ହାଇଦ୍ରାବାଦ: ଭାରତୀୟ ସ୍ଥଳସେନାର ନୂତନ ମୁଖ୍ୟ ଭାବେ ଦାୟିତ୍ବ ଗ୍ରହଣ କରିଛନ୍ତି ଜେନେରାଲ ଉପେନ୍ଦ୍ର ଦ୍ବିବେଦୀ । ଗତକାଲି (ରବିବାର) ସ୍ଥଳସେନା ମୁଖ୍ୟ ମନୋଜ ପାଣ୍ଡେଙ୍କ କାର୍ଯ୍ୟକାଳ ସରିବା ପରେ ସ୍ଥଳସେନାର ଉପମୁଖ୍ୟ ଦାୟିତ୍ବରେ ଥିବା ଲେଫ୍ଟନାଣ୍ଟ ଜେନେରାଲ ଉପେନ୍ଦ୍ର ଦ୍ବିବେଦୀ ତାଙ୍କଠାରୁ ସେନା ମୁଖ୍ୟାଳୟରେ ବିଧିବଦ୍ଧ ଭାବେ କାର୍ଯ୍ୟଭାର ଗ୍ରହଣ କରିଛନ୍ତି । ଚଳିତମାସ ପ୍ରାରମ୍ଭରେ ଭାରତ ସରକାର ଉପେନ୍ଦ୍ରଙ୍କୁ ସ୍ଥଳସେନା ମୁଖ୍ୟ ଭାବେ ନିଯୁକ୍ତି ଦେଇଥିଲେ ।
ଏହି ନୂତନ ଦାୟିତ୍ବ ସହ ଭାରତୀୟ ପ୍ରତିରକ୍ଷା କ୍ଷେତ୍ରରେ ଏକ ବିରଳ ସଂଯୋଗ ମଧ୍ୟ ଦେଖିବାକୁ ମିଳିଛି । ଭାରତୀୟ ସ୍ଥଳସେନା ଓ ନୌସେନା ମଖ୍ୟ ଭାବେ ଅବସ୍ଥାପିତ ହୋଇଛନ୍ତି ଦୁଇ ସ୍କୁଲ ସାଙ୍ଗ । ନୌସେନା ଅଧ୍ୟକ୍ଷ ଆଡମିରାଲ ଦୀନେଶ ତ୍ରିପାଠୀ ଓ ସ୍ଥଳସେନା ଜେନେରାଲ ଉପେନ୍ଦ୍ର ଦ୍ବିବେଦୀ ହେଉଛନ୍ତି ଗୋଟିଏ ସୈନିକ ସ୍କୁଲରେ ଗୋଟିଏ ଶ୍ରେଣୀରେ ପାଠ ପଢିଥିବା ଦୁଇ ବାଲ୍ୟ ବନ୍ଧୁ । ଜଣଙ୍କ କାନ୍ଧରେ ଦେଶର ସ୍ଥଳସୀମାର ସୁରକ୍ଷା ଭାର ନ୍ୟସ୍ତ ଥିବା ବେଳେ ଅନ୍ୟ ଜଣେ ଦେଶର ଜଳସୀମାର ସୁରକ୍ଷାର ସର୍ବୋଚ୍ଚ କମାଣ୍ଡରର ଦାୟିତ୍ବ ନେଇଛନ୍ତି ।
ଉଭୟ ଦୀନେଶ ଓ ଉପେନ୍ଦ୍ର 1970 ଦଶକରେ ମଧ୍ୟ ପ୍ରଦେଶର ରେଓ୍ବା ସ୍ଥିତ ସୈନିକ ସ୍କୁଲରେ ଏକାଠୀ ପାଠ ପଢୁଥିଲେ । ପରେ ଉଭୟ ସାମରିକ କଲେଜର ସ୍ପେସାଲାଇଜଡ ପ୍ରତିଷ୍ଠାନରେ ଶିକ୍ଷାଗ୍ରହଣ କରିଥିଲେ । ‘ଇଣ୍ଡିଆନ ମିଲିଟାରୀ ଏକାଡେମୀ’ରୁ ଶିକ୍ଷା ଶେଷ କରି ଉପେନ୍ଦ୍ର ଭାରତୀୟ ସ୍ଥଳସେନାରେ ଭର୍ତ୍ତି ହୋଇଥିଲେ । ସେହିପରି ଦୀନେଶ ମଧ୍ୟ ‘ଇଣ୍ଡିଆନ ନାଭାଲ ଏକାଡେମୀ’ରୁ ଶିକ୍ଷା ଶେଷ କରିବା ପରେ ଭାରତୀୟ ନୌସେନାରେ ନିଜର ସାମରିକ କ୍ୟାରିୟର ଆରମ୍ଭ କରିଥିଲେ । ଦୁଇ ବନ୍ଧୁ, ଦୁଇ ସେନାର ପ୍ରମୁଖ ହେବାରେ ଏହି ବିରଳ ସଂଯୋଗକୁ ଦେଶର ସାମରିକ ଇତିହାସରେ ପ୍ରଥମ ବୋଲି କୁହାଯାଉଛି ।
