ନୂଆଦିଲ୍ଲୀ: ପାକିସ୍ତାନ ପରମାଣୁ ବୋମା ରଖିଛି ତେଣୁ ତା'ର ସମ୍ମାନ କରିବା ଉଚିତ । ଏଭଳି କିଛି ବୟାନ ଦେଇ ବର୍ତ୍ତମାନ ଚର୍ଚ୍ଚାକୁ ଆସିଛନ୍ତି ମଣିଶଙ୍କର ଆୟର । ସାମ ପିଟ୍ରୋଡାଙ୍କ ପରେ ବର୍ତ୍ତମାନ କଂଗ୍ରେସର ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ମଣିଶଙ୍କର ଆୟରଙ୍କ ସାକ୍ଷାତକାର ସାମ୍ନାକୁ ଆସିଛି । ଏକ ୟୁଟ୍ୟୁବ୍ ଚ୍ୟାନେଲକୁ ସାକ୍ଷାତକାର ଦେବାବେଳେ ଆୟର୍ ପୁନର୍ବାର ପାକିସ୍ତାନ ସହ ଆଲୋଚନାକୁ ସମର୍ଥନ କରିଛନ୍ତି । ପିଟ୍ରୋଡାଙ୍କ ପରେ ଆୟରଙ୍କ ମନ୍ତବ୍ୟ ବର୍ତ୍ତମାନ କଂଗ୍ରେସ ପାଇଁ ଚିନ୍ତାର କାରଣ ସାଜିଛି ।
ସେ ସାକ୍ଷାତକାରରେ କହିଛନ୍ତି, ପାକିସ୍ତାନ ସହିତ ବାର୍ତ୍ତାଳପ କରିବା ଉଚିତ ଏବଂ ତାଙ୍କୁ ସମ୍ମାନ ଦେବା ଉଚିତ । ପାକିସ୍ତାନ ନିକଟରେ ପରମାଣୁ ବୋମା ରହିଛି । ଯଦି ଆମେ ପାକିସ୍ତାନକୁ ସମ୍ମାନ କରିବୁ ନାହୁଁ ତେବେ କିଛି ପାଗଳ ନେତା ଆସି ପରମାଣୁ ବୋମା ବାହାର କଲେ ଆମେ କ'ଣ କରିବା ? ସେ ଆହୁରି ମଧ୍ୟ କହିଛନ୍ତି, "ପାକିସ୍ତାନ ଏଭଳି ଏକ ଦେଶ, ଯାହାକୁ ଭାରତ ସମ୍ମାନ ଦେବା ଉଚିତ । ଆପଣ ହାତରେ ବନ୍ଧୁକ ଧରି ବୁଲିଲେ ଏହାର ସମାଧାନ କିଛି ହେବ ନାହିଁ । ବରଂ ଚିନ୍ତା ବଢିବ ।"
ବିଶ୍ବଗୁରୁ ହେବାକୁ ହେଲେ ବାର୍ତ୍ତାଳାପ କରିବାକୁ ହେବ: କେନ୍ଦ୍ରମନ୍ତ୍ରୀ ମଣିଶଙ୍କର ଆୟର କହିଛନ୍ତି, "ଆମ ପାଖରେ ଆଟମ୍ ବମ୍ ରହିଛି । ଯଦି ଆମେ ଏହାକୁ ଲାହୋର ଷ୍ଟେସନରେ ପକାଇବା ତାହେଲେ ଏହା କାମ କରିବାକୁ ମାତ୍ର 8 ସେକେଣ୍ଡ ଲାଗିବ ଏବଂ ଏହାର ରେଡିଓ ଆକ୍ଟିଭିଟି ଅମୃତସର ଯାଏଁ ପହଞ୍ଚିବ । ଯଦି ଆମେ ବିଶ୍ବ ନେତା ହେବାକୁ ଚାହୁଁଛେ, ତାହାଲେ ବଡ ସମସ୍ୟାର ସମାଧାନ ପାଇଁ କଠିନ ପରିଶ୍ରମ କରିବା ଜରୁରୀ । କିନ୍ତୁ ଗତ 10 ବର୍ଷ ମଧ୍ୟରେ ସମସ୍ତ କଠିନ ପରିଶ୍ରମ କରିବା ବନ୍ଦ ହୋଇଯାଇଛି । ଆତଙ୍କବାଦୀଙ୍କୁ ପ୍ରୋତ୍ସାହିତ କରୁଥିବାରୁ ବିଜେପି କୌଣସି ପ୍ରକାର ବାର୍ତ୍ତାଳାପ କରିବା ନେଇ ମନା କରିଦେଉଛି । ଆତଙ୍କବାଦୀକୁ ସମୂଳେ ବିନାଶ ପାଇଁ ଆଲୋଚନା ଜରୁରୀ ।"
ପୂର୍ବରୁ ପିଟ୍ରୋଡା ପୂର୍ବରାଜ୍ୟର ଲୋକଙ୍କୁ ଚୀନ ଓ ଦକ୍ଷିଣ ଭାରତୀୟ ଲୋକଙ୍କୁ ଆଫ୍ରିକା ସହ ତୁଳନା କରିଥିଲେ । ସାକ୍ଷାତକାରରେ କହିଥିଲେ "ଭାରତର ପୂର୍ବୋତ୍ତର ଲୋକମାନେ ଚୀନ ନାଗରିକ ଭଳି ଦେଖାଯାଉଥିବା ବେଳେ ଦକ୍ଷିଣ ଭାରତୀୟ ଲୋକେ ଆଫ୍ରିକୀୟ ଭଳି ଲାଗନ୍ତି । ଆମେ ଭାରତ ଭଳି ବିବିଧତାପୂର୍ଣ୍ଣ ଦେଶକୁ ଯୋଡି ରଖିପାରିବା । ଯେଉଁଠି ପୂର୍ବୋତ୍ତର ଲୋକେ ଚୀନବାସୀ ଭଳି ଦେଖାଯାନ୍ତି, ପଶ୍ଟିମ ଭାରତ ଲୋକେ ଆରବ ଭଳି ଦେଖାଯାନ୍ତି ଉତ୍ତରରେ ଲୋକେ ହ୍ୱାଇଟ ଦେଖାଆଯାନ୍ତି ଓ ଦକ୍ଷିଣ ଭାରତ ଲୋକେ ଆଫ୍ରିକୀୟ ଭଳି ଲାଗନ୍ତି । ଏଥିରେ କିଛି ଫରକ ପଡେନି । ଆମେ ସମସ୍ତେ ଭାଇ ଭଉଣୀ ଅଟନ୍ତି ।"
