କୋଲକାତା: ଭେଟେରାନ ବାମପନ୍ଥୀ ନେତା ତଥା ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ବୁଦ୍ଧଦେବ ଭଟ୍ଟାଚାର୍ଯ୍ୟଙ୍କର ଆଜି ଦେହାନ୍ତ ହୋଇଛି । ଦୀର୍ଘ ଦିନ ଧରି ବାର୍ଦ୍ଧକ୍ୟଜନିତ ଅସୁସ୍ଥତା କାରଣରୁ ସେ ଚିକିତ୍ସାଧୀନ ଥିଲେ । ଆଜି ଦକ୍ଷିଣ-କୋଲକାତାରେ ଥିବା ତାଙ୍କ ବାସଭବନରେ 80 ବର୍ଷ ବୟସରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ତାଙ୍କ ପରଲୋକରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତିବିଶେଷ ଶୋକ ବ୍ୟକ୍ତ କରିଛନ୍ତି । ଆଜି ଅପରାହ୍ନରେ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କ ଶେଷକୃତ୍ୟ ସମ୍ପନ୍ନ ହେବା ନେଇ ସୂଚନା ମିଳିଛି ।
Shocked and saddened by the sudden demise of the former Chief Minister Sri Buddhadeb Bhattacharjee. I have been knowing him for last several decades, and visited him a few times when he was ill and effectively confined to home in the last few years.
— Mamata Banerjee (@MamataOfficial) August 8, 2024
My very sincere condolences…
- ଗତବର୍ଷ ଭେଣ୍ଟିଲେଟରରେ ଭର୍ତ୍ତି ହୋଇଥିଲେ :-
ତାଙ୍କର ଶ୍ବାସକ୍ରିୟାଜନିକ ସମସ୍ୟା ରହିଥିଲା । ସେ ବାସଭବନରେ ଏକ ସ୍ବତନ୍ତ୍ର ଡାକ୍ତରୀ ଟିମ୍ର ତତ୍ତ୍ବାବଧାନରେ ଚିକିତ୍ସିତ ହେଉଥିଲେ । ଗତବର୍ଷ ଜୁଲାଇ ମାସରେ ତାଙ୍କ ସ୍ବାସ୍ଥ୍ୟାବସ୍ଥା ଗମ୍ଭୀର ହୋଇପଡିବାରୁ ତାଙ୍କୁ ଭେଣ୍ଟିଲେଟରରେ ଭର୍ତ୍ତି କରାଯାଇଥିଲା । ମୁଖ୍ୟମନ୍ତ୍ରୀ ମମତା ବାନାର୍ଜୀ ହସ୍ପିଟାଲରେ ତାଙ୍କ ସ୍ବାସ୍ଥ୍ୟାବସ୍ଥା ଓ ଚିକିତ୍ସା ବ୍ୟବସ୍ଥା ତଦାରଖ କରିଥିଲେ । ହସ୍ପିଟାଲରୁ ଡିସଚାର୍ଜ ହେବା ପରେ ସେ ବାସଭବନରେ ଚିକିତ୍ସିତ ହେଉଥିଲେ ।
- ବଙ୍ଗ ରାଜନୀତିର ଜଣେ ତୁଙ୍ଗ ଚେହେରା:-
ଦୀର୍ଘ 5 ଦଶନ୍ଧି ଧରି ପଶ୍ଚିମବଙ୍ଗ ରାଜନୀତିରେ ସକ୍ରିୟ ରହିଥିବା ଭଟ୍ଟାଚାର୍ଯ୍ୟ ଜଣେ ବର୍ଷିୟାନ ସାମ୍ୟବାଦୀ ନେତା । ସେ ଛାତ୍ର ଜୀବନରୁ ରାଜନୀତି ଆରମ୍ଭ କରିଥିଲେ । ପରେ ସିପିଆଇ (ମାର୍କ୍ସବାଦୀ) ପାର୍ଟରୁ ପ୍ରତିନିଧିତ୍ବ କରି 2000 ରୁ 2011 ମସିହା ପର୍ଯ୍ୟନ୍ତ ପଶ୍ଚିମବଙ୍ଗର 7ମ ମୁଖ୍ୟମନ୍ତ୍ରୀ ଭାବେ ଦାୟିତ୍ବ ତୁଲାଇଥିଲେ । ଏହା ପୂର୍ବରୁ ସେ 1999ରୁ 2000 ମସିହା ପର୍ଯ୍ୟନ୍ତ ଜ୍ୟୋତି ବାସୁ ସରକାରରେ ଉପମୁଖ୍ୟମନ୍ତ୍ରୀ ମଧ୍ୟ ଥିଲେ । ତାଙ୍କ ନେତୃତ୍ବ ପରେ, ଏକଦା ବଙ୍ଗ ରାଜନୀତିରେ ଅଖଣ୍ଡ ପ୍ରଭାବଶାଳୀ ଥିବା ବାମ ଦଳର କ୍ଷମତା ଯୁଗ ଶେଷ ହୋଇଥିଲା । ଶାସନକୁ ଆସିଥିଲା ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ।
‘ପଦ୍ମଭୂଷଣ’ ସମ୍ମାନ ପ୍ରତ୍ୟାଖ୍ୟାନ କରି ଥିଲେ ଚର୍ଚ୍ଚାରେ:-
ଭାରତୀୟ ରାଜନୀତିରେ ଉଲ୍ଲେଖନୀୟ ଅବଦାନ ପାଇଁ ବୁଦ୍ଧଦେବଙ୍କୁ 2022ରେ ଦେଶର ତୃତୀୟ ସର୍ବୋଚ୍ଚ ସମ୍ମାନ ‘ପଦ୍ମଭୂଷଣ’ ପାଇଁ ମନୋନୀତ କରିଥିଲେ କେନ୍ଦ୍ର ସରକାର । ମାତ୍ର ଏହାକୁ ସେ ଗ୍ରହଣ କରିନଥିଲେ । ତାଙ୍କୁ ପଦ୍ମ ପୁରସ୍କାର ସମ୍ପର୍କରେ କୌଣସି ସୂଚନା କେନ୍ଦ୍ର ସରକାର ଦେଇନି ଓ ସେ ଏହାକୁ ଗ୍ରହଣ କରିବେନି ବୋଲି ବୁଦ୍ଧଦେବ ସେତେବେଳେ ପ୍ରତିକ୍ରିୟାରେ କହିଥିଲେ । ପରେ ତାଙ୍କ ଦଳ ସିପିଆଇ-(ଏମ) ମଧ୍ୟ ସମାନ ଆଭିମୁଖ୍ୟ ସହ ଭଟ୍ଟାଚାର୍ଯ୍ୟଙ୍କ ନିଷ୍ପତ୍ତିରେ ସ୍ପଷ୍ଟୀକରଣ ରଖିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