#WATCH | Delhi: Army Chief General Upendra Dwivedi says, " this is a moment of immense pride and honour for me to be assigned the responsibility to lead the indian army...indian army faces unique operational challenges and to remain prepared for such threats and destructive… pic.twitter.com/9ji72G9NCE
— ANI (@ANI) July 1, 2024
#WATCH | Delhi | Army Chief General Upendra Dwivedi touches the feet of his brother and other relatives as he takes over as the new Chief of Army Staff pic.twitter.com/ElQ6XHfa4V
— ANI (@ANI) July 1, 2024
ଉପେନ୍ଦ୍ରଙ୍କ କ୍ୟାରିୟର:-
୧୯୬୪ରେ ଜନ୍ମିତ ଉପେନ୍ଦ୍ର ସୈନିକ ଏକାଡେମୀ ମାଧ୍ୟମରେ ସେନାରେ ଭର୍ତ୍ତି ହୋଇଥିଲେ । ୧୯୮୪ ଡିସେମ୍ବର ୧୫ ତାରିଖରେ ସେ ସ୍ଥଳସେନାର ଇନଫେଣ୍ଟାରୀ ରେଜିମେଣ୍ଟର ‘ଜେ.କେ ରାଇଫଲ୍ସ’ରେ ଯୋଗଦାନ କରିଥିଲେ । ଏହାପରେ ସେ ବିଭିନ୍ନ ରେଜିମେଣ୍ଟର କମାଣ୍ଡ ନେଇଥିଲେ । ଉତ୍ତର-ପୂର୍ବ ଭାରତରେ ସେ ‘ଆସାମ ରାଇଫଲ୍ସ’ର କମାଣ୍ଡର ଭାବେ କାର୍ଯ୍ୟ କରିବା ପରେ ଇଷ୍ଟ-ଜୋନର ମହାନିର୍ଦ୍ଦେଶକ ମଧ୍ୟ ହୋଇଥିଲେ । ପରେ ସେ ‘ଜେନେରାଲ ଇନଫେଣ୍ଟାରୀ’ର ମହାନିର୍ଦ୍ଦେଶକ ଓ ଉତ୍ତର-କମାଣର କମାଣ୍ଡିଂ ମୁଖ୍ୟ ଭାବେ କାର୍ଯ୍ୟ କରିଥିଲେ । ଏବେ ସେ ସ୍ଥଳସେନାର ଉପମୁଖ୍ୟ ଦାୟିତ୍ବରେ ରହିଛନ୍ତି । ଉତ୍ତର-ପୂର୍ବରେ ଅନୁପ୍ରବେଶ ଓ ଉଗ୍ରବାଦ ପରି ସମ୍ବେଦନଶୀଳ ପ୍ରସଙ୍ଗରେ ତାଙ୍କ ନେତୃତ୍ବରେ ସ୍ଥଳସେନା ଉଲ୍ଲେଖନୀୟ ପ୍ରଦର୍ଶନ କରିଥିଲା । ସେହିପରି ଚୀନ ସୀମାନ୍ତ ଅରୁଣାଚଳ ପ୍ରଦେଶରେ ମଧ୍ୟ ସେ ବିଭିନ୍ନ ସାମରିକ ଅପରେସନର ନେତୃତ୍ବ ନେଇଛନ୍ତି । ଦୀର୍ଘ ୪୦ ବର୍ଷରୁ ଅଧିକ ସାମରିକ କ୍ୟାରିୟରରେ ସେ ଏକାଧିକ ସାହାସିକତା ଓ ସେନା ସମ୍ମାନରେ ସମ୍ମାନିତ ମଧ୍ୟ ହୋଇଛନ୍ତି । ତାଙ୍କୁ ଭାରତ ସରକାର ‘ଅତିବିଶିଷ୍ଟ ସେବା ମେଡାଲ’ ଓ ‘ପରମ ବିଶିଷ୍ଟ ସେବା ମେଡାଲ’ ମଧ୍ୟ ପ୍ରଦାନ କରିଛନ୍ତି ।
#WATCH | Delhi: Army Chief General Upendra Dwivedi receives Guard of Honour.
