି 2024 ଲୋକସଭା ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ । ଆଜି 17ଟି ରାଜ୍ୟ ଓ 4ଟି କେନ୍ଦ୍ର ଶାସିତ ଅଞ୍ଚଳର 102 ଆସନ ଲାଗି ପଡି଼ଥିଲା ଭୋଟ୍ । କିଛି ସ୍ଥାନରେ ସନ୍ଧ୍ୟା 5ଟାରେ ମତଦାନ ଶେଷ ହୋଇଥିବା ବେଳେ କିଛି ସ୍ଥାନରେ ସନ୍ଧ୍ୟା 7ଟାରେ ମତଦାନ ଶେଷ ହୋଇଛି । ଏହାପରେ ଇଭିଏମ ମେସିନରେ ସିଲ୍ ହୋଇଛି 1625 ପ୍ରାର୍ଥୀଙ୍କ ଭାଗ୍ୟ । ପଶ୍ଚିମବଙ୍ଗରେ ନିର୍ବାଚନୀ ହିଂସା ସତ୍ତ୍ବେ ସର୍ବାଧିକ 77.57% ମତଦାନ ହୋଇଥିବା ବେଳେ ବିହାରରେ ସର୍ବନିମ୍ନ 46.32% ମତଦାନ ହୋଇଛି । ଆଉ ବାକି 6 ପର୍ଯ୍ୟାୟ ମତଦାନ ପରେ ଜୁନ 4 ତାରିଖରେ ଭୋଟ ଗଣତି ଅନୁଷ୍ଠିତ ହେବ ।
| ଜାଣନ୍ତୁ କେଉଁଠି ହୋଇଛି କେତେ ପ୍ରତିଶତ ମତଦାନ ? |
| ରାଜ୍ୟ/କେନ୍ଦ୍ର ଶାସିତ ଅଞ୍ଚଳ | ଭୋଟିଂ ପ୍ରତିଶତ |
| ଆଣ୍ଡାମାନ ନିକୋବର | 56.87 |
| ପଶ୍ଚିମବଙ୍ଗ | 77.57 |
| ତ୍ରିପୁରା | 76.10 |
| ଆସାମ | 70.77 |
| ପୁଡୁଚେରୀ | 72.84 |
| ମେଘାଳୟ | 69.91 |
| ସିକ୍କିମ | 68.06 |
| ମଣିପୁର | 67.91 |
| ଜମ୍ମୁ କାଶ୍ମୀର | 65.80 |
| ଅରୁଣାଚଳ ପ୍ରଦେଶ | 63.57 |
| ଛତିଶଗଡ଼ | 63.41 |
| ମଧ୍ୟ ପ୍ରଦେଶ | 63.25 |
| ତାମିଲନାଡୁ | 62.02 |
| ଲାକ୍ଷାଦ୍ବୀପ | 59.02 |
| ଉତ୍ତର ପ୍ରଦେଶ | 57.54 |
| ନାଗାଲାଣ୍ଡ | 55.79 |
| ମହାରାଷ୍ଟ୍ର | 54.85 |
| ଉତ୍ତରାଖଣ୍ଡ | 53.56 |
| ମିଜୋରାମ | 52.91 |
| ରାଜସ୍ଥାନ | 50.27 |
| ବିହାର | 46.32 |
ଛତିଶଗଡ଼ରେ ଜଣେ ଯବାନ ଶହୀଦ:- ଆଜି ମତଦାନ ସମୟରେ ଛତିଶଗଡରେ ହିଂସାକାଣ୍ଡ ଘଟିଛି । ଛତିଶଗଡର ନକ୍ସଲ ପ୍ରଭାବିତ ବସ୍ତର ଲୋକସଭା ନିର୍ବାଚନମଣ୍ଡଳୀ ଅନ୍ତର୍ଗତ ବିଜାପୁରରେ ଭୋଟ୍ ଦେବା ସମୟରେ ଏକ ଅଣ୍ଡର ବ୍ୟାରେଲ୍ ଗ୍ରେନେଡ୍ ଲଞ୍ଚର୍ (UBGL) ସେଲ୍ ବିସ୍ଫୋରଣ ହେବା ପରେ ଜଣେ ଯବାନ ଶହୀଦ ହୋଇଛନ୍ତି । ମତଦାନ କେନ୍ଦ୍ରରେ ଡ୍ୟୁଟିରେ ଥିବା ବେଳେ ଯବାନ ଦେବେନ୍ଦ୍ର କୁମାର ବିସ୍ଫୋରଣରେ ଆହତ ହୋଇଥିଲେ । ବିଜାପୁରରୁ ଦିଲ୍ଲୀ ଯିବା ବାଟରେ ସେ ଆଖି ବୁଜିଛନ୍ତି । ବିଜାପୁରରେ ଆଉ ଏକ IED ବିସ୍ଫୋରଣ ଘଟଣାରେ CRPF ର ଆସିଷ୍ଟାଣ୍ଟ କମାଣ୍ଡାଣ୍ଟ ଆହତ ହୋଇଛନ୍ତି ।
