ହାଇଦ୍ରାବାଦ: ଗତ 2022 ନଭେମ୍ବର ମାସରେ ସେନାରେ ଅଗ୍ନବୀର ଭାବେ ନିଯୁକ୍ତି ପାଇଥିଲେ କିନ୍ତୁ ଆଗକୁ ସେ ଆଉ ସେନାରେ କାମ କରିବା କେତେ ଉଚିତ ସେ ପ୍ରଶ୍ନ ଉଠିଛି । ପଞ୍ଜାବର ଅଗ୍ନିବୀର ଯବାନ ଇସମିତ୍ ସିଂ । ସେନାରେ ତାଙ୍କ କାର୍ଯ୍ୟକାଳ ସମୟରେ ଛୁଟିରେ ଆସି ଅପରାଧ ଦୁନିଆକୁ ଏଣ୍ଟ୍ରି କରିଛନ୍ତି । ଅପରାଧ ପୁଣି ଏମିତି ସେମିତି ନୁହେଁ, ନିଜେ ଗଢିଛନ୍ତି ଗ୍ୟାଙ୍ଗ । ହାତେଇଛନ୍ତି ଅନେକ ବେଆଇନ ଅସ୍ତ୍ରଶସ୍ତ୍ର । ଏହା ପରେ ଆରମ୍ଭ କରିଥିଲେ ଅସଲି ଖେଳ । କିନ୍ତୁ ଅପରାଧର ବାଦଶାହ ଦେବାକୁ ଦେଖିଥିବା ତାଙ୍କ ସ୍ବପ୍ନ, ସ୍ବପ୍ନରେ ହିଁ ରହିଯାଇଛି । ବେଶି ଦିନ ସେ ଅପରାଧର କଳା କୋଠରୀ ମଧ୍ୟରେ ଲୁଚି ପାରିନାହାଁନ୍ତି । ଚୋର ପାଇଁ ଅନ୍ଧାର ଘର ଦିନେ ନା ଦିନେ ଆଲୋକିତ ହେବା ଭଳି ସେ ପୋଲିସରେ ଧରାପଡିଯାଇଛନ୍ତି ।
ପଞ୍ଜାବ ରାଜଧାନୀ ମୋହାଲିରେ ଜାତୀୟ ରାଜପଥରୁ ଲୁଟ ତରାଜୁ ଏବଂ ଗାଡି ଚୋରି ଅଭିଯୋଗରେ ତାଙ୍କୁ ଗିରଫ କରିଛି ମୋହାଲି ପୋଲିସ । ଖାଲି ତାଙ୍କୁ ଧରିନି ବରଂ ପୁରା ଗ୍ୟାଙ୍ଗକୁ ମାଡି ବସିଛି ପୋଲିସ । ଇସମିତ ସହିତ ଦୁଇ ଜଣଙ୍କୁ ଗିରଫ କରିଛି ପୋଲିସ । ତେବେ ଏହି ଗ୍ୟାଙ୍ଗରେ ସାମିଲ ଥିଲେ ତାଙ୍କ ଭାଇ ପ୍ରଭଦୀପ ସିଂ । ତୃତୀୟ ଅଭିଯୁକ୍ତ ଥିଲା ଇସମିତଙ୍କ ବନ୍ଧୁ ବାଲକରନ ସିଂ । ଅଭିଯୁକ୍ତଙ୍କୁ ଗିରଫ ପରେ ପୋଲିସ ଗ୍ୟାଙ୍ଗ ନିକଟରୁ ଏକ ଚୋରୀ ଟ୍ୟାକ୍ସି, ବୁଲେଟ ମଟର ସାଇକେଲ, ସ୍କୁଟର ଏବଂ ଦେଶୀ ବନ୍ଧକ ଜବତ କରିଛି ।
ପରେ ପୋଲିସ ସୂଚନା ଦେଇଛି କି, 2022ରେ ଅଗ୍ନିବୀରରେ ସାମିଲ ହେବା ପରେ ଇସମିତ ପଶ୍ଚିମବଙ୍ଗରେ ମୂତୟନ ହୋଇଥିଲେ । ସେ ଦୁଇ ମାସ ତଳେ ଛୁଟିରେ ଆସିଥିଲେ । ପରେ ସେ ଆଉ ଡ୍ୟୁଟିକୁ ନଫେରି ଗୋଟଏ ଘର ଭଡା ନେଇ ଆପରାଧ ସାମ୍ରାଜ୍ୟକୁ ବଢାଇଥିଲେ । ତେବେ ଏହି ଗ୍ୟାଙ୍ଗ ନେଇ ପୋଲିସ ପାଖରେ ଖବର ପହଞ୍ଚିବା ପରେ ପୋଲିସ ଅପରେସନ ଆରମ୍ଭ କରିଥିଲା । ସେମାନେ ଗାଡି ଚୋରି କରି ଡୁପ୍ଲିକେଟ ନମ୍ବର ଲଗାଇ ବ୍ୟବହାର କରୁଥିଲେ ବୋଲି ପୋଲସ କହିଛି ।
ଏପଟେ ସେନା ପକ୍ଷରୁ ଏହି ଖବର ନେଇ କୌଣସି ପ୍ରତିକ୍ରିୟା ଆସିନାହିଁ । ସେନା ଏବଂ ସରକାର ଅଗ୍ନିବୀର ନିଯୁକ୍ତି ନେଇ ବାରମ୍ବାର ବିରୋଧୀଙ୍କର ସମାଲୋଚନାର ଶିକାର ହେଉଛନ୍ତି । ତେବେ ଦେଖିବାକୁ ବାକି ରହିଲା ସେନା ଏହି ଘଟଣାରେ କଣ ଆକ୍ସନ ନେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