— ANI (@ANI) July 1, 2024
He took charge as the Chief of Army Staff from General Manoj Pande yesterday, 30th June. pic.twitter.com/I6Au7nrzqt
ଦୀନେଶଙ୍କ କ୍ୟାରିୟର:-
୧୯୬୪ ମସିହା ମେ’ ମାସ ୧୫ ତାରିଖରେ ଜନ୍ମଗ୍ରହଣ କରିଥିବା ଭାଇସ୍ ଆଡମିରାଲ ଦୀନେଶ କୁମାର ତ୍ରିପାଠୀ ୧୯୮୫ ମସିହା ଜୁଲାଇ ପହିଲାରେ ଭାରତୀୟ ନୌସେନାରେ ଭର୍ତ୍ତି ହୋଇଥିଲେ । ସେ ପ୍ରାରମ୍ଭିକ ସମୟରେ ଜଣେ ନୌସନିକ ଭାବେ କାର୍ଯ୍ୟନିର୍ବାହୀ ଶାଖାରେ ଯୋଗ ଦେଇଥିଲେ । ଜଣେ ଯୋଗାଯୋଗ ଏବଂ ବୈଦ୍ୟୁତିକ ଯୁଦ୍ଧ ବିଶେଷଜ୍ଞ ଭାବେ ତାଙ୍କର ଅଭିଜ୍ଞତା ରହିଛି । ସେ ପ୍ରାୟ ୩୯ ବର୍ଷ ଧରି ନୋସେନାରେ ଏକାଧିକ ବରିଷ୍ଠ କମାଣ୍ଡିଂ ପଦରେ କାର୍ଯ୍ୟଭାର ସମ୍ଭାଳିଛନ୍ତି । ନୌସେନାର ଉପମୁଖ୍ୟ ଭାବେ ଦାୟିତ୍ୱ ଗ୍ରହଣ କରିବା ପୂର୍ବରୁ ସେ ପଶ୍ଚିମ-ନୌସେନା କମାଣ୍ଡର ଫ୍ଲାଗ ଅଫିସର କମାଣ୍ଡିଂ-ଇନ୍-ଚିଫ୍ ଭାବରେ ମୁମ୍ବାଇ ନୌସେନା ବେସରେ କାର୍ଯ୍ୟରତ ଥିଲେ ।
ଆଡମିରାଲ ତ୍ରିପାଠୀ ଭାରତୀୟ ନୌସେନା ଜାହାଜ ଆଏନଏସ ବିନାଶ, କିର୍ଚ ଏବଂ ତ୍ରିଶୁଳର ନେତୃତ୍ୱ ନେଇସାରିଛନ୍ତି । ପଶ୍ଚିମ ଫ୍ଲିଟର ଫ୍ଲିଟ୍ ଅପରେସନ୍ ଅଫିସରଙ୍କ ସମେତ ସେ ବିଭିନ୍ନ ଗୁରୁତ୍ୱପୂର୍ଣ୍ଣ ପରିଚାଳନା ଏବଂ କର୍ମଚାରୀ ନିଯୁକ୍ତି ମଧ୍ୟ କରିଛନ୍ତି । ଏବେ ସାମୁଦ୍ରିକ ଆହ୍ବାନ ବଢିବା ସହ ଭାରତୀୟ ନୌସେନାର ନବୀକରଣ ମଧ୍ୟ ଜାରି ରହିଛି । ତେଣୁ ଏକ ଗୁରୁତ୍ବପୂର୍ଣ୍ଣ ସମୟରେ ଆଡମିରାଲ ତ୍ରିପାଠୀ ଭାରତୀୟ ନୌବାହିନୀର ପ୍ରମୁଖ ଭାବେ ଦାୟିତ୍ବ ଗ୍ରହଣ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