ମଣିପୁର-ପଶ୍ଚିମବଙ୍ଗରେ ହିଂସାକାଣ୍ଡ:- ମଣିପୁରର ଏକ ପୋଲିଂ ବୁଥରେ ଗୁଳିକାଣ୍ଡ ଘଟିଛି । ଏଥିରେ 3 ଜଣ ଆହତ ହୋଇଛନ୍ତି । ଏହାବାଦ କୁଛେକ ମତଦାନ କେନ୍ଦ୍ରରେ ହିଂସାକାଣ୍ଡ ଘଟିଛି । ମଣିପୁର ଇମ୍ଫାଲ ପୂର୍ବ ଘୋଙ୍ଗମାନର ଏକ ମତଦାନ କେନ୍ଦ୍ରରେ ଜୋରଜବରଦସ୍ତ ପ୍ରବେଶ କରି ପ୍ରକ୍ସି ଭୋଟିଂ କରିଥିବା ଅଭିଯୋଗ ହୋଇଛି । ଇମ୍ଫାଲ ପଶ୍ଚିମରେ ଇରୋଇସେମ୍ବା ମତଦାନ କେନ୍ଦ୍ରରୁ ମଧ୍ୟ ସମାନ ଅଭିଯୋଗ ଆସିଛି । ସେହିପରି ପଶ୍ଚିମବଙ୍ଗ କୁଚବିହାର ଠାରେ ଭୋଟିଂ ସମୟରେ ବିଜେପି ଓ ଟିଏମସି ସମର୍ଥକ ହାତାହାତି ହୋଇଥିବା ଘଟଣା ଦେଖିବାକୁ ମିଳିଥିଲା । ସହର ନିକଟ ଚାନ୍ଦମାରି ଗାଁରେ ଉଭୟ ଦଳର କର୍ମକର୍ତ୍ତାଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ଏହାସହିତ ଦିନହାଟା ବ୍ଲକର ଭେଟାଗୁଡ଼ିଠାରେ ମଧ୍ୟ ହିଂସାକାଣ୍ଡ ଘଟିଛି । ଟିଏମସି ଅଭିଯୋଗ କରିଛି ଯେ ଏଠାରେ ଦେଶୀ ବୋମା ମାଡ଼ ହୋଇଛି, ଯେଉଁଥିରେ ବ୍ଲକ ସଭାପତି ଅନନ୍ତ ବର୍ମନ ଆହତ ହୋଇଛନ୍ତି । ଅନ୍ୟପଟେ ୟୁପି ମୁଜ୍ଜଫରନଗରର ଟଢେଡାରେ ନିର୍ବାଚନ ବନ୍ଦ କରାଯାଇଥିଲା । ଏଠାରେ ଗ୍ରାମବାସୀ ନାରାବାଜି କରିବା ସହ ଇଭିଏମ ମେସିନ ଖରାପ ଯୋଗୁଁ ମତଦାନ ବନ୍ଦ କରାଯାଇଥିଲା ।
ଗଣତନ୍ତ୍ର ମହାପର୍ବରେ ସାମିଲ ବୟସ୍କ ଭୋଟର:- ପଶ୍ଚିମବଙ୍ଗ କୁଚବିହାର ଜିଲ୍ଲାରେ ଗଣତନ୍ତ୍ରର ମହାପର୍ବରେ ସାମିଲ ହୋଇଥିଲେ ଜଣେ 108 ବର୍ଷୀୟ ବୃଦ୍ଧା । ଭାରତୀୟ ନାଗରିକ ଭାବେ ସେ ପରିଣତ ବୟସରେ ମଧ୍ୟ ନିଜ କର୍ତ୍ତବ୍ୟ ସାଧନ କରି ସମସ୍ତ ଭୋଟରଙ୍କ ଲାଗି ସାଜିଛନ୍ତି ଉଦାହରଣ । ସେହିପରି ତାମିଲନାଡୁରେ ଡିଣ୍ଡିଗୁଲ ଜିଲ୍ଲା ରେଡ୍ଡିୟାରଚତ୍ରମଠାରେ ଅଣ୍ଟା ସଳଖି ଛିଡ଼ା ହୋଇପାରୁନଥିବା ଜଣେ 102 ବର୍ଷୀୟ ବୃଦ୍ଧା ପହଞ୍ଚିଥିଲେ ମତଦାନ କେନ୍ଦ୍ରରେ । ଆଉ ନିଜ ମତଦାନ କରିଥିଲେ। ଏହି 2ଜଣ ଭୋଟର ଆଜି ସାରା ଦେଶବାସୀଙ୍କ ଦୃଷ୍ଟି ଆକର୍ଷଣ କରିଥିଲେ ।
ନାଗାଲାଣ୍ଡରେ 6 ଜିଲ୍ଲାରେ ପଡ଼ିଲାନି ଭୋଟ:- ଗୋଟିଏ ପଟେ ବୟସ୍କ ଭୋଟର ମତଦାନ କରିଥିବା ବେଳେ ନାଗାଲାଣ୍ଡରେ 6 ଜିଲ୍ଲାରେ ମତଦାନ ଶୂନ ରହିଥିବା ଜଣାପଡ଼ିଛି । ଏଠାକାର ଭୋଟର ଭୋଟ ବର୍ଜନ କରିଛନ୍ତି । ପୂର୍ବ ନାଗାଲାଣ୍ଡକୁ ସ୍ବତନ୍ତ୍ର ରାଜ୍ୟ ମାନ୍ୟତା ଦାବି କରି ସେମାନେ ଭୋଟ ବର୍ଜନ କରିଥିବା ଜଣାପଡ଼ିଛି । ଏନେଇ ଇଷ୍ଟର୍ଣ୍ଣ ନାଗାଲାଣ୍ଡ ପିପୁଲ୍ସ ଅର୍ଗାନାଇଜେନ ପକ୍ଷରୁ ଭୋଟ ବର୍ଜନ ଲାଗି ଡାକରା ଦିଆଯାଇଥିଲା । ଗତ 2010ରୁ ସ୍ବତନ୍ତ୍ର ରାଜ୍ୟ ମାନ୍ୟତା ଦାବି କରିଆସୁଛନ୍ତି ଏଠାକାର ଭୋଟର ।
ବ୍ୟୁରୋ ରିପୋର୍ଟ, ଇଟିଭି ଭାରତ
