ଗୌହାଟୀ: କୁଖ୍ୟାତ ଆତଙ୍କବାଦୀ ସଂଗଠନ ଇସଲାମିକ ଷ୍ଟେଟ (ISIS) ସହ ସଂପର୍କ ସନ୍ଦେହରେ ଆଇଆଇଟି ଗୌହାଟୀର ଛାତ୍ର ଗିରଫ । ଆସାମ ସ୍ପେଶାଲ ଟାସ୍କ ଫୋର୍ସ (STF) ଜଣେ ଛାତ୍ରକୁ ଗିରଫ କରି ପଚରାଉଚରା କରୁଛି । ଆଇଆଇଟି ଗୌହାଟୀର ବାୟୋଟେକ୍ନୋଲୋଜିର ଚତୁର୍ଥ ସେମିଷ୍ଟାରର ଛାତ୍ର ଆଇଏସଆଇଏସ ସହିତ ସଂପୃକ୍ତ ରହିଥିବା ନେଇ ଏସଟିଏଫର ଅତିରିକ୍ତ ପୋଲିସ ଅଧୀକ୍ଷକ କଲ୍ୟାଣ ପାଠକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି । ଗିରଫ ହୋଇଥିବା ଯୁବକଙ୍କ ନାମ ତୌସିଫ ଅଲି ଫାରୁକ ବୋଲି ଜଣାପଡିଛି ।
ଗିରଫ ଛାତ୍ର ତୌସିଫ ଅଲି ଫାରୁକ ବାୟୋଟେକ୍ନୋଲୋଜିର ଚତୁର୍ଥ ସେମିଷ୍ଟାରର ଛାତ୍ର ରହିଥିଲେ । ତେବେ କୁଖ୍ୟାତ ଆତଙ୍କବାଦୀ ସଂଗଠନ ଇସଲାମିକ ଷ୍ଟେଟ (ISIS) ସହିତ ସେ ଯୋଗାଯୋଗରେ ରହିଥିବା ନେଇ ସେ ଖୋଦ ଘୋଷଣା କରିଛନ୍ତି । ଶନିବାର ଅପରାହ୍ନରେ ଦିଲ୍ଲୀ ପୋଲିସ ଏବଂ ଆସାମ ପୋଲିସର ବରିଷ୍ଠ ଅଧିକାରୀଙ୍କୁ ଇମେଲ ମାଧ୍ୟମରେ ଏବଂ ଲିଙ୍କଡଇନ ପେଜ୍ରେ ଅପଡେଟ କରି ଫାରୁକ ଏହି ଘୋଷଣା କରିଥିଲେ । ନିଜ ଜୀବନକୁ ଆଲ୍ଲାଙ୍କୁ ସମର୍ପିତ କରିବା ପାଇଁ ସେ ଆଇଏସଏସରେ ଯୋଗ ଦେଇଥିବା ନେଇ ଘୋଷଣା କରିଥିଲେ । ତେବେ ଏହାପରେ ତୌସିଫ ଅଲି ଫାରୁକଙ୍କୁ ଗିରଫ କରାଯାଇଥିଲା ।
ଏହା ମଧ୍ୟ ପଢନ୍ତୁ: ଆତଙ୍କୀ ସଂଗଠନ ISISର ଭାରତ ମୁଖ୍ୟ ଗିରଫ
ତୌସିଫ ଅଲି ଫାରୁକକୁ ଗିରଫ କରାଯାଇଥିବା ନେଇ ଏସଟିଏଫର ଅତିରିକ୍ତ ପୋଲିସ ଅଧୀକ୍ଷକ କଲ୍ୟାଣ ପାଠକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି । ସେ କହିଥିଲେ, "ପୋଲିସ ଏନେଇ ପୂର୍ବରୁ ଅନେକ ସୂଚନା ପାଇ ସାରିଥିଲା । ତେବେ ଫାରୁକ ଯେଉଁ ହଷ୍ଟେଲରେ ରହୁଥିଲେ ସେଠାରେ ଚଢାଉ କରିଥିବା ଏସଟିଏଫ ଟିମ୍ । ହଷ୍ଟେଲରୁ ଏକ ପତାକା ଉଦ୍ଧାର କରାଯାଇଥିବା ବେଳେ ଛାତ୍ରଜଣକ ସର୍ବଦା ଏକାକୀ ରହିବା ପାଇଁ ପସନ୍ଦ କରୁଥିବା ନେଇ ସହପାଠୀମାନେ କହିଛନ୍ତି । ସେ ଅନ୍ୟ ସହପାଠୀଙ୍କ ସହ ମେଳାପୀ ନଥିବା ବେଳେ ଶନିବାର ଅପରାହ୍ନରୁ ନିଖୋଜ ରହିଥିଲେ । ତୌସିଫ ଅଲି ଫାରୁକ ଦିଲ୍ଲୀର ବାସିନ୍ଦା । "
ପ୍ରକାଶଥାଉକି, ଗତ 21 ତାରିଖରେ ଆସାମର ଧୁବ୍ରି ଅଞ୍ଚଳରୁ ISISର ଭାରତ ମୁଖ୍ୟ ହରୀଶ ଆଜମଲ ଫାରୁକି ଏବଂ ତା'ର ଜଣେ ସହଯୋଗୀକୁ ଗିରଫ କରିଥିଲା ଆସାମ ସ୍ପେଶାଲ ଟାସ୍କ ଫୋର୍ସ (STF) । ଏକ ବଡ ଅପରେସନ ଚଳାଇ ଏହି ଦୁଇ ଟପ୍ ISIS ନେତାଙ୍କୁ ଗିରଫ କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
